Kikhemkhem nawn kei ni ~ Lian Tuang

Kikhemkhem nawn kei ni ~ Lian Tuang

Khat vei lawmte khat tawh ka kihoho leh zunkhum sikhum neih a hamsat dan ong gen hi.

I ihmut suaksuak, tha zawmzawm, lungsim gik neinai, meima nei leng dam thei mahmah lo, …,nek le dawm zong nakpi in kidop kul lailai hi. An lim nono meh lim nono pen cidamte adingin si le sa thagui thatang kibehlapna ahih hangin ko adingin gu bangin kisih lawh thei hi mai hi, ci in tampi ong gengen hi.

Hih pen pumpi cidamna lam hi mawk ahih leh nisim nuntakna le lungsim cidamna lamah zong hih bang natna nam dan a om thei diam aw ci in kei le kei ka kidongdong hi.

Mi cidamte in an khempeuh a nek theihmah bangin kim le pam, lawm le gual, u le nau tawh I kikhawl thei hiam, kilemloh pih khawng I nei nemnum hiam. Thu le la khat peuh a om ciangin thahatna khantohna picinna in I zang thei hiam. Ahih keileh thu nengno khat peuh hangin I buailua pahpah lel hiam.

Thu piang khat peuh hangin lungsim meima I nei kha hiam.Tua lungsim meimate a damkik pahpah zo hiam, sawt veipi I vei zaw hiam. Hiam,…..,… hiam tampi om ding hi.

• I Minam
• I kipawlnate
• I khua le tui

I gam I lei ,…………., mimal lungsim mahmah in zunkhum sikhum natna a vei kha hiam, a damkim tek mah ding hiam.

Tua bang natna I neih zenzen leh om dan khawl dan, nek le dawm kidawm ni. Adiakdiak in a khum limlim I tam nek nawnloh ding ahi hi.

A khum I cih ciangin lungkim pakna dingin ahi lopi le a khengval in kiphat kikhemna a kipan, pumpi deihna lungsim deihnate zuihna cihte zong kihel hamtang kha dingin ka lamen hi. Lian Tuang