Rakhine kipawlna pan All-D ngahte Pahtawina kipia

August 22, 2016(Mon)
Zanni(21/8/2016-Sun) nitak lam 1:00PM in Yangon a om Rakhine State Biakna Phualpi ah Rakhine National Federation te-in a mau minam sung pan 2016 kum a tansawm laihuanna ah All-D ngah teng pahtawina nei uh a, minam dang Kawl, Kachin, Kayah, Karen, Zomi(Chin), Mon, Shan te sung pan All-D ngah mi khatta zong sam uh hi.

Yangon Division, Rakhine Minamvai PM U Zaw Aye Maung in hun kipat thu gen a, tua khit ciangin Rakhine National Federation ah thudotpi U Mya Thein in pil tungtuang sang naupang te thapiakna a neih khit ciangin Thudotpi lakah khat mah ahi U Hla Kyaw Aung in hansuahna nei to leuleu hi. ( Lasak teci pang omlo bilbel ahih manin pha dawm lai).

Rakhine National Federation ah Lutangpi(president) U Soe Win in hih pawi hong piankhiatna leh pahtawina ki piakna a thu teng hong gen khit ciangin Rakhine minam All-D ngah mi (34), Kawlgam sung a minampi 7 sung pan teeltuam All-D ngah (6) leh Kawlgambup pan mat tampeen mi (3), a vekpi gawm(43) te pahtawi piakna nei uh hi.

PS: Hih pahtawina hun sungah Zomi(Chin) minam bup taangin Tg. Thang Hau Suum(s/o U Kham Suan Mung) hong piaksak uh ahih manin lungdamna lianpi I nei hi. Minam dangte khat ciangin Kyats 400000 leh trophy(lungdampihna hai) pia a, a mau minam te pen kipawlna tuamtuam, company tuamtuam leh sumhau te tung pan pahtawina tuamtuam pia ziahziah uh hi. Mailam ah Zomi te zong hanciam in minam dangte tungah itna a lak zo I suah zawh na ding leh I biak Pasian min a thangsak zo semsem I suah zawh na ding lunggulhna tawh hi lai kong suahkhia hi.

Suumpi
Ref: Rakhine National Federation fan page