“Refugee Council of Australia” makaite tawh ki muhna

“Refugee Council of Australia” makaite tawh ki muhna

Refugee Council of Australia makaite sapna tawh ni 14/11/17 Tuesday ni nitak nai 6:00pm-8:30pm in Brisbane Multicultural Centre a, MDA(Multicultural Development Australia) te Meeting room No.1 na-ah nuamtak in Meeting ka va kihel thei hi. Hun mantak in kipan a, hunuk pen Sydney a,Refugee Council zum a nasem,lutuamte numei khat Shukafa ahi hi.

Khat le khat maitang ki pulakna ka neihkhit uhteh Sydney a Zumpi Refugee Council a makai Paul Power in mailam Refugeete din mun Australia kumpi te’n bang hong cih sak leh hoihding hiam, tulaitak innkuanpih file sunga omte Australia kumpi in lakdingin masak phot hi. Khasim in zong Caberra ah gamuk makaite tawh Meeting neiden ung. Maikum ah Refugee thukhun tawh kisai UN leh gamuk kumpi pawlkhat in International Advocacy tawh kisai pawlkhat khelna neinuam uh a, June khateh UN Zumpi Geneva ah Meeting omin tua hun ah kahding ka hih manin bangteng pulakleng hoihding hiam? cih bang dan thu pawlkhat dotna Meeting kahteng kiangah hong nei masa hi.

Meeting pen Queensland State sunga Community tuamtuam pan-a, makai pawlkhat leh Refugee tading a nasem pawlkhat asap uh hi-in, Brisbane panin makai mi 30 kim ki helthei-in Rockhampton leh Cairns panin makai honkhat online pan Meeting hong kah uh hi.

Ko kianga, Ramese kici papi hampian khat in Refugee cih pen leitung piancil pan a, aom pah hisamlo in gam-uk pawlkhat leh veto power neite sum bawlna hang hi. Refugee te ka en uh hi, sum le pai tawh ka huh uh hi, ci-in limtak zong hong enlopi, awngawng laidep uh in amau galbawl kei leh Refugee omlo ding hi. Bang hanga leitungah Refugee tamtektek mawk hiam?

Bang hangin Syria, Iran, Iraq leh Africa gam pawlkhat buai in Refugee tamtektek mawk hiam? cih pen mipi in kitel mahmahta hi, Refugee aom nawn loh nading in buaina bawl veto power neite khawlta uh hen, tua dingin International Advocate te leh International Peace maker te’n a policy uh khek uh hen ci-in hong gengiap leh makaite pawlkhat bang a hahdan leh a maipuak uh hong ki lamdang liang mawk hi.

Tualaitak ka lungsimsungah Pu. Thang Khan Lian thusuah ngeikhat ka phawkvat hi. Pu. Thang Khan Lian pen tulaitak Social Media lam ah a hatmahmah leh a laigelhte kician kasak mahmah khat hi-a, ama thusuah ka phawk vat pen tuathu asuah laitak in mipawlkhat in US pumguplua uh a hiam or thuman atel loh man uh hiam, thusuahpa mawhsak uh hi.

Ahi zongin a thuakkha gam mite mahmah in amau kam mahmah pan’ leitungah gal bawlbawl veto power neite hi, acih mawkteh kician mahmah a, Zomite khat le khat ki mawk nialnial kul nawnlo a hihlam hong phawksak hi. A paikhempeuh in thu ki gennuam tek a, ahi zongin hun pen nainih kimbek ahih manin mikim in kingah khalo hi. Tuaci bang kawmkal ah Refuge Council a makai Paul Power deihsakna tawh huntawm khat ka ngahkha a, kei zong thunih ka gen hi.

