Pumpi ading tha om annekna

Pumpi ading tha om annekna

A kicing tha om annekna a thupina
Tha om annekna pen cidam nadingin a thupi pen leh a kisam pen a hihi. A cidam mi te in innkuannuam piangsak thei aa nuntakna sungah nuamsa uh hi. Pumpi a’ding a kicing tha om ante a kipia naupangte hoihtak in khang uh hi. Hoihtak cihciangin a pumpi gihna, a sauna te a kumzah tawh kituak cihna a hihi.

Cinatna tuakkha lo zawdeuh uh hi. Sangkahna ah laisiamzaw uh hi. A nuntak sungin sumbawlna ah siamzaw uhaa kumtam nungta zaw thei uh hi. A tate zongh a cidam zaw hi. Tua a hihmanin tha om annekna pen mikhempeuh tawh i kisai hi.

Tha neilo in i pianding a kilawm bang aa i pianlohna pen pumpi a’ding a kicing tha om ante i nekzawhlohna hang hiphadiak hi. Tua thu tawh kizom in cidamlohna, khuakpillohna, nasephoih neihzawhlohna leh sumlut hoih neihlohna te hong piangsak thei hi.

Thaneihlohna a piangsak thei nate

⦁ Cidamlohna in tha zawngkhalna piangsak thei aa thazawgnkhalna in zongh cinatna piangsak thei hi.

⦁ A kicing annek lohna, an hoihtak in kipiak lohna leh omdan khawldan leh kimlepam hoihtak puahlohna (siantholohna) te in cinatna hong piangsak thei hi.

(Hoihtak an kipia lo cihpen annek ding om gega napi naupang an ne theinailo te hoihtak piaklohna a gennopna a hihi. A mau le a mau an a netheilo te an hoihtak in a kipiak keileh an a huah mahmah hangin thazawngkhalna ngah veve ding cihna a hihi.)

A kicing tha om an a ne zolo te pianzia

Hih tha om ante a kicingin a ne zolo mite pianzia pen innkuansung, khuasung leh mikim in i theih ding thupi mahmah hi.

Naupangte in a kicing an a nekzawhloh man leh tha om an te a nek zawhloh manin pumpi khanna ah haksatna a tuak lam kimu thei hi. A kumtawh kituak lo in gawnluatna, tun tomluatna te piangthei aa tuate hangin a pumpi uh a khan ding zah in khangzo nawnlo thei uh hi.

Mittawh muhtheihloh thazawngkhalte pianzia tampi om hi. Gentehna: khuakhatlohna, bil khuazakna hoihlohna, kampautheihlohna, lungsim kicinlohna cihbangin mibatlohna tampi om hi.

Tua a hihman in naupangte in nisimin tha om an namkim a nek ding uh kisam hi. A diakdiak in singgah tuamtuam te leh a engmel a nei mehteh mehgah te nek ding kisam hi.

Naupangte, naupaai te leh tangeknei nupite in pumpi a khangsak an namte (protein), vitamin leh tattuhdat tampi a kihel an namte tampi nek ding thupi mahmah hi. Mikim in a hihleh cidat (iodine) nek ding kisam hi. Thaom an nekna a thupi na