News update: Russia-Ukraine vai Update (March 06)

News update: Russia-Ukraine vai Update (March 06, 2022)

1. U.S gam mun tuamtuam ah Datsi (gas) man pen average in $4 kiim khangto ta aa, 2008 pan kipan a sang pen dinmun tung to hi ci uh hi. California ah gallon khat ciang $5.28 dongkah to in U.S gambup ah asang pen hi aa, Nevada, Hawaii, Washington state leh Oregon te ah $4.60 kiim khang hi.

Pennsylvania, Arizona, Alaska, New York, Illinois, New Jersey, Rhode Island, Maine, Maryland, Delaware, leh Massachusetts te ah average in $ 4 kiim khangto hi. Russia leh Ukraine buaina hang khang hi kici aa, ahi zongin Pu Biden President hong kah zawh Keystone pipeline hong din khawl sak aa kipan Datsi – gas man pen ni khat khit ni khat akah to to hi kici hi.

2. Leitung ah akizang pen leh aminthang pen Mastercard leh Visa card ten Russia gam aa nasepna (operations) leh sum lut sum zatna (tranactions) khempeuh khawl bawl phot uh cih thu nei lam ten taangko khia uh aa, ATM khempeuh ah card te kizang thei nawnlo phot hi ci uh hi.

3. Zani (March 06) ni in U.S Congress pan members 280 leh Ukrainian President Volodymyr Zelensky te online tung pan kimuh khopna nei uh aa, Ukrainian President pa in Russia te do kik nading gal vanleng piak ding vai, Russia Sathau (oil) lei loh ding vai, no-fly zone bawl ding vai cih te kikum thei uh hi. Abeisa ni 10 sung US kumpi in gal van lei nading $600 million val piakhia khinta uh ahi hi.

4. Russia ii abuluhna hangin Ukraine gammi 1.2 million val gal tai uh aa, US Secretary of State Antony Blinken in zanni in galtai te omna Poland gamgi aa refugee camp ah va pai in tha va pia hi.

5. Putin in Russia tung khaktanna (sanctions) hong bawl khempeuh Russia gam ii gal in ki ngaihsun ding hi ci hi. Tulaitak Putin tawh akipawl leh aphat ei Kawlgam pan ukna buluh Min Aung Hlaing, Belarus, North Korean te khawng bek om ahih manin Russia gam pen leitungbup gam khempeuh tawh akigal hi phot ahi hi.

6. U.S State Department in American gammi kua mah Russia gam ah va pai loh ding leh Russia gam sung aom US gammi te amanlangin hong ciah nangin zani in taangko khia uh hi. Ukraine tawh buaina hangin Russia thu nei ten U.S citizen khempeuh encik uh ahih manin alahuai dinmun hi ci uh hi.

7. Russia gam ah airline gol pen ahi Aeroflot airline in International flights khempeuh khawl bawl phot aa, Belarus gam flight bek hong hi ci in Russia state media in taangko khia hi.

8. Anih veina Russia leh Ukraine palai te kimuhkhopna pan mipi te gal kidona mun pan apaikhiat nop uh leh pai khiat theih ding cih thukimna om mah ta leh Russia te in tua thukimna zui loin hong sim sim uh aa, Volnovakha and Mariupol pan mipi te pusak theilo hi ci in Ukraine kumpi thu nei ten genkhia uh hi.

9. NATO ten Ukraine ii van lam teng ah no-fly zone bawl ding thukim zolo uh ahih manin Russia te in nuclear plants te buluh zo uh hi ci in Ukraine’s Defense Minister Oleksiy Reznikov in mawhsak hi. Ahi zongin Ukraine gam pen NATO kipawlna sungah lut lo uh ahih manin no-fly zone bawl ding ahi theilo hi ci in genkhia uh hi.

10. Russia galkap ten Ukraine ii mun thupi khempeuh bomb tawh suk khia khin uh aa, mun tampi zong buluh zo uh hi mah ta leh Ukraine galkap te leh mipi defense force ten gam ahih theih zah ciang I dal zo lai hi ci in Ukraine’s Defense Minister Oleksiy Reznikov in genkhia hi.

Abeisa hun in Russia te in Ukraine sung alut ma un Ukraine ii defense system teng, venleng akoih na teng khempeuh bomb tawh kaap khawm khin ahih manin Ukraine ten van lam tawh sim kik thei nawnlo uh ci uh hi. Tua teng asuk siat khit zawh dik dek ciang Russian galkap te lei lam pan hong lut pan uh hi ci uh hi.

11. Russia te in Ukraine gambup electric mei piakna Zaporizhzhia nuclear power plant pi kaap uh ahih manin Power Plant meikang in nuclear radiation pusuak khiat ding kipatau mahmah hi. Ahi zongin nuclear radiation level pen pongman (normal) hi ci in thu nei lam ten taangko khia uh hi.

More: Pu Biden impeachment tawh thu kibawl kik

UN thukhun sungah gamkhat peuh peuh ii nuclear power plant te susia loding cih thukimna kinei aa, Russia in thukhunte zuih lo hi ci uh hi.Tu in tua power plant pi pen Russia te khut sung tungta ci uh hi. Ref: The Epoch News, CNN breaking news, Twitter *** News Update zong LIVE tawh kikhah ding ahih manin kimu tek ni…. Thomas On Sian Mung (Thomas Mung Guite) Washington D.C March 06, 2022