Pu General Tun Kho Pum sih dan

Tun Kho Pum Baite mat a hi

Tun Kho Pum Baite tung tang gending saupi kathei kei a, ahi zongin MNF Lion Brigade History ah a poihmawh dan teng leh mat ahih dan a sih dan theihsak ahi hi. Mizo khangthu ah poimawhna thupitak nei ahih manin mangngilh theih, nelhsiah theih dingin ka ngaihsun thei peuhmah kei hi. Khangthak laisiam hi danlam a lunglut te’n hong kan ciangun bangtan hiam beek a lampi kawk muh theih ahi dingin ka lamen hi. A mah pen Mizote( Zosuante) lak-ah mi thupi, mi poimawh in asim tel ahi hi.

Mizoram ka tun nunguh sawtlo Hliappui Khua ah kaom ua ki panin Tun Kho Pum Baite matding cih thu ka theita ua, a hang ahih leh aki suah khiasa bangin mailam ah gensawn loh ci ahih manin ka gensawm kei hi. Tuaci bangin Mizoram pumpi ah mat dingin lai kikhak kual zihziah a, tua a lai-ip tungah lai malgol in laituisan tawh anuai kigit in Khuatenga Mizo National Volunteer Commander te Address kigelh mangkhin hi. Hici bang mi thupi, mi poimawh ahih manin Khuateng a Volunteer te’n amau huamsung ciat ah galvilding kiseh in sun le zan aki zomin January kha Khuavot nuai-ah gal vilden uh hi. Tuaci banga gam pum pi-in a ngaihsut dan a pompih theih loh uh pen matkhiat loh a khah zanding ahi theilo cih himai hi. Tuaban ah Mizoram in lungsim tak-ah ama paipih Policy a pompih theih loh pen Tun Kho Pum Baite na ngawnin a theihtuak kei hi. Tua hi-a, vangsiat huai, kamsiat huai tak-in 1967 January phalbi Khuavot nuai-ah aki manta hi.

A mat lai tak-un aman’ te’n zong Pu. Tun Kho Pum Baite tung panin bang deih uh hiam cih kigen theilo hi. Ahi zongin a bulhlai Citizen nai leh a bulh loh Rolex naite suhsak uh hi. Citizen nai pen Adjutant General R. Sangkawia in tanga Rolex nai pen ahih leh MNF makaipi Pu. Laldenga in tang cih ki thei hi. Pu. Laldenga in Dacca a, India Army te khut ah aki surrender zawh tungin a MNF te taisan hong kiklam, Tatkong Lui zuan a hong paina uah India galkapte tawh kikap uha, a taigawpna lam-ah hong sumang kha hi. Nam galkap te’n President nai mang zongin tua kim a, lopa leh nahthelteng thaimang, pheklekmangta le-uh muzolo uh hi. A hi zongin mang denlo hi.

Tun Kho Pum Baite nungzuite Lamlira Battalion ah paipih uha, amah ahih leh a tuamin Army Headquarters, Tuichang Camp ah kulhkhup uh hi. Upmawh sangin Tuichang Camp pen lianin thupi mahmah a, Nam galkapte a lut tawh a pusuak tawh ki helh ziahziah in om uh hi. Tua ci bang kawmkal ah Tun Kho Pum Baite pen galkap Section khat in cingden uh hi. A cing’ te’n lah mi bangci dan cing’ ka hi uh hiam cih a theihtuak mahmah kei tazen uha, makaite thupiak hangin cing’ ahi giap uh hi. Zo tate khuasak Aksi lian, Zosuan tengteng mailamding khualna a, ama hinna piakhia a, AGAM gal muh pasal pha ama mite khut mah ah aki lawmna gim namtui tawh Zo tate a ding, zing cianga suahtakna len kawl ni suak mu khalo dinga koihcip a hita!

Minam in a mainawtna ding, kalsuanna lampi ah atuam a dinkhiat sawm a, lawmte luangtung ah zawhna hanla sakkhawng phamawh a salote, na guklut in nampi lamsial na a paikhialsak hi. Tuate hang mah in agim a tawlte, a thuakte mel nangawn tuaci bang mi te’n a liahzel uh hi. Phat leh pahtawi dinga ki lawmte makhelh a, zawhna lukhu tawh kipho lak in amau hangin Nam pumpi puksia lellel pen nuamsa tak-a, enin kisia sak mahmah, ki makaisak mahmah in a makaih uh hi. Hici bang makai, aki pat tunga kipan Mizo sungah ki tasam ngeilo hi. A tunga ki pan haksatna a bawlbawlte lamkim tunma nangawn in a puksia naak uh hi.

