Pu Zokhai Thugen hoih ka sak te ~ Pu Zokhai

Pu Zokhai Thugen hoih ka sak te ~ Pu Zokhai

“Malaysia pen Zomi a tamzaw te mit keuh kipatna hi a, Zomi Movement kipatna khat hi cileng khial lua in ki um keng. Zomi lakah gamdang tung khinsa tampi takte kibulpatna pen Malaysia hi. Malaysia ih tun ciangin Zomi a tamzaw in ih Zogam ah ih om laia Chin kiciten Zomi te mit leh kam ong hukcipsak lam kiphawk pan a, ih khantohna ding lampi om khempeuh ong khaktan sak in ih ngah ding hamphatna teng hong liaktum sak uh hi cih kitel zo pan hi. Hih thu a ki imcip den pen Zomi sungah ih muan makaipi pawlkhat bek in tel uh a, pawlkhat in telzo nai lo in tudong mah Zomi nawlkhiin in Tedim Chin mah kicici lai tazen uh hi.

Ahizongin Zomi tampi tak Refugee thu tawh gampua ih tun zawh a kipan thu kiseelsim teng a tamzaw mukhia ih hihmanin ih minam min Zomi a kimansuah dektak khin kimlai kiphonglo kik a Census hun leh kiteelpi hunah a kigualzo hong suak hi. Zomi te gampua pial khia kei lehang ih minam min Zomi naleng a kimansuah ding hizen hi. Gampua a om Zomi te hangin Pasian nasem Zomi tampi takin gam thupite hong siik thei uh a, Pasian vaihawmpihna tawh nasep zong a guanzo ih hihi. Tua banah Chin kipawlna sungah innteek a sem mi pawlkhat zong hong piangthak in gam thumna ong tun uh ciangin Zomi kipawlnate ah panmun hong tuh in hong ki Zomi sak mahmah ta uh hi. Ih minam sungah hong ciahkik uh ahihman in ih lungdam hi. Gampua ih tunna pen ei Zomi te adingin minam leh mimal in nuntaakpih thei ih hihman in thusia hi lo hi cih kitel hi.”

Dotna leh Dawnna

Gamdang a om Zomi te leh Zogam a om Zomite kizopna lungkim huai na sa hiam?

Pu Zokhai: Dongtuah hun laia ih kihuh diamdiamna te ka muh ciangin lungkim huaisa ingh. Ahizongin lungkim huai lo ka sak thu pen gamdang tungsa Zomi pilna siamna nei lo pawlkhat gamdang a tun uh cianga pil lua hong kisak khak zel pen hoihsa keng. Tua banah Zogam a om Zomi te’n gamdang a om Zomite pen gamlehlei it lo a taaisan hi hong cih uh zong hoihsa keng. Tua lo adang ah ih kizopna leh ih kihuh diamdiamna, ih khua ih tui ih puahna cihte bel lungkim hoihsa ingh.

Zomi in minam gaalkap ih neih ding kisam na sa hiam?

Pu Zokhai: Kisamsa mah ingh. Gaalkap ih cihpen ei hong su te sukkikna dinga kivaihawm hi. Ahizongin hoih ka sak hangin kuamah hanthawn keng. Mi tu mi tate kenlak mual lakah gilkial dangtaak leh haksatna a thuak dingin phal keng. Ken zong ka thuaksa hi. Hoih ih sak khempeuh a ki Support hipah lo hi. Thau tawi sese lo a ih sep theih tampi om hi. Na theih kei leh hong dong in, hong gen ning.

Zomi in minam puan a kibang neihkim ding hoihna sa hiam?

Pu Zokhai: Hoihsa mah ingh. Minam puan a kibang khat neih zawh ding zong kihanciam mahmah hi. Ahizongin Designer te leh ih minam puan a bawlte pen mihau vive ahihban ah sumbawlna khat hong suah mawk uh ahihman in baih lo hi. Amau sangin hau zaw in sum neizaw hi lo mawk ih hihang ciang a maw! Hithei bang hileh tulaitaka minam puan a omsa teng khempeuh kaikhawm ding in sengcip ding. Tua khit ciangin a kikipsaksa minam puan bawlkik dingin ih minam sungah hawm cihtakin hawm zo lehang ki Uniform thei pen dingin ngaihsun ingh. Numei pawlkhat in pasalte Puanlaisan leh Tangcing puan bang hong zatpih bek hi lo niik a hong tensak taktak uh ciangin ih khuasikmul bang tang zo liang hi. Na kisa mahmah hi.

Zomi min tawh kipawlna khempeuh Support a huai diam?

Pu Zokhai: Zomi min a kihel man a Support gaih pah ding in ngaihsun keng. A nasep uh bang? Minam phattuamna dingin bang teng sem? Minam it takpi mah uh hiam cihte ngaihsut phot huaisa ingh. Zomi min a om man bekin tua kipawlna pen Support pahpah huaisa keng. By Francis Lamthang (Zomi Quavadis)