USA, Maryland pan Pu Vum Za Kaai (Khuasak, Kuntong beh) in hongnusia

USA, Maryland pan Pu Vum Za Kaai (Khuasak, Kuntong beh) in hongnusia

Khuasak Khuami Washington DC Area, Maryland State, Baltimore khua, aa ateng Pu Vum Za Kaai in abeisa January 25,2021 in Khuak sung damloh na tawh hongnusia chih thu izak man in ZIUSA kipawlna mintawh dahpihna i pulak hi.

Pu Kaai pen Zomi te kipawlkhopna Zomi Innkuan Washington DC Area ah member khat leh ZIUSA Genvai member honglut ni 1/31/2016 pan active member khat ahih manin thumeilet bylaw zuiin (100%) Death Benefit $15000 kipiakhia dinga paakkual $150 man khattawh zong mangpha khakna kinei ding hi.

Pa Kaai luanghawm tawh anunungpen hunzatkhop ding hong tungding Saturday January 30, 2021 in (Sizang Burmese Mission Church) makaihna tawh 11:00am in Loudon Park Funeral Home ah Funeral Service bawl khit ciang, Rev. Cin Do Thawng in vuina nei ding hi.

Pa Kaai hong nusiatna hang adahakap alungleng khuangai tanau meltheih khem peuh hehnemsiampa Kha Siangtho in alamdangin hong hehnem ciatta hen! Dahpihna Lianpitawh, Mun Mang (Genvai tanupi – Zomi Innkuan USA, Inc.)

ZIDCA pan Sihkohna leh Dahpihna: Pu Vum Za Kai (Pu Kai) (Kum 81) in hong nusia

Washington DC Area, Maryland State, Baltimore khua, aa ateeng Pu Vum Za Kai @ Bu Vum Za Kai (Kum 81; Kuntong beh) in tuni January 25, 2021 ni zing an (Breakfast) a nek laitak in khua phawk nawnlo aa, tua pan St. Agnes Hospital Zatopi kipuak mah ta leh 5:30pm kiim in zato pan hong nusia ahih manin Zomi Innkuan DC Area (ZIDCA) pan nakpi takin kidahpih mahmah hi.

Pu Vum Za Kai (Pu Kai) pen Sizang Burmese Mission Church (SBMC) Pawlpi ii member khat hi aa, Kawlgam ah akhua lui pen Khuasak Khua ahi hi. Kawlgam ah Palik Bu lui (retired Police Captain) khat zong ahi hi. Amah pen ZIDCA ii full member khat leh ZIUSA Genvai ah zong full member khat ahi hi. Pa Kai in a it mahmah a angkawi Pi Ciang Khua Huai leh Tanu 3 leh Tapa 1 te hong nusiat san ahi hi.

Pu Kai hong nutsiatna hangin SBMC Pawlpi min tawh hehnep tutpihna pen ziangciang January 26, 2021 (Tuesday) ni nitak nai 7:00pm in SBMC Biakinn, 200 Melvin Ave, Catonsville, MD 21228 ah kinei ding hi.

More: Leitung a lumlet nuntak khuasak zia ~ Khup Lian Thang

Ama luang hawm tawh kisai leh Funeral vai tawh kisai pen innkuan leh pawlpi thu nei lam pan ahun ahun in hong zasak to to ding uh hi. Topan adah akap khempeuh hehnepna hong pia ta hen. Dahna lianpi tawh, Zomi Innkuan DC Area (ZIDCA) Ref: Rev. Cin Do Thawng & ZIDCA Genvai tanu pi Pu Tualmung Kuntong