Nikhat sepding mel omlo ahih manin nitaklam ka lawmpa TTa tawh Camp sung a khanglam deuh ah kava vak uh hi. Tun Kho Pum Baite a khumna uh taan inn ah bangkawm in kava hopih uh hi. A mah ka hopih ma un a cing’te ka hopih masa ua, bang hangin a mat uh hiam? koilam mi hiam? ci-in ka dongh uh hi. A cing’ pa in zong hipa thu ka thei kholkei, hici bang a, cing’ dinga hong koih manun a cing’ mai ka hi uh, hih thupiak bel khauh mahmah hi, kua mah in a hopih loh dinguh, a taikhiat hetlo ding ahi cih ahi, taikhia zenzen leh a ma tangin ke’n sihna thuakleng kilawm hong ci hi. Ka lawmpa in tua thupiak hong palsatsak deklah ka bang ua, acih leh a ma’n no khawnga dingin dan atuam keidia acih khit in hici bangin va hopih uau, cikawm in a paamlam deuh a, aveng dangte dinna lam ah aki heiphei hi.

Tuaciang in ken zong, a khumna uh haksat tuakna maizen e, pialthang a Zawng awk bang hilo maw, kaci a, a cing’ pa in zong, makaite thupiak hi-in bang mah lah ki hih lamdang sak theilo a, ci-in hong dawng hi. A kulh khumna uh atung aniam a, a kawciik mahmah hi. A bang maupum kikal a vang neucik awng ah mit sutuah zen a, et loh in muh theih ahi kei hi. Maupum lah ziingtak in kikan chitchet, a gakna nangte lah a pualam ah kihek cip khin, asung tut theih dintang theih loh, lup theihna hamham in lian hi. A haksat dan ding pen mihing pau in genkhin zolo ding hi. Puansia mahmah, a pan dildel khat cih loh puandang silh ding a neikei a, tuaci bangpi mah tawh January Phalbi khuavot sun le zan in a thuak ekh, a do ekh mai hi.

A kiangah ka vanaih leh a mah zong lingkeuhkeuh kawmin hong tu a, lawmpa bang naci zel a, ann na nethei hia? cih ka vadot leh ka lungsim a thei bangin hong nehno a, khasialua zaw hiding hiven a khitui hong tak kauhkauh hi. A kilang in ka mittui luangkei mah leh ka sunggil a ka mittui pen takkhia ziahziah mai hi! Dam tak-in a puansilh hong hui a, a puansilh ninpi tawh a khituite hong nul in ki pasal sak tak-in hong en-a, hici bang in hong dawng hi. “Hih ka din mun hi, a haksat leh a nopding dan na theisiam maiding” hong ci hi. Hi takpi a, aban dot beh leng zong a phattuamna om dingin ka theikei a, ama ading in hih sak theih lah bang mah ka nei tuankei hi. Lungsim tawng in ka hehpih a ka lainat mahmah hi. Bang hang hici bangin kulh ah khum in om ahi hiam cih lah ka theikei a, poi kasa a ka hehpih mahmah hi. Alim a-al neek theih piakding lah ka nei tuan peuhmah kei a, amah lah gawnglumlo bek a hita hi. Ama ading in hin sangin sih ut huaizawta mai hi.

Tua ciangin a cing’te kiangah a pualam ah nisalum awisak ve-ua ka cih leh amau Pu, Siate’n(makaiten) phallo uh hi, ci’n hong dawnguh hi. Ann a neithei hia, ci-a ka dot kik leh cihtham a nengei kei hongci uh hi. Ke’n zong ka lungsim ah ne kholkei mah inteh kaci hi. Tuaciang in a kiangah bang naci om zel dia, ci-a ka dot kik leh Tun Kho Pum Baite in limtak hong en kilkel in “Kasi ding” hong ci hi. Ka khasiat mahmah a, tua pen a kampau kazak nunung pen hong hita hi.

