Rev.Dr.Hre Kio tawh kimuhna vai gentelna

Rev.Dr.Hre Kio tawh kimuhna vai gentelna

Guai,
Hih vai tawh kisai in Dr.Dongno in Apr.21 ni in hong dotna leh May
11 ni in Dr.Dam Khua Nang ii meeting kah a thupulakna tawh kisai in a
ban a zomte in a telcianlo leh pulakdan kitelkhial sak thei dan
dingin omsa kahih manin kei theihkhakna ciang a tel in kong pulak nuam
hi.

1.Ei Zomibup (Chin) sungah group atuamtuamte kimuhkhialhna,
kimuanlohnate om gige ahihman in maitang kimu in kigen siangna leh
Zomi bup mailam ah kisangkhial nonlo in mapankhop huaite ah mapankhop
theihna ding ngimna in 2010 September 28-29 ni in Tulsa khuapi, USA ah
Hakha lam pan makaipi, Senior Pastor & Bible Consultant, Dr, Hre Kio,
US ah Zomi Inkuan makaite Dr.Cin Do Kham (President). Pa Go Sawm Khup
(Secretary), Pa Vung Lian Mang, Pa Khup Khan Thang, Dr. Kham Khan Khai
te leh Kawlgam pan Tedim Kipawlna makaite tawh upa mi (9) in
kimuhkhopna kinei hi.28 nitak in Rev, Kham Khan Khai innteeksak in a
zum khan ah meeting kinei hi. 29 zingsang in IHOP restaurant ah Dr.Do
Kham in zingan hong vak in meeting kipeh hi.

Dr. Hre Kio in Biakna sem makaite kipumkhat theih nading apat masak
Biakna Siate Meeting Washington DC ah 2007 kum, 2010 Feb. in Bangkok
ah asapna ah a ma lam-etzah in kipai lo ci hi. 2010 Nov,24 -28 in
GCCF min tawh Malaysia ah sam kik ing ci hi. Working Concept Paper
zong hong lak in mailam ading Zomite aading ngimna thu thum
(Education, Evangelism leh Community Development) te hong pulak hi.
Dotna a om mah bangin Common Language ah Hakha (Lai) pau UN ah a
puakloh vai uh leh ,CNF tawh akipawl loh vai hong tel gen hi. Ei
Zomite “Diversity in Worship, Unity in Mission” in pai ding, Zomite in
Karente nung ah Pasian in kong hong honsakna tawh mailam ah
thukhualna leh kithutuah zawk nading muhsiamna tawh kilemkik zawh
nading akuamah tek in hanciam ding cih leh tangzai muhna tawh
kipumkhat a i ki thutuah kei ngeingei leh ei Zomi bup in na lian sem
zolo in donghtuak kha thei ding hihang cih kiphawk in tu a khat vei
kimuhna mah bangin mailam ah kikup zeelzeel ding leh zop tohtoh ding
kithukim hi.
Tua Meeting thu tangko khiatna Sia Khaipi in mikim theih dingin
kikhahkhia pah hi.

2. A nih veina Zomi Biakna Makai te mi (15) in 2013 December 3 ni in
Yangon MBC zumpi ah kimu in ei Zomi Biakna Makai upa (14) in tua
akikupna uh thukhensatte X’mas Message in bawl in Zomite kipumkhat leh
kithutuah nading in a maan(group photo) leh Signature uh tawh
zanggam/mualtung ateeng Zomi khempeuh teng theih ding,thungetna tawh
mapan khop nading cial in Kawllai tawh in “Partnership in Mission’ ci
in December ni 4 ni in hong hawm khia uh hi. Kipumkhat theih nading
mapanna lianpi hi.

3. 2014 October 4 akipan in Dr. Hre Kio in “A Meeting of Chin Leaders
, Feb.10-11, 2015 for Peace and Reconciliation in Kalaymyo” ci-in
Archbishop Nicholas Mang Thang, Dr, Yam Kho Pau, Dr. Aung Mang and
Rev. Dr. Stephen Hre Kio te makaihna tawh Meeting Concept Document
hoihtak in geel in 3 pages dim in hong khak hi.Hih vai ah Political
leaders and Religious Leaders, te kithutuahna tawh mailam kalsuan khop
ding a kisapna, peace & reconciliation seploh phamawh ahihna,
cause/causes of our misunderstanding, difficulties and even
hostilities leh mawh kimaisakna ding steps dong in akim in hong khak
hi. Tedim lam pan akisam pelmawhteng zong sap ding hong gen hi. CNF
Pu Cin Sian Thang, GZA Makai Dr. S.Pau Khan En, Tedim Association OB
teng, Tedim Town Elders teng zong a thu ala kimtak in kazasak sawn pah
hi. A nai. a gamla a om eimi upa khat leh nih zong athu kakuppih
hi.CNF Secretary pa tawh akilaikhak uah “Reconciliation, Peace and
Stability” vai vaan nading ahun hoih pen hun ahihna leh amah (Dr. Hre
Kio) ii opening speech ding ahi “Sharing My Conviction” cih nangawn
dong leh Meeting ah a sap mi (43) lists zong hong khak hi. Ama aituam
in a sapna lai hong khak ciat banah ei Tedim /Tonzang Townships pan
Rev. Dr. Simon Pau Khan En, Bishop Felix Lian Khen Thang, Rev. Khoi
Lam Thang, Rev, Dr. Yam Kho Pau, Dr. Khup Thang, Dr. Thang Kho Lun te
zong asam tuam hi.
Tutung a amisap pen Hakha, Falam, Tedim/Tonzang leh CNF te ahi hi.
Southern lamte hello hi.

