Malaysia, Puchong ah naupangno khat inndawl 14 pan kiasuk in silo bilbel

Malaysia, Puchong ah naupangno khat inndawl 14 pan kiasuk in silo bilbel

Malaysia, Puchong vengsung aom Condo (Condominium) innsang mahmahkhat ii inndawl 14 Floor panin naupangno khat kiasuk in silo bilbel ahih manin lamdang kisa mahmah cih theSun pan kiza hi.

Tua naupangno pen kum 4 bekbek aphapan khat hi a, tuazahzah innsangdawnpi panin kiasuk in asihloh pen thulamdang, pianlamdang mahmah “Miracle” khat hi kici hi.

Hih thupiangpen nung Tuesday ni in Malaysia, Jalan Puchong lamzikpitung aom Koi Tropika Condominium ah thupiang ahihi. Hih tuahsiatna apianlaitak in naupangno pen amahguak innah aom laitak hi a, innmailam Balcony panin akiasuk kici hi.

Inndawl 14 Floor ii Balcony panin akiasuk pen innnuai inndawl 3 Floor ii atungkhuh sikkang “zinc roofing” tungah tusuk masa hi. Tuakhit ciangin kikhuksuk leuleu in leilak “Ground Floor” ah Parking akikoih mawtaw khat ii amailam Bonnet tungah tusuk leuleu hi.

Hih naupangno akiatlam atheih uhciangin tua vengsung ah aomkha mipi te’n delhpah ngeingai uh a, amanlang in tua naupang pen Serdang Hospital ah puaksakpah uhhi.

Tua naupangno pen inndawl 14 panin akiasuk ahih hangin silo bilbel in, ahi zongin akhutkhat kitan a, amukzong liam cihi. Tualobuang adang liamgawp luatna omlo, sihlawhnading bangmah omlo in hoihkikding hi, Good Health hi ci’n zato te’n pulakkhia uhhi.

Hih thupiang tawh kisai in aki theihbehna ah Kelantan aom naupangno ii meltheih ahi kum 13 leh kum 16 aphapan mi 2 tepen zumkhak sangkhak Holiday sung ahih manin Kelantan panin Puchong amau kiangah zangiak in ahawh cihi.

Tuesday zingsang ciangin naupangno ii apapen nasemding in zingsang 8am in kuankhia a, atapa kum 4 aphapan pen ameltheih tetawh innngakding in anutsiat ahihi.

Naupangno leh azinte tawh amau mi 3 bek innngak in aom uh ahihi. Sunlam ciangin Condo sung aom tuibualna Swimming Pool ah tuipekding in kumsuk uh a, tawlkhatsung tui akibualkhit uhciangin 2pm hunpawl in inntung ah kahtokik uhhi.

Innsung atunzawh uh asawtlo in innteek naupangpa pen tuibualna tawh gimpiansim hidinghiam, ihmu sukziau hi.

Tua naupangno a ihmut laitak in azin mi 2 te agil uh kial ahih manin nektheih khatpeuh aleiding in 3:30pm hunpawl in vakkhia uh a, innteek naupangno pen amahguak a ihmusa in nusia uhhi.

Tuazawh asawtlo in innteek naupangno pen khanglo in, ameltheih azinte kuamah amuhloh ciangin innmai Balcony ah adakkhiading in kahto a, tuapan in innnuai ah akiasuk hiding kici hi.

More: Malaysia, Bangsar vengsung inntung khatpan in tutphah kipaisuk in mikhat dengkhadek

Police te genkhiatna ah hih naupangno pen inndawl 14 pan akiasuk ahih hangin, inndawl 3 na aom sikkang “Zinc Roofing” tungah kiasuk masa, tuakhit ciangin mawtaw tungah tusuk in, akhauh ataakgawp tawh kidengsuk khalo ahih manin, asilo hiding hi ci’n genkhia uhhi. Hih thupiang tungtawn in nulepa te’n na tate uhpen midang khatpeuhtawh nutsiat ziauziauding hilo, midangte’n na tate pen nang itzah, nangdonzah in hong itsak, donsak khollothei cih phawk huai gige hi. Sawltak #zomidaily