Kawlgam sungah neksathau atuh akibawl te kiman tading

Kawlgam sungah neksathau atuh akibawl te kiman tading

Kawlgam sungah neksathau “Cooking Oil” pen sumzonna in ahoihlo ‘atuh’ akibawl tampi om kici a, tuabangin “Fake Cooking Oils” azuakte aki theihkhiatleh March kha akipan kumpi in Legal Action latading hi ci’n “Union Minister for Planning and Finance” pan U Kyaw Win in genkhia cih MMTimes pan kiza hi.

Tuaban ah neksathau pawlkhat mipe thau “Peanut Oil” 100% hi ci’n akizuak om a, ahi zongin ataktakin adang sathau tawh kihelkhawm hi. Tuabang in mipi khemkei un. Adang mipe guak hilo in, adang sathau tawh akihel lehzong bangzah Percentage kihel cih sathaubung ii a Label tungah gelh hamtang un.

Hihpen thumanlohna hi. Gamsung mipi khempeuh cidamnading, lungmuan nading pen kumpi nasep ahih mannin, hihvai amanlang in ki semding hi ci’n U Kyaw Win in genkhia hi.

Neksathau abawlkhia, azuakkhia “Cooking oil producers and traders” tepen na thumanding uh kisam hi. Gamsung mipi te hoihtak na theihsakding uhzong kisam hi.

Myanmar Oil Millers Association panin Chair U Khin Soe inzong agenna ah neksathau pen adang atuamtuam tawh akigawm hangin Label tungah hoihtak ki gelhcian peuhleh phamawhlo hi. Ahi zongin mipe sathua “100% Pure Peanut Oils” guak hi, si sathau “100% Pure Sesame Oils” guak hi ci’n mipi akhemkhem te pen hongki maisak loding hi ci’n gen khia hi.

Kawlgam sungah Peanut Oil leh Sesame Oil abawlkhia Company tampitak in sathau dangtawh ahel uhhangin Label tungah 100% Pure Peanut Oil hi, 100% Pure Sesame Oil hi ci’n mipi hong khemkhem uhhi. Tuabang in agamtata teng kumpi in March kha akipan siansuanding cihthu kizata ahih manin, lungdamhuai hi. Mipi cidam nading inzong athupi mahmahkhat ahihi.

Minister U Kyaw Win in gamdang panin honglut akici neksathau tezong honglutna gam hoihtak Source aki gelhciankeileh lei kei un, ne kei un, zang kei un. Cidamna adingin lauhuai hi ci’n genbeh hi. ZD Sawltak #zomidaily