Kuala Lumpur khuasung ah khutdawhngen in avak Rohingya naupang 11 kiman

Kuala Lumpur khuasung ah khutdawhngen in avak Rohingya naupang 11 kiman

Malaysia, Kuala Lumpur khuapi sungah khutdawhngen in avakvak Rohingya naupang mi 11 kimankhia cih theSun te’n pulakkhia uhhi. Tua naupangno te khutdawhngen in asawl, avaksak upakhin Rohingya Guardian zong mi 5 kimankhia hi.

Kuala Lumpur khuapisung muntuamtuam ah Rohingya naupangno te khutdawhngen in sawlkawikawi uh a, sum thalawhna, sumzonna in anei om ahih manin, tua khutdawhngen “Begging Syndicate” tepen Malaysia Police te’n abengkhia uh ahihi.

Tuabangin khutdawhngen in akivaksak Rohingya naupangno tepen kum 2 panin kum 16 kikal vive ahihi.

Hihvai tawh kisai in kumpi thunei ahi Bukit Aman Special Tactical Squad for Anti-Vice, Gambling and Gangsterism (STAGG) principal assistant director SAC Mohd Nadzri Hussain in agenkhiatna ah hihbangdan khutdawhngen in naupangno te kivaksak cih kiza ahih manin, nungkum November khapan in aki encik cihi.

Tuabang in khutdawhngen dingin avaksak asawlkhiat upakhin akiman tepen pasal khatleh numei 4 ahihi. Rohingya naupangno tepen Tissue thohneuneu pawlkhat cihbang, Quran Muslim biaknalai akigelh laithemkhat cihbang tawisak in, KLCC leh Bukit Bintang kuamsung tengah khutdawhngen in vaksak kawikawi uhhi.

Tuabang in khutdawhngen naupangno leh asawlkhia Guardian tepen Ampang vengsung aom Apartment khatah omkhawm uhhi. Nitaklam 7pm panin 11pm cihbang sumzongding in akem Guardian te’n kuankhiatpih uh a, khuasung ah Bus tawh tuanpih uhhi.

Khuasung mipi atam phadiakna atun uhciangin munkhattek ah khahkhia uh a, sumnget kipansak uhhi. Asawl akem te’n tua naupangno tepen agamla munkhatpeuh panin gal etin cinbawl uhhi.

Tua naupangno tepen sum angetziading leh kuate tungah ngending cihzong hoihtak aki hilhkholsa uh ahihi. Adiakdiak in gamdangmi Tourist te tungah sumngending in kisawl uh a, Tourist te’n ahehpihtheih nading leh aphawkkhak nadingin apuanthem kaihsakding cihbangin kihilhkhol uhhi.

Tuabangin khutdawhngen in khuasung ah avak Rohingya naupangno te’n nikhatin RM80 panin RM90 bang ngahthei uhhi.

Tuabangin sumngen in avakvak tepen Police Team te’n encik uh a, avek un amankhiata ahihi. Tua amatkhiatna ah UNHCR Card 9, Handphone 8, Quran Verse akigelh laidalneu 32, Tissue Packet 20, RM532 cihbang mankhia uhhi.

More: Rohingya pasal khatin numeino kum 7 aphapan khat guksawm

Tua akiman Rohingya tepen “Section 14 of the Anti-Trafficking in Persons and Anti- Smuggling of Migrants 2007 (Atipsom)” leh “Section 6(1) of the Immigration Act 1959/63” cih thukhun nam 2 tawh kizui in thu kibawlding cih kiza hi. Sawltak #zomidaily