Sangsia te mawhpuakna a thupitzia

Sangsia te mawhpuakna a thupitzia

Laihilh nasep (Teaching Profession) pen na dangte sangin thupi in zong haksa zaw hi. Teaching profession pen zong aki tangsam mah mah khat hi mawk ei. A lunglut lote adingin naupang laihilh pen thubaih vetlo hi. Tua ahihmanin in sangsia pen a lunglut ngiatte bekin sem leh hoih hi. Sangsia te laibu bekah ki-nga lo in leitung khantohna tawh kizuiin naupang pantah siam le uh deih huai.

Amau mah tawh aki bang mihing a uk ding ahihmanin ki pumpiakna lungsim sangsia ten nei thei leh hoih hi. Sangsia te pen leitung a puahpha thei, a kikhelsak thei leh a siasak thei te ahi uh hi. American Man of Letters akici Henry Adam in, “ Sangsia ten mihing nuntakna ah thunei uh hi” ci hi. Bang hang hiam cih leh naupang khat nuntak nang pen sangsia te’ makaihna tawh kisai peuhmah hi. Tua ahihmain sangsia ten khasum ngah nang bek in sem kei uh henla, bangci’n naupangte mi lawhcing ka suaksak thei diam cih ngaihsun zaw le uh hoih ding hi. Dr. E.A Pires bangin, “Sangsia te dinmun bang lianin gam leh nam om hi” ci hi. Sangsiate a hoih leh gam leh nam zong hoih cihna hi pah mai hi.

Sangsia hoih leh sinna hoih piakkhiat nangin formula khat “teaching efficiency = Ex – F” zat kuul hi. Hidanin hilhcian leeng; Expertise(siamnalna)X Enthusiasm(lawpna)X Expression(gencianna) – Frustration(lungkiatna). Lungkiatna pen a hoihlo pen ahi hi. Sangsia ten lungkiatna a neih tak ciangin a sangnaupangte tung pan in lam-etna bangmah nei ngam lo hi. Tua in cikmah ciangin lawhcinna pia ngei lo ding hi. Mark Twain in zong,” Mihoih hih ding thupi hi ahizongin tua sangin sangsia sem a midangte hilh thupi zaw lai “ ci hi. Rabindranath Tagore in, “ Sangsia te pen mihing lungsim sal taanna pana a honkhia ding tea hi uh” ci hi. Hih pan bek in zong sangsia te mawhpuakna a liatzia kitel mah mah hi.

Dr. Hussain in” Naupang makaihna ah leitung lam-et bei in a om phial zongin naupangte adingin lam-etna mun nihah om thei lai hi. Tua pen sangsia te leh nute ahi uh hi” ci hi. Naupang ten a etteh pipen uh a nute uh leh sangsiate hi takpi hi. Tua ahihmanin sangsia ten sangnaupang te’ etteh takin ka om hiam cih kisit pha dih un. A mau nuntakpih theih dingin bang na nusiat uh hiam? Sangsia hoihlo khatin sangnaupang hoih a piansak nang baihlo hi. Ahizongin sangsia hoihin sangnaupang hoih piangsak zaw hi. Bang hang hiam cih leh naupang ten a siate uh etteh mawk uh hi. Tua ahihmanin sangsiate naupangte etteh taak dingin om sawm ta hen.

Sangsia te tawh kituakin sang dinmun zong om hi. Cihnopna ah sangsia hoih omna pen sang hoih hipah lel hi. Tua mah bangin sanghoih lo result sia cih khawng pen sangsia te kicin lah man ahi hi. Sangsia hoih omna pen sang hoih hipah hi. Sang hoih omna khua pen khangto hi. Bang hang hiam cih leh mihoih tampi tua sang pan in a khankhiat man hi. Tuabanga khantohna a omna khua pen khua nuam ahi hi. Tua bang khua nuam a pian theih nangin sangsia ten vaipuak nei cihna hi. Sangsia te mawhpuakna pen thupi mah mah mawk hi. Sangsia te pen midangte sangin a siamna uh zong sang zaw hi. Tua ahihmanin khuataang leh pawl sungah zong zat luat ding ahi uh hi. Ahizongin tua khuasung leh pawl sungah a kizatna un amau mawhpuakna buaisak keileh deih huai hi. Sangsia te adingin Pasian nasepna pen a neekzonna uh anasep mah uh hi pah hi. Tua pen amau adingin a First Duty uh ahi hi. Classroom teaching a buaisak zah dongin pawlpi leh khuasungah kizat ding hi sam lo hi.

Education is all-round development kici hi. Pilna icih pen na khempeuhah khantohna cihnopna hi. Result hoih pen sang hoih tehna in kizang hi. Result hoih zong thupi sam na vena hi zongin education in a tup pen result hoih bek hi khin lo hi. Sangsia ten naupangte a picin hun dong ua guihtheih khamtheih a zatloh nang un a lungsim uh zawhsak le uh hoih hi. Cidamna a thupi zia khawng zong limtakin kihilh huai. Tua bek tham lo in diktatna, thumanna leh midangte huhnopna lungsim te naupangte lungsimah tuh ding ahi hi. Lai lam siam lua kisa in distinction in a pass phial uh zongin kham theih guih theih zangin mawk le uh tua pen khantohna bukim kici thei lo hi. Tua ahihmanin laisinna bek hi lo sangnaupangte nuntakna mailam kalsuanzia ding nangawn lamman ah khak ding thupi hi.

Nidanglai India gam sangsia te “guru” kici hi. Tua a deihna in destroyer of Ignorance” cihna hi. Haina a susia te hi mawk uh hi. Sangsia te pen tua zah donga min pha ngah ahi uh hi. Sangsia te pen miallak pan khuavakah hong honkhia in khantoh nang lam hong lakte ahi uh hi. Zahtaak ding leh pahtawi dingin kilawm mah mah hi. Ahizongin a mawhpuakna uh a thupi zahin na a sem takpi uh hiam? Pawlkhat in na hoih sep nuam lo thei uh hi. Sangsia nasep pen nadang tawh kibang lo in haksa zaw hi. Veina leh deihsakna nei te bekin lunglut takin sem leh hoih hi. A lunglut lote adingin baih lo ding hi. Ahizongin a lunglut leh veina a neite adingin lawphuai mah mah hi. Missionary nasep mah tawh aki bang phial hi. Midangte adinga thupha suah theihna khat hi.

I gam leh nam a khantoh theih nangin sangsia ten mawhpuakna lianpi nei uh hi. Zogam sunga sangsia sem ten a min bekin sem lo in lawp tak leh veina tak tawh hong sem dih un. Tua picing khin te sangin sangnaupang ahi laite tungah lam-etna tam zaw hi. Tulai taka sangnaupang te pen den ciang hun a gam leh nam makai dingte ahi uh hi. Namdang ten naupangte a neulai mah un gam leh nam itna lungsim guan uh hi. Mizoram bangah naupang te “Mizo kan ni kan hmel a tha, kan tum a sang bawk si” cih tawh pantah uh hi. Tua in naupangte lungsimah ki muan ngamna neisak hi. Zogam sunga sangsia sem ten sia hoih hih hong sawm dih un. Tua hileh sang hong hoih ding hi. Sang hoih omna khua pen mi hoih mi lawhcing pianna hong hi ding ahihmanin naakpi takin khantohna hong om ding hi.

N.Pautunthang