Pu Zo Khup’ thu tawmkhat

Pu Zo Khup’ thu tawmkhat

Aminpi Gin Pian Khup hi a, Tedim pan khang khia hi. Apu apate bel Muizawl khua a piang uh hi’n teh. Amah katheih cilna: Zolai tawh laibu atawm mahmah hun lai in Mandalay University a sangkah Zomi Siamsinte’ bawl “Zingsol Magazine” ah amin kamu masa penpen hi. Alaigelhte in hong huup mahmah hi.

1999 kum in India ah LST sangkah ding in ka kuanto a Lamka katawn hi. Ka U te tawh amau tangval ngumngek lai vive ahih man un Blue Star sang mai ah innsap in na omkhawm uh hi. Ama’n hong theih loh hang ken bel ka muhphet in kathei hi. A innsapna vuah library neu khat nei uh a tualai ah lai sim in tu ngiungeu den hi. Alaibute uh ka et leh Zangkong a laibu lui kizuakna a laibute tampi na om hi. Galdo dan tawh kisai laibu zong tampi na om hi. (Hihte na gamla tun veh e kaci sim khinkhian hi).

2000 kum in Pu Gin Mang in New Delhi pan in ZoNet hong bawlkhia hi. Asawtlo in ZoNet pen Zomite’ ki kaihtuahna mun hong suak hi. Pu Zo Khup in zong gam leh minam vai lai hong gelh zel a zaknop kasa mahmah hi. Asawtna teh ki ipzo nawnlo in G-chat pan in ka hopih hi. Ong hopih dante kasi kasa in deih mahmah hi. Ka kihoho mai uh hi.

Maitang Kituahna

2004 kum March kha ciang in Bangalore pan B.Th zo in innlam zuan ding in kaciah hi. B.Th tawh zong mi kiphin khop mahmah lel ding cih thei kahih man in aban kazop sawm nawnkei hi. Lamka katun ciang in ka U Heavy Piang @Thang Len Piang (L) in tua hunlai a CNF te’ phualpi ahi Camp Victoria ah khawmpi khat om ahihna hong gen hi. Pu Zo Khup zong hong pai in hong zol ciang in lawptak in kazui pah hi.

Khawmpi min pen Chin Consensus Building Seminar ahi hi. 2004 kum April 7 – 10 sung CNF phualpi Camp Victoria a kibawl ahi hi. Mizoram, Saiha district sung ah om hi. Kawlgam leh Bangladesh kituahna mun hi a gammang tulak pi khat ahi hi.

Lamka pan in Pu Zo Khup te nupa, ka U, leh Pu Min Thang te lawmta tawh ka kuan uh hi. Lamka – Aizawl -Saiha mawtaw kituang hi. Saiha pan jeep neu khat tawh kipai hi. Jeep apai theih nawnlohna ah giak in azing ciang in khe tawh sunlang phial mah kipai ngiatngiat hi. Aphual katun uh ciang un CNF galkapte’ zi leh ta te’n pakkual tawh hong dawn ngeingai uh hi. US pan in Pu Vum Son zong hong pai hi.

Tua khawmpi pen ZNC (LA), Mara People’s Party, CLD (Exile) leh CNF pawl 4 kikop a kibawl khawm ahi hi. Tua khawmpi pan in Political Affairs Committee of Chinland (PACC) kiphuan khia hi. Tua khawmpi sung ah thugen siampen Pu Zo Khup ahi hi. Khalkha/Falam nungakte bang in pakta mahmah uh hi. Azi omlo hileh koih khong hetlo ding dan uh hi.

Khawmpi man ni in stage show no khat kibawl a ko’ unau in guitar katum uh hi. ZNC (LA) min tawh apaiteng in “Zogam Galkap Lapi” kisa hi. Kei lobuang ZRA vive ahih man in lem mahmah lel hi.

Kimuh Kikna

PACC makaihna tawh ZRA phualpi khat ahi Mt. Sinai ah “The Fisrt Chin National Assembly” 2006 kum May 8 – 10 sung kibawl hi. Tua tawh kopsuak ding in tuama deuh kha 1 sung nainganzi tintan Aizawl ah kakah phot uh hi. Tua hunlai ZRO gamdang vuanzi Pu Suan Mang (Tu’n Maryland, USA) in hong sam hi.

Tintan kah ding tua laitak Yangon a computer lam a minnei mahmah khat ahi KMD ah sia asem ka lawm Do Lem Kim (Tu’n Austin, TX, USA) kazot leh hong ut bilbel hi. Tonzang khualai hausa ka Pu Thang Lam Pau zong Yangon ong pai laitak ahih man in amah zong kazawn hi. Kawlpi ah Lengtong Pauno kazawnto lai hi.

Ko teng Aizawl ah kha 1 vilvel thusin in ka om uh hi. Ka Sia uh pen Dr. Salai Lian Hmung Sakhong, Salai Za Uk Ling, Cherry Zahau, Victor Biaklian cihte pawl hi. Tua ka thusinte uh pawlkhat kalawm Do Lem Kim in Siamsin Magazine ah gelh hi.

Tintan man ciang in Songtal Mt. Sinai lam zuan ding in ka kithawi uh hi. Ka U tawh kikum in tualaitak a aminthang mahmah Falcon Music Band Pu Lengtong Pauno’ tungtawn in kasam uh hi. Kapno in zong hong zuito hi. Bassist kalawm Zekhe bel hong pai theilo hi.

Tua hunlai in Pu Zo Khup in Lamka pan in Zoland Times cih tadensa khat manglai in thoh hi. Mt. Sinai khawmpi ah Pu Zo Khup tawh nuam kasa mahmah uh hi. Amah bel tua khawmpi sung Dr. Khen Za Sian tawh buk 1 ah tungkhawm uh hi.

Online Pan

2009 pawl a kipan in World Zomi Congress (WZC) phuat ding vai online tungtawn in ka kikumkum uh hi. 2010 kum October 24 ni ZNC Birthday a gawhding in sialpi khat WZC in hong sik hi. Tua ni in Second Pinlong tangkona kinei a tuni dong kawlgam i Roadmap pi khat hong suak hi.

Tua zawh asawtlo in kei hong man uh ahih man in thu kakiza nawn kei uh hi. Amau ZIA nangawn na phuanto lai dan uh hi. 2016 leh 2018 kumte in bel Pu Zo Khup tawh US ah cidam in ka kimukik uh hi.

Thukhupna

Maitang phatna lo in Pu Zo Khup pen nainganzi thu theihna lam ah apilna sang mahmah hi. Alungsim zong siang mahmah hi. Nekguk ding khawng ngaihsut in neilo hi. Agen bang in asem ngam takpi khat ahi hi. Pasal vai mahmah hi. Kawllai zong siam mahmah hi. Khangsawnte’ zuih theih ding khekhap tampi hong nusiat hi. Cidam in hong khansau ngiat hen. Lungdam, Mung Laan Thang (Tonzang, Zogam)