Malaysia aom gamdang mite’n Public Housing innte asaapleh ki hawlkhiading

Malaysia aom gamdang mite’n Public Housing innte asaapleh ki hawlkhiading

Malaysia gamsung aom People’s Housing Project (PPR) innnei te’n gamdang mite asaap sawnsak uhleh amanlang in hawlkhia uhhen, ahawlkhiat hunding kha 3 sungbek ahun kipiading hi ci’n Minister khatin genkhia cih NST pan kiza hi.

Tuabangin agenkhiat pen Housing and Local Government Minister Zuraida Kamaruddin ahihi. Tua People’s Housing Project (PPR) innte pen kumpi vaihawmna tawh atawmman zawdeuh hi a, Malaysian gammi tebek aomnading in aki vaihawm ahihi.

Ahi zongin pawlkhat in gamdang mite saapsawnsak uh ahih manin, tuabangin asaapsawnsak te’n amanlang in hawlkhia hen ci’n Minister Zuraida Kamaruddin in Tuesday ni in Press Conference ah genkhia hi. Tuni akipan ahawlkhiat hunding kha 3 sungbek ahun kipiading a, ahawlkhiatkei uhleh tua innnei tepen thukibawl in, a innneihna “Home Ownership Rights” zong ki Cancel saktheiding hi ci’n genkhia hi.

Minister Zuraida Kamaruddin in agenbehna ah hihvaitawh kisai in kumpi thunei Authorities tuamtuam tetawh hihvai asiangdingin ki vaihawmding hi ci’n genkhia hi.

Hih People’s Housing Project (PPR) leh Public Housing (PPA) Units innsaapvai tawh kisai in abeisa 2017 May khasung inzong thuthang omngeikhin hi. Tuahunlai inzong gamdangmi te’n PPR leh PPA Units te saaptheih hilo a, asaap akitheihleh ki hawlkhiading cih thuging omkhin hi. Tu’n kumpithak, makaithak himawk ahih manin, PPR Units ah innsaap te bang hongcih takpidiam….. Sawltak #zomidaily

May 2017: Malaysia gamsung “Public Housing” kici innsaap akiman zawdeuh ah aomte kidop huai

Malaysia gamsung ah sumlut atawmzawdeuh mizawng daipam te omtheih nadingin ngaihsut sakna leh ahuhna un People’s Housing Project (PPR) leh Public Housing (PPA) Units akici kumpi innsaaptheih vaihawmsak uhhi.

Tua PPR leh PPA innte pen adangdang te sangin innsaap kimanzaw thamtham hi. Ahi zongin tua inn pawlkhat tepen midangte saapsaksawn in summet bawlna in anei pawlkhat om ahih manin, kumpi thunei te’n diksa hetlo uhhi.

Tulaitak Public Housing akiman in asaapnuam mi 60,000 bang ngetna bawlkhinsa om ahih manin, summet bawlna in azangkhial “Wrong-doers” te tukumbei ciangin avek in ki hawlkhiading cih theStar pan kiza hi.

Hihvai tawh kisai in DBKL “Kuala Lumpur City Hall” te’n hoihtak in akancian laitak uh ahihi. Public Housing tepen Malaysia kumpi in meigong tagah te adingin avaihawmsak uh hi a, ahi zongin summet bawlna in azangkhial tammahmah cihi.

Mi pawlkhat te’n hih Public Housing te kumpi tungpanin khakhat RM120 khawngtawh saap uh a, ahi zongin tua Flat te ah amau omlo in midang te RM500 pan RM600 cihbangin saapsaksawn uh cihpen thunei te’n mukhia uhhi.

Hihbang in summet bawlna pen hoihhetlo a, hih Public Housing te ngahtheih nadingin mi tampitak in kum 15 bangzong a ngakngak om ahih manin tuate adingin ngaihsutsak huai mahmah cihi.

Tua ahih manin kumpi thunei te’n tua Public Housing te ah kalsim in Operasi kilutding a, ki siansuahding ci uhhi. Pawlkhatzong innmai ah ki hepkhiatding in lai kibelhsak khinta cihi. DBKL Housing Enforcement Inspectorate Officer te’n midang in saapsawn cih atheihte uhzong akongkhak khenkhia in, asung aom te ki hemkhiasak uh cihi.

Public Housing ngahtheih nadingin ngetna Application abawl tatkakte bek omthei dinga, midang ki saapsawnsak theiloding cihi.

Related: Kuala Lumpur khuasung ah mi 2 thautawh kikaplum ~ ZD

Tulaitak tua Public Housing te ah gamdangmi Foreigners tampi in innsaap uh cihpen thunei te’n theita ahih manin, Operasi alutding lauhuai hi. Sawltak #zomidaily