Hizahta in u lian teng kimu ding ahihman in a pai thei ding kakiseh uh
hi. Dr. Enno in bel March kha in Kawlpi ah Meeting kahloh pelmawh om
in tutung kong pai thei kei ding ci hi. Agenda ah hong khak bangin
thugen ding a kei hong seh uh “What we want to achieve” paukhialh omlo
ding in laidal in kakiging phit phet hi.

Ahizong in Feb.3 ni in a Program, hong gualhthakna ah Criteria 3 ong
guang hi, (1) We would not allow any words or statements negative to
or infringing upon the common unanimous resolution or declarations
made by the delegates in that Chin National Conference in November
2013, cih leh thukikupnate ah tua thukimna siksan in kikum ding hong
cihlian ciang in tua thukimna lai leh athu mu kha ngeilo kahih manin
leh reconciliation vai bangmah hong guan nonloh ciangin atung a
kilam-etna tawh kikak tuak ahihman in meeting ah kihel lohding hoih
zaw kasa hi. Kei misap sawnteng zong kakho kik pah hi. Unable to
attend the meeting ci in Feb.6, 2015 ni in ka sanzawhlohna criteria
te pulak in thu kazasak kik hi.

Dr, Dam Khua Nang pen invited persons sung ah kihel khalo ahihman in
athu a la abul a bal in telcian khollo thei mah ding hi. Ama cih
bangin “akikausiphum” a kah hi. A thu pulakte sialo hi.

4. Dr.S. Hre Kio in a lam-et bangin lawhcing kisalo hiam a lung nuamlo
ahih manin Yangon ah kimuh kik ding hong vaihawm in Dr.Enno leh Sia
Khoi Lam te a vaihawmsak man in March 25 ni in TBCY ah mi (14) akihel
hi ung. Dr, Cope Suan pau leh Dr. Mang Do Thang in pulak khin zo hi.
Tua ni in Dr, Hre Kio in thukawng aheina ka phul pah a keima khialhna
hi ci-in hong pulak khia ahihman kalung anuam zaw deuh hi. CNF tawh
kipawllo hing nacih hangin na ipsung ah aguang hiteh kacih leh abil
san hi.

Atom a etna:
1. Dr. Hre Kio pen University kah lai in Christian Student Centre ah
makaipi, Falam ah kasep lai in ka Church Pastor, ei Zomi sung ah
Biakna lam International dong ah a sang pen za dong asem leh a zahtak
huai pen amadawk pen khat hi. Min siat puamsiat neilo in azia atong
dong in ithuai hi. Tedim, Falam, Hakha leh Kalaymyo ah English for the
21st Century ci in kum tampi Manglai sinna ding a vaihawm pa hi. Zogam
Zolei ading thupha abawl nuam mahmah khat hi.Pastor teng gawm tuahtuah
masa den hi. Leitung ci leh sa tawh kidim veve ahihman sikinaina
hangin a deihna hoih pan hoi kha thei zel mah ding hi.
2.Zomi pawltuamtuam leh min kilawhna adangdang nei ihih manin i
thumuhzia akibang denlo mah ding hi. Ahizongin akibatlohnate hangin
kigal bawl pah ding hi zenzen lo kasa hi.
3.. Iki thutuahlohna te ah maitang kisituah in thu kikup ngiamngiam
pen pasal vai, pisal vai, picin vai leh upat vai hi kasa zaw hi. Kikum
tatak lehang kithutuah theih kikna om thei tham ding hi cih kamuang
hi.
4. Kawlgam ah milip in 52 millions sung ah ei Zomi (Chin a hong
kiciamteh photte) i vekpi gawm in Sang nga val mialmial bek ihi hi.
Mailam ah i dinkhop loh a phamawhna mun, thu lehla leh a hun zong
hong om ding hi. Akikhensuak zengzang lehang mi nopnehna i ngah tham
tatak dinghi.
5.Upa cingteng leh ami asa in kitheite ihih manin kikum kikkik lehang
kithutuah nading hong om lel ding hi. Picing tak in kihosiam ding,
kigen siam ding, kipahtak siam ding hi kasa zaw hi. Khat leh khat
ki-eu se ding haivai kasa hi.
6. Biakna, politics, societal leaders te picing tak leh pilvangtakin
kithutuah theih theih nading hanciam ding hi.
7. Adiakdiak in ei Zomite sung pan in a thei, amute in mipi vai ah
mapanna lak ding leh a nungzui ding kiseh diudeu ding hunta hi.
Tutung in Zomi akuamah peuh ading vaihawm khop leh siam nading chance
hoih mahmah pen khat kisum kha in ka tuat hi.

Zomite kitheihsiam, mapan lak siam leh kipahtak siamna tawh Topa in
hong masawnsak den tahen!

C.Thang Za Tuan, TA