Thai numei khat ata asuahkhiat khitciang in inndawl 17 panin lawnkhia

Thai numei khat ata asuahkhiat khitciang in inndawl 17 panin lawnkhia

Thailand ah numei khatin agilsung panin amata tektek asuahkhiat khitphet in, inndawl 17th Floor panin lonkhiasuk cimawk hi. Tua Thai numeinu minpen Netchanok Nokyungtong kici a, kum 20 aphakhin khat ahihi.

Thai Police te tungah agenkhiatna ah tua numeinu pen pasal zi neikhinsa khattawh aki ngai cihi. Tua aki ngaihpih “Boyfriend” pen kum 40 aphakhin khat hi a, hih numeinu naupaai cih atheih ciangin nusiaziau in, South Korea gamah ciahsan cihi.

Tua numeinu zong Thailand, Pattaya khuasung aom Condo innsang mahmahsung khatah aom hi a, abeisa Tuesday ni in aomna innsung ah nausuak cihi.

Ata asuahkhiat khitciang in Plastic Bag sungkhat ah tuamcip in, lupna Bedroom gei aom tawlet “Window” panin lawnkhiasuk cimawk hi.

Hihthu akitheih ciangin Police te thusit uh a, amahgiat inzong kata pen asuahkhit ciangin Plastic tawh tuamcip in inntung panin ka lawnkhiasuk mahhi ci’n genkhia hi. Tuaban ah Police te’n alotkhiatna amuntektek zong laksak uh a, Photo tawh Record bawl uhhi. Atung a Photo pen Netchanok Nokyungtong in ata asuahkhiat khitciangin alotkhiatna Bedroom Window alah laitak ahihi.

Inndawl 4th Floor aom avengte khatin Police te tungah agenkhiatna ah ka Window nawksuk in vangolpian khat akiasuk kamukha cihi. Nitaklam 5pm hunpawl hi a, amahzong innnuai ah kumsuk in a etleh naupangno pasalno asuakcil khat inntung panin aki khiasuk ahihlam mukha ahih manin, patau mahmah cihi.

Tuaciang in amanlang in Police te kisampah a, tua naupangpen naknawnlo cihi. Police Officers te’n amanlang in CCTV te sitpah uh a, asawtlo in tua alawnkhia numeinu pen mankhia theipah uhhi.

Tua numeinu genkhiatna ah amahpen South Korea gammi khattawh aki ngai in aki thuahthuah uh hi a, ahi zongin naupaai cih alawmpa’n atheih ciangin South Korea aom a innkuanpih te kiangah ciahsan cihi.

Tua kawmkal ah lametlohpi in aomna innsung ah anaupen suakkhiavat in, amanzong Window panin ka lotkhiat ahihi ci’n genkhia hi.

Police Colonel Apichai Khemphet in agenkhiatna ah numeinu in atapen kathah hi ci’n genkhiakhin ahih manin, Evidence teng ki kaikhawm in thu kibawlding cihi.

More: Thailand ah Myanmar pasal khatin azi mipi muhtang in temta tawh dawtlum

Palik thunei pa’n agenbehna ah hih gamtatna pen cikziat huai mahmah hi. Atapa pen asuahkhit in acidam sitset “Healthy Condition” ahihi. Numeinu pen hihbang in atapa athahlup hangin bangmah kisikna, khasiatna zong neihtuaklo hi cimawk hi. Sawltak #zomidaily