Tg Zam Lian Khup in Master of Engineering ngah

Tg Zam Lian Khup in Master of Engineering ngah

UK gam sung a om Zomi tangval khat a hi Tg Zam Lian Khup (Khuppi) in Master of Civil Engineering tawh tuni 27 August 2014 in University College London (UCL) pan in lukhu nelkai hong ngah thei a hih man in kipak huai mahmah hi. UCL pen UK gam sung ah top five university khat in a kiciam teh hi a, leitung ah zong a min thang mahmah university khat a hihi.

UCL ah kum 2010 a kipan 2014 dong kum (4) sung Civil Engineering hong sin to thei a, a ma hanciam na leh a pilna siamna te hang in hibang in Master’s degree hong ngah thei hihi. Civil Engineering a sinna sung ah a lunglut phat diak pen structural engineering lam ahihi. Hi tawh kizui in a theory lambek a bultheih nang hong sin bek hi lo in sepkhiat (practical implementations) na tampi tak zong a sangkah hun sung hong nei thei hi. A ma lunggulh bulpi pen engineering nasep tawh a hih theih zah in minam leh gam a ding in na hoih sem ding cih a hihi.

A beisa pilna sinna

Khuppi pen laisin na leh pilna a lunggulh tawntung mipil mahmah khat a hihi. A sangkah na khempeuh ah zong (top five sung ah a ki hel den) khat hi a, lai hilh siate in a paktat mahmah sang naupang hoih mahmah khat zong a hihi. Pilna sin kipat na pen Tedim, Lawibual sangpi hong kipan khiat hi. Lawibual sangpi ah tanglang pan in tan sawm a zawh dong pilna sin in omhi. Tansawm a zawh khit ciang in pilna sangzaw sin beh ding in Yangon ah om hi. 2000 kum pan in Yangon khuapi Insein GTI sang ah Civil Engineering in kumthum sung sin hi. Insein GTI sang a kah sung in laihat mahmah a hih a final kum in top five tawh hong gual zo hi.

Insein GTI pan in sang hong man khit ciang in Yangon Western University ah zong Physics major pilna hong sin beh lai hi. Tua a sin sung in zong lai hat mahmah a hi man in 2006 kum in Physics tawh Bachelor degree hong ngah hi. Tua a sangkah na ah zong top five sung ah ki hel a hih man in Master hong sin suak thei in 2007 dong Master kumkhat sung sin in om hi. 2007 kum in UK ah zin khia a hih man in, a Master degree a zawh dong sinsuak man lo hi.

Tua bek tham lo in, University ah Physics a sinkawm mah in Pasian thuthuk theihnop na hang tawh Myanmar Institute of Theology (MIT) sang ah nitak sim in Pasian thuthuk sinna sang BARS a zawh dong sin in omhi.

Engineering leh Science lam ah sinkhiat na tampi tak a neihhang in philosophy, politics leh economics cihte zong lunglut tak in a sim tawntung mikhat a hihi.

Innkuan pih te

Khuppi pen Tedim khua a teng laitui khuami Pa Zel Za Dal leh Nu Niang Khaw Dim te tapa hi a, unau giat lakpan in a gukna ahihi. Zomi sung ah mitampi tak in a theih a hi Tedim Baptist Church Yangon (TBC-Y) ah Assistant Pastor a sem Siama Zen Dot Mang pen Khuppi te unau sung ah a u penpen a hihi. Khuppi pen London khuapi teng laitak hi. CS Dal