Pu Trump impeachment tawh thu bawl ding vaihawm tei tei uh

Breaking: Pu Trump impeachment tawh thu bawl ding vaihawm tei tei uh

Congress member tampi in akham kham kawmkal Democrat makai pi te geel ahi Pi Nancy Pelosi leh Pu Chuck Schumer ten Pu Trump pen impeachment tawh thu bawl bawl tei tei ding vaihawm uh aa, Pi Nancy in Senate te tung hong tung ding Monday ni in puak to ding ci in tuni taangko khia hi. February 8 ni in Senate ah thu sunna kinei ding hi ci in Pu Schumer taangko khia uh hi.

Hi vai tawh kisai mipi lam pan zong lung himawhna tampi om aa, Pu Biden in zong inauguration speech ah kipumkhat ding gen gen napi in hi te hong vaihawm mawk uh pen kikhen nading hi zaw ding hi ci in Republican makai tampi genkhia uh hi. Harvard Law professor emeritus Alan Dershowitz in tu in Pu Trump pen private citizen khat hi ta aa, Senate in article of impeachment pen alak khiat, akhawlsak (dismiss) uh kul kha ding hi ci hi.

Pu Dershowitz in US constitution sungah “Impeachment” ii a khiatna leh adeihna pen President asem lai te a panmun pan khawlsak nading leh politics ah alut theih nawnloh ding azat uh hi aa, ahi zongin Pu Trump in Kumpi pan atawp zawh ciang a bawl tei tei uh pen thu man hi lo aa, US constitution tawh kituak lo hi ci hi. Democrat makai Pu Schumer in belh Senate in Pu Trump pen impeachment kibawl tei tei dingaa mawhna nei leh nei lo pen Senate in khensat ding hi ci hi. Democrats te ii a deihna leh alunggulh napi uh in Pu Trump pen politics ah asih dong akihel theih nawnloh nading leh 2024 ciang President akidem kik theih nawnloh dinguh agel nuam uh hi aa, kidem kik leh amau aading lahuai thei ding ahih man in lau mahmah uh hi ci uh hi.

Sen. John Cornyn (R-Texas) leh Sen. Linsy Graham ten hi vai Senate in kipsakna confirmation kibawl lo dingaa, President ahi nawlo pi khat impeachment i bawl pen akhiatna om lo hi ci hi. Senator Rand Paul in belh Supreme Court Justice John Roberts hong tu kei leh Senate in bang cih impeachment bawl thei ding i hiam ci in dotna nei hi. Senate sung ki vote na nei zen zen in Democrat te lam panpih aa vote akhia peuh peuh mai Senate election ciang kitel kik nawnlo ding hi ci in mipi tampi in genkhia uh aa, Pu Trump vote ahia mipi 75 million te alangpang suak ding uh hi ci uh hi. Pawl khat in belh Pu Trump impeachment a vote tei tei uh leh Republican party zong khen nih kisuah thei ding hi ci uh hi.

Tu ciang ciang Republican senators te lak ah Sen. Mitt Romney leh adang khat leh nih bek in vote ding ki kilamen aa, Republican senators 17 te in thukimna vote akhiat uh leh bek tua impeachment taangtung zo pan ding ahi hi. GOP Rep. Marjorie Taylor Greene in abeisa hun in Pu Trump impeachment na vai hawm tei tei uh leh Pu Biden zong impeachment hong kibawl kik ding hi acih mah bangin House ah Pu Biden impeachment article puak to ta hi. Hi vai te bang ciang hong tung hiam cih en to to lai ni. Thomas Mung