Rev. Pau Lian Mang (Mangno) Th.D zawh lungdam pihna

Rev. Pau Lian Mang (Mangno) Th.D zawh lungdam pihna

Rev. Pau Lian Mang (Sia Mangno) in Doctor of Theology Program asinna Divinity School of Chung Chi College, The Chinese University of Hong Kong pan in August 25, 2014 ni in Th.D nuam takin zota cih lungdam thu kiza hi. Siapa gualzawhna, a lungdampih leh a muakdingin Sianu Ngai Dim Niang, Myanmar pan in Hong Kong va zin thei ahih man in, Siapa lungdamna ki behlap, ki suangsawn ahihna thu ki zakbeh hi.

August 28, 2014 ni in Hong Kong pan in Yangon, Myanmar zuan in Sianu leh Siapate ciahta ding cihthu kiza hi. Rev. Dr. Pau Lian Mang (B.A., M.Div., Dip. ELTM, M.Th., Th.D) pen Tedim Christian College, Yangon ah Lecturer asemsa hi a, anasepna zom kik ding cih thu zong kizak beh lai hi.

Siapa Mimal in Kamuhzia Pawlkhat

Yangon MIT, Insein ah M.Div. sinding kapai ciangin MIT compound sungah Zomi siamsinte sungpan kamuh masak pen ahi hi. A kamtam zuahzuahlo ahihman in, khatvei, nihvei kimuh pakin, maingap ding hamsa kasa hi. Kampau lamsangin, nasep lam (khutlamsang) a tamzat zaw mi khat hi ci in kaciamteh hi. A kamtam zuahzuahlo ahihman in, maingap pakding ahsaksa hibek a, a lungsim picing, navak, mi kuhkal leh, mi nunnem khat ahihman in, a tawntunga lawmding, pawlpih ding, belhding muantak mihoih khat in kaciamteh hi.

Biakna vai leh Zomi Advanced Biblical and Theological Study Series (ZABATSS) member khat kahihna hangin Siapa tawh kimai ngaptheihna ding lampi hong oma, hampha ka kisa hi. Pil leh ciim thuah khawmin, laisiam bek hilo in, thu geel, thu vaihawm siam in, nasep matun mahmah khat in kamu hi.

Nungkum zekmah in, a sungpa Rev. Pau Suan Kam in Hong Kong pan in Th.D hongngah a, tu in Tedim Theological College, Tedim ah Principal sem hi. Tukum 2014 in a sungpa mah ahi, Rev. Nang Sawm Piangin Singapore pan in Th.D ngah a, Tedim Christian College, Yangon ah Principal mah sem hi. Tu in Sia Mangno in Th.D hong ngah ciangin, Pa Hang Khan Lian (Pa Lian Singapore) kammal a kawm hileng, hite unau, sungta, putu tenign PILNA a tawmmat lai a, na leikha uh hi ngel ding hi.

Sia Mangno, na gualzawhna hangin kong lungdampih a, nang bang mipil Zomite’n kong neihkhak uh hampha ka kisa uh hi. Lungdam angtanpihna tawh, C. S. Khai (Universität Hamburg, Hamburg, Germany) We all come into the world but once; If there is anything I can do for my fellow creatures, let me do it now; Let me not defer nor delay, for I shall not come this way again.