USA, Tulsa pan Rev. Kap Khan Mang (Tuimui, Hatlang) in hongnusia

USA, Tulsa pan Rev. Kap Khan Mang (Tuimui, Hatlang) in hongnusia

Mangpha Rev.Kap Khan Mang @ Sia Kap Mang (Kum 62) Hatlang Beh – Zogam Tuimui ah asuak USA gam Oklahoma State,Tulsa khua ateng (ZBCM of Tulsa) pawlpi kem Rev.Kap Khan Mang @ Sia Kap Mang in abeisa July 16,2020 in kalnat na leh COVID-19 natna tawh hongnusia chih thu iziak man in ZIUSA kipawlna mintawh dahpihna i pulak hi.

Sia Kap Mang pen Pasian lam honsakna tawh 1997 in USA a tung ahi a Sia Pa pen ZIUSA-EC Member Term nih 2010 to 2014 lenngei leh Music lam lakidemna Idol Committee-te ah Makai ma apang den khat zong ahihi, Sia Pa Zomite kipawl khopna Zomi Innkuan Oklahoma ah member khat leh ZIUSA Genvai member onglut thukhun pom ni 10/31/2016 akipan tunidong thukhun pom active member khat ahih manin bylaw thukhun zuiin (100%) Death Benefit $15,000 kipiakhia dinga paakkual $150 man khattawh zong mangpha khakna kinei ding hi.

Sia Kap Mang luanghawm tawh anunungpen hunzatkhop ding hong tungding Monday July 27 , 2020 11:00am hun in Memorial Park Cemetery,5111 S.Memorial Drive Tulsa,OK 74145 ah (ZBCM of Tulsa) pawlpi makaih na tawh hunbawlna neihkhit ciang,aluanghawm lei sung ah tuh na kinei ding hi.

Sia Kap Mang hong nusiatna hanga adahakap azi atanu tapa te leh alungleng khuangai tanau meltheih khem peuh hehnemsiampa Kha Siangtho in alamdangin hong hehnem ciatta hen Dahpihna Lianpitawh, Mun Mang (Genvai tanupi – Zomi Innkuan USA, Inc.)

Sia Kap Mang kaphawkna

2016 kum May kha sung Tulsa khuapi a St. John zato ah zato lum in ka thanem mahmah laitak nitak khat hong hawh in: “Lung himawh kei o si mahmah kei ni cei. US pen cidamna lam ah khamuan huai mahmah hi ei. Kei bang 3 vei bang asikhin hi’ng. US ahih man a atho kikkik hi’ng” ci’n tha hongpia hi.

Tua nitak pen midang lah omlo. Ko gel bek hi in Tonzang lam leh khua lam nuntakzia peuh ka sutsut uh a nuam kasa mahmah uh hi. Nurse te khawng hong pai teh ki ciamnuih in kanui zuaizuai uh hi.

Zato pan katuah ciang in zong huhngetna ding laite akisam bang in hong bawlpih in recommendation letter khawng zong a pawlpi letterhead ngiat tawh hong bawlsak hi. Khatvei Pu Gin Kam Lian tawh kava kikhop uh leh ka nih un thu hong gensak a lovegift $100 hongpia lailai hi.

Ken bel “Bethsaida Bual” la kazak cil pek a kipan Sia Kap Mang pakta in ka zahtak mahmah hi. Ih it mahmah a ih phal nai hetkei tazong in amah ait, ana asepsak Tawntung Pasian in samta ahih man in lungzuang khuangai tak in ih om tek hi. Phawk Mahmah Hang, Mung Laan Thang (Tonzang, Zogam)

U KAP AW

“NUNTAK KIKNA” kici series khat ka neih zawh nadingin nong vaihawmpih hi. 1991 kum pek hi a, tu-in tangthu hong hita hi. 1996 kumin KHITUI GOSPEL “LAINATNA AW” kici series khat neih zawh nadingin thu leh la tawh nong makaih leuleu hi.

Lai Siangtho sinna neilopi-in Pasian nasem khat ka hih theih nadingin “Pasian thugen dingin ka muang hi” cihna lai nong pia hi. Tonzang Township Baptist General Secretary nasep laitak ahih manin tua lai in thunei mahmah hi.

Mandalay ah nasep lai, USA na paikuanin na haksatna nong gen a, khitui taak kauhkauhin thu i ngen khawm hi. 2016 kumin na tenna inn ah lungdamkohna leh ngaih sagawh ankuang luina kong nei a, Zola nong phuah uh ngaih mahmah hi.

SIANMANG’ HAWMTEL tangthubu Tulsa ZBCM biakinn ah nang mahmah in Topa tungah nong apsak ngiat hi. Min siatna, paubanna om loin tai kidemna kung dongin na taisuak zo a, Pa kiangah na tawldam ta hi. Kong phawkphawk ding uh hi. Sia Do Khup

Rev. Dr. Pum Za Thang pulakna

Sia Kap Mang aw, Kha na kiak simthu kana zak ciang’n ka lungtang sung gu bang hon zen in khakham vei lawh dektak ingh! Huhpa Khasiangtho in na kawi cimloh Rose Lam Cing leh momno nih gel Andrew Lal & Robert Ling te a hehnep na dingin thu ka ngen hi.

Ma bang na pat a, na huaisa ZBCM Tulsa pawlpite zong Topa Pasian in Mosi sih nunga giautau lo a Jordan lui kan tana Gamciam (promise land) a lut uh bang in Van laukha siangtho meipi leh mei kuang in api bang in pi hen cih zong ka thungetna ahi.

Ka phawk tawn tungte: Na gang Ginhau inn Tipaimukh Road Lamka a ithunget lai, BBBC&S Bangalore apat FEBA studio a i la khum( Zogam gia bang zun ding) cih isak laite, Zomi Officer pu Jelshyam itna leh na lainatna tawh sisan thawl khat na hop nung a na ankam lim dan, CCOC lai a Southern Chin State a missionaries khang no te sih lauhuaina muna a nava hotkhiat dan leh ZBCM Tulsa na phuh ma a ZCF Tulsa a na thu gen,” Pasian in pawtham enlou in lungtang a enn” na cihte ka lungsung ah hong kilo vat e lawm! Na lawm it mahmah Rev. Dr.Thawng Khan Cin Taithul tawh a ton khawm dektak hi uh ciai. Na ma sot ding limci in thupi hi. Van khawpi tualnuam ah lung heilo in sawl bang na hei ngel ngel ta un maw. Hallelujah, Amen! By Rev. Dr. Pum Za Thang Tombing

More: Covid-19 buaina hong ven ciang’n…. ~ Bob Tuangpi

The number of COVID-19 cases has risen to more than 13 million around the world. While these numbers are staggering, they are also deeply personal to each person who has lost a loved one, serves on the frontlines of care, or is battling the disease themselves.

Today we are sad to share that another Baptist leader has passed away as a result of the coronavirus. Rev. Kap Khan of Tulsa, Oklahoma, helped found the Zomi Baptist Church of America (ZBCA) and served as a Vice President within the convention. Would you join us in prayer today for his family, the ZBCA, the broader Myanmar Baptist family and the many around the world who continue to be impacted by this global pandemic? Baptist World Alliance