Pyidawtha khua Zomite i kiteelna Vote piakna tawh kisai mimal muhna

Pyidawtha khua Zomite i kiteelna Vote piakna tawh kisai mimal muhna

Zogam khamtung khua (50) val pan kipem a akitenna ahi Pyidawtha khua pan in Zomite in Kawlgam Kiteelna 2015 ah Zomi minpua party ( ZCD) sangin Zomi minpua party in a belkipawlpihpi ahi NLD vote a pia atam zawkna tawh kisai in hoihsaklohna pulakna atamzawte i et ciangin i Zomi i itna leh i Zomipihte tenna khuapi khat ahi Pyidawtha i itna kilangsa ingh.

Zomite party tuamtuam ah kikhen lo in, party khat ah dinkhawm thei hi leng a lunggulh huai penpen leh a deih huai penpen thu hi mah leh tutung kiteelna ah dinkhat in dingkhawm zo nailo, khekhat khai khutkhatkhai in khaikhawm zo nailo i hihna kimu hi.

Hi bang dinmun i hihna tawh kizui in, Pyidawtha khua ateng Zomi Meepia atamzaw te in zong Mee hong pia un ci-a a ngen a pai Zomi makaite parties tuamtuam pan ahih man un a Zomipihte lak pan kua piazaw ding cih lungmanna a neihna uh ki mu thei hi.

Zomi minpua party ahi ZCD in mee ngen a a pai hun in Pyidawtha khuanu khuapa tampi in ZCD Mee piak ding in khensat zo uh ki ci hi.

Ahi zong in Kiteelhun nai mahmah ah NLD pan in kiteelna lut Zomi khat ahi Zomi kipawlnapi khat ahi Zomi National Council of Myanmar kipawlna Makaipipa Professor Pu Kam Za Mung leh Zomi lasiam pawlkhat in Mee ngen in na pai uh a, Zomi khat ahihna bulphuh in meetang a piaknang un na thuum ngaungau ki ci a, tua hang in NLD lam ah mee piak ding in atamzaw in khensat kik ki ci hi.

Mimal deihsakna ah, Sagaing Region Hluttaw a ding kidemna ah ZCD kidemlo ahih man in ZCD belpawlpih NLD pan in a kidem Zomipih Professor Pu Kam Za Mung Mee piak khit hamtang huai mah hi-a, ahi zong ZCD kidemnamun ahi Pyitut Hluttaw leh Chin Tharyintha Vuanzi munte ah ZCD piak huai mahmah thu ahihi.

Pyidawtha Zomite in ZCD sangin NLD mee a pia atam zawkna anuai-a bangin Pyidawtha khua a om Pastor khat in anuai-a bangin mimal muhna nei hi:

• NLD kipakta lim lim (gam kikhel sak zo ding hih party bek in kimu)
• Khua a NLD makai te inn vak hat mah mah
• Zum pan thugen kusale te hong pai teh kiniamkhiatna kam pau. Gtn Siapi Kam Za Mung in ka Zomi pih te kiangah metang ngen in hong pai ing ci.kong ngen hici in thuum ngau ngau
• USDP te in ki thuneihsakna kam pau in metang hong zong
• ZCD in a diak diak in Pu En Khan Go in: nong muan kei uh leh kei sang na muan zawk uh pia un, kei a kingap sinsen hing ci mawk
• Ei khua pan ZCD makai te in lah nih leh thum inn lak ah a vak sam hang in NLD te vakna tawh kikhai lua.

Pyidawtha Zomite kamuhna:

• Zomi it uh hi. CPP pan in Mee ngen a pai CPP makaipi No Than Kap te pawl hawlkhia phial ki ci hi.
• Kawlgammi atamzaw ngaihsut bangin galkap ki ukna a khel zo ding NLD party tutung Mee piak masak phot ding in ngaihsun uh hi.
• Zomi makai tuak mee ngen a pai parties ahi ZCD leh NLD kikal kilamdanna mu zo lo uh hi.

o ZCD mee piakna pen ahuam in democracy vai ah belpawlkhawm ahih uh man in NLD mee piakna tawh a ki bang veve ahihna, ZCD mee piakna tawh Zomi movement picinna ding, federal ngahna ding mapanna ah tangzai zaw thei ding ahihna, Zomite siat leh siakhawm, hoih leh hoih khawm ding Zomite i hihna pomkim zo nailo kitam lai hi.

Thu Khupna:

Kei aa kipan in gamdangtung Pyidawtha khuami Zomi tampi tak in ZCD mee ngen aa apai khit ah ZCD in zo ding in ki lungmuang lua khial kha ki suak hi.

Mimal muhna ah, Pyidawtha Zomi atamzaw in ZCD mee piak loh pen khial kei ka ci kei a, a hi zong in Zomite parties tuamtuam ah i kikhen man in i Zomipihte lunghiang sak kawikawi a hih man in mawhsaknate zong hawm huai a, Pyidawtha Zomite bekbek mawhsak khit ding hilo ka sa hi.

Pyidawtha khuamite tungah NLD meepia atamna hangin mawhsakna a nei pawlkhat te mahmah zong NLD thapia kisa NLD rally ah innkuan a pai aa, photo tuamtuam ki la aa facebook te ah a suang te na ngawn in mawhsakna kammal kilawmlo zatna i neih ciang in itna sang in muhdahna leh thupaai lohna ki mu thei hi.

Khuabup in NLD meepia hilo uh a, khuamin tawh kimawhsak luat loh ding thupi kasa a, Kawlpi pan in ZCD belpawlpih Kawlgambup atamzaw pek i deihtel NLD mee piakna leh Tedim gam pan in galkap belpawlpih USDP meepiate tawh kibang a mawhsakna i neih pen itna sang in muhdahna leh thupaai lohna in ki mu thei hi.

Zogam khamtung khua (50) val pan kipem a akitenna ahi Pyidawtha khua ahih man in Zomi khat peuh in na kitaneu pih, na beh na phung uh, na khuapih lui uh khat leh nih hamtang tenna hi ding a hih man in Zomi akuama peuh in mawhsakna te pua khawm a, mawhsakna kammalte siam zawk ding in mimal muhna tung pan in hong thuum ingh. Mimal muhna pan… Zomi sungah, Pa Do Khan Khup