Ka muhpak US Gamthu pawlkhat – 47

Ka muhpak US Gamthu pawlkhat – 47

US Mivomte In Hampha Hong Sa Mahmah
Ka nasepna ah mivom papi ham pian khat tawh ka kithei kha uh a, a sawtsawt ciangin US a, a mau omdan teng ka kawi dotdot hi. Ama hong genna ah tuma kum za nih val lai pek, 1800 kim lamin ama pianna a pu sawnsawnte a kipanin sila dingin America a tung ahihi. Amau tun dan pen ei aa’ tawh teh theih ding bang hi lo in kibang kiuhkeuh lo hi.

A mau pen mikangte in sila sawltak tanghial ding a, Africca continent gam tuamtuam pan a laak ngiat uh ahihi. Africa pan a pai khiat zawh a kipan a mi a sate leh a gam a lei tawh kizopna om nawn lo ahih manin, a tun zawh a sawt lo in mi mangthang mah suak pah uh hi. Gam tuamtuam leh minam neu tuamtuam panin a laak khiat uh ahih manin, US tun ciangin kisuktuah theihna ding a haksat ban ah, sila bek mah ahih manin a sawt lo in amau khang mahmah ah, a ngeina leh a paute a zat hun ding om lo in maimang pah hi. Innkuan khat sung na ngawn ah a tunna uh kibang lo lai hi.

A tate khang uh cih thadah a mau khang na leng in a mau pau thei nawn lo zong om uhhi. Khang thumna ah a mau pau a thei om nawn kiuhkeuh lo hi. Tua hih manin US ah mivom a tam mahmah hangin a mau aituam pau lah nei lo, amau aituam ngeina lah nei lo in mangdan vive hong suak mawk ta hi. Mikang taktak lah hi ngeii lo a, mikang dan taktak vive a zat uh lah, a sawt teh amau mahmah in zong tha a ngah loh ban ah, a mau ngeina leh pau a tuam aa a neih loh uh teh, sila nam bek mah ahih taktak lam kilangh lua ahih manin, Zomi tampite galtai cih min vawh a, ei utthu tawh US tungte pen hampha hong sa mahmah uhhi.

Ei Kawlgam pan a gam beel a paite pen sila ding a hong laak hi lo hi. Ei mau min leh eimau minam min pua a gammi a suak thei ding a hong laak uh ahihi. Hun khat ciangin US gam mi suak peuh leng amau gamsung a, a teng masate’ mah tawh ih hamphatna kibang ciat ding ahihi.

Tua hi a, tua mivomte ii pianziate panin kikhualkholhna nei in, ih Zo ngeinate ih Zo pau te a maimang lohna dingin tu mahmah in ih kipat pah kul ding hi. Zo Lai Sim Bu bawl in lai gelh theih simtheihna ciang bek hilo in ih khanglui pau ciik mahmahte, ih paunak tuamtuamte, ih ngeina la a tuamtuamte leh a khiatnate, na dong a ih tel kim theihna dingin Zolai Sim Bu ih bawl mengmeng ding zong kisam mahmah hi. Zolai Sim Bu tan 10 ahih kei leh a tawm pen tan 7 – 8 ciang sim khop ding om mahmah ding hi.

(azom omlai hi…)

Agelh: Awn Za Pau