Sai daikaihzia: Sai agol mahmah hangin Khuai laumahmah

Sai daikaihzia: Sai agol mahmah hangin Khuai laumahmah

Africa gamsung ah Sai (Elephants) honkhat in khuasung mite losung ah utbang in nagamtathei uh a, annkung te naneksak, na suksiat saktheizelzel uhhi. Tua Sai te bangci bangin dai kaihsak theiding cih British Researchers te’n nakankan uh a, Kenya gampan in Sai dai kaihziading mukhia uhhi.

Sai pen ganhinglak ah agolpenpawl ahih hangin amausang in aneuzaw thamtham, acihtak hetlo tawh akibang Khuai (Honey Bee) tepen laumahmah bilbel uhhi. Tuathu British Researchers te leh Zoologists te’n amuhkhiat uhciang in Africa gamsung ah hih Khuai tetawh Sai dai kaihding honggeelkhia uhhi.

Oxford Zoologist Lucy King leh alawmte’n Kenya gamah “Beehive Fence” ci’n Khuai tawh daikaih hong kipan uh a, gualzawhna hong ngahtakpi uhhi.

Nidang in lokho te in Sai alut theihloh nading khuam golpipi tawh dai kai uh a, sumnei zawdeuh te bangin Concrete khawng bawlin daikai uhhi. Himahleh Sai in asuksiatsak nopciang in phutlah neilo in, suksiatsakthei veve hi.

Hih Khuai tawh dai kaihzia akitheih ciangin sumbei phatuam mahmah kici hi. Khuamkung aneu lingleng nih phutziau uh a, tua kikal ah Khuaibu khai liklet lel uhhi. Tua Khuaibu te khau tawh zom uh a, lo kimkot ah akhau paisak zingzeng uhhi.

Sai in losung ah alutsawm ciangin tua khau phukha masa in, Khuaibu kilot ahih manin, Khuai te hong lengkhiapah ziahziah uhhi. Tuaciang in Sai te laumahmah uh a, kilehkik vingveng cimawk hi.

Khuaibu pen Khuai aomkei phialzong in aom ngeina ahihnak leh a ngimnam tawh thei uh ahih manin, Sai te’n lau mahmah uh cizen hi.

Sai ii avun pen sahmahmah, sakmahmah hinapi in, banghang in Sai te in Khuai laulua mahmah uhhiam cihpen leitung mipil Researchers te na ngawn in lamdang samahmah uhhi.

Ahi zongin Khuai te in Sai te ii amit leh amawl (Trunk) sung dehsakthei ahih manin, tuahang in alau uh hiding ci’n ummawh uhhi. Zogam ahbel Sai omkeibek naven, aom hizenzenleh hih Sai dai kaihzia pen zat huai bilbel hi. ZD Sawltak #zomidaily