1. Den a, sanggam pa’n Refugee pen natural hilo a, unnatural hi, acih mah bangin Kawlgam pan Refugee hong pianna Kumpite hong ukdan ahoih loh man hina pi’n bang hangin tuni tan UN in thuhilhna kician neinailo mawk uh hiam? Nungdeuh in Rohingyate buaina lah thukan dingin Kofi Annan bang sawlta leuleu, tuate buaima kumtampilai in Karen leh Kachin mi te’ buaina nasia mahmah in galtai tul tampi tak Thailand kim ah om napi-in bang hangin UN makai te’n Rohingya te alung himawh bangun lung himawhlo mawk uh hiam? Mailam ah UN leh International Advocate te’n Kawlgamsung aom mite haksatna aki bangin enta uh hen.

2. Delhi aom Zomi Refugeete leh Burmese Refugee te’n tualsung mite bawlsiatna deidanna tampi tuak den uh hi. Tua ban-ah Australia a tungsa pawlkhat te’n zong, tulaitak Australia kumpi focus family re-union tawh kisai Delhi aom a innkuanpihte uh sam uh hi. Ahi zongin FRRO Zum a nasem te’n mi pawlkhat recommendation pianuamlo mawk uh ahih manun hong lengthei nailo uh hi. Tua ahih manin Delhi aom Zomi Refugeete leh Burmese Refugeete mailamding pen Refugee Council makaite leh UN te’n ahoih thei penin hong panpihlai a, bangci leh tuaci bang, a haksatnate uh pan suakta theiding uh hiam, cih hong ngaihsutpihlai un ci-in ka thugen ka hialbawl hi.

Hun manteh Paul Power tawh tawm ka holimkha uha, Delhi aom Zomi Refugeete leh Burmese Refugeete haksatna nong gen ka zakcilna hi-in ka lungdam mahmah hi. Mailam ah zong, hong zasakzel in ci-in a business card khat hong pia-in maankhawng ka kizaih khit uhteh hicibang ki muhkhop nading nong vaihawm uh lungdam mahmah ung, ci-in ka kikhen uh hi. Sydney pan a hong tonpih Karen te papi John Roc a kici khat om a, amah pen Refugee Council of Australia ah Board member in apang hi-in Education Coordinator sem hi.

Tua pa zong hun manteh ka kiang hong pai in Kawlpau tawh tawm kiho in na thugen hoihsa mahmah ing, Zomi leh Chin kikoi cih lamdan hiam, cih hong dong a, Chin cih bel State min hi-a, 1970 khit in Kawlgam ah Chin State min hong ompan hi. Khat leuleu ah Chin Hills cih min khat om leuleu a, gamkek British te hong tunkhitteh hong piang min hi.

Hih Chin min pen minam dangte hong sapna hi-in Chin State ah ko le ko Chin a kici asung ateng mite’n ka tangthu uh kakan uhteh, ka ngeina late uh kasut uhteh Chin cih kammal khat zong omlo mawk ahih manin Zomi a kici hi ung, ka cih leh thupi ei, thu kiza zel ni ci-in ka phone nambat leh a Email a ID hong ngen a, ka pia hi.

Pasian in zong I mawhna I khialhnate I pulakteh I kisikteh hong maisak in thupha hong pia ahih mah bangin mailam ah zong, Zomi te’n I hihna leh I thuaknate zumpih mawklo in ahun leh amun tawh kizui in pulaklakleng, Kawl kumpi te’n kagam uah Rohingya kici minam omngei kei, acih lanlan uh hang, tu-in UN leh leitungbup in lung himawhpi in neimawk uh ahih manun omlo hi, ci-a, a genteng mah in Rohingya mah ci-in gengenta uh a, leitung gam makai pawlkhatte maipha munuam uh ahiam?

More: GZA makaithak tading in a ciinhuai Dr. Do Kham nasepzia pawlkhat ~ Khaibawi

Nidang a, a thusim hetloh uh tu-in Kawl ulian pawlkhat bang amun mahmah va enin vapha keta uh hi. Hih thu ah Zomi pawlkhat in zong lunghiang neise nawnlo in Zomi, Zogam mah na cici peuhleng, ahun a cinteh Zomi cih bang omngeikei hong citeng mah in Zomi himah uhciai, ci-in Zomite nasem in buai mahmah theiding hi. Khaibawi