Mimal hamphat nading hilo a, zi le tate hamphat na ding zong hituanlo nu le pa sanggamte hamphat na ding zong hi samlo in,Zo tate zingciang ding khualna a, hinna piak a mantam dan sutlo a, ama innlum nusia in haksatna citeng thuakngap a, a kalsuan Salpha Tun Kho Pum Baite in Zo suante leitung ki lumlet hang a, khenzak a omte, ki gawm kik na ding, ma a panlai leitung sum le pa in a leitheih loh a hinna, a it angaih Zo tate khut mah ah 1967 February ni 5 ni zingsanglam nai 7am in a piakhiata hi. Tun Kho Pum Baite pen gam le nam suahtakna ding a, man(price) piakhia masa pen hong hita hi.

Zingsang dang mah bangin Tuichang luikuam pen kumkhen tuimei in a hun ngei bangin phalvak a kipan a tuam hi. Ngeina dan a mangngilhlo hun kikhel zel in lah ahun ngei bangin 1967 February ni 5 ni hong suahpih leuleu hi. Zingsang khuavak dek kuanin Pu Sapbawia amin neu Sapa in zong a thumvei nading in zaidam tak in hong khen satta hi. Ak om hi leh ak masa khuan hun, duty nunung te’n zingtho masate ma-in hih ni ci uh hileh ki lawmin meiphual hong tuah uh hi. Tualai tak in Tuichang tuipi tunga tuimei zam lih liahte ki lamto liailiai a, agal khat lam-ah Simbu leh Chingpirit in khuavak siangma, a tawpna ding ci hileh kilawm liangin hong ham kulhkulh uh hi. Neek le dawn ding a bawl ann huante in zong zingsang niangtui ding hong sosak vutvut uha, tua sungin khua hong vak siangta hi. Tuaci bang kawmkal ah a theiding a kilawmte leh aki saipih mi tawmciikte sim loh in hih ni pen Zo tate a dinga ni thupi ni hong hi ding hi, cih athei kuamah ki omlo hi.

Zingsang dang bang mah in ko pawl meipi nung ngatsa in ka awi kawm uha, tua kawmin niangtui ka dawn uh hi. Meingo zam lihliahte zong awlawl in hong kang liailai uh hi. Thu tuamtuam genkhawm in ka holim laitak un Tuichang gal ah thau khatvei hong ging dam’ hi. Pawlkhat te’n eheu acih laitak un ka kianga pawlkhat te’n kaplumta uh aive maw, aci uh hi. Kei taget in lah a bangci dan ahi diam, ka nai ka na enkha gaih mawk a, zingsanglam nai sagih leh minit thum a satnai kei deuh hi. Tuaci bang minit tomno sungin leitung vut pailet zokhop in ngaihsutna anei hi-in ka kithei hi. Ka lawmte thugen a kiciat na ding ahi diam, ka tutna lam uah huihdam hong nun’ hang ahi diam, thaukep kanggim hong nam vengvungh hi. Ke’n zong Kuasaklam Aksipi mitta cih ka theisiangta hi. Tuni 1967 February kha ni 5 ni zingsanglam nai 7 cita maini in Zo tate ading, asep dingteng semkhin manlo in Pu. Tun Kho Pum Baite pen pahtawiding a kilawmte makhelh a, min hoih bek, min ngahna ding bek, a sawmte Politics sep gawpna hangin Zo tate khutlum thuak in a mualliamta hi. Pahtawi loh in phum in aom a, thupitak in aki lakhia kik ding!

Note: Hih thu pen C. Vanlalrawna in Mizo laibu KIM LEH NI A AWM ANG EM: The Lion Brigade Mizo National Army sungah agelh hi-a, A TULLO LUNGTUP Editorial Board te’n Paite pau in lekkhia in A TULLO LUNGTUP Laimai 253-259 kikal ah gelh uh hi. India Kumpi leh Kawlgam Kumpite hangin Zomite sak le khangah ki theh in khat le khat I pau I lai a tamzaw kitel nailo I hih manin Khanglam Zomi hici bang’ a lunglutta ding, minam a itta ding leh Zogam galkap a lunglutta dingin theihhuai salua kahih manin deihsak na lianpi tawh kong lehkhiat kik ahi hi. Paite tel kaki sak leh ka telloh pawlkhat naom lai veve ahih manin a kibatlian lohna mun zong omtheikha ding hi. A laibu pen laimai 339 pha in a sunga thute pen gam le nam vai a lunglutta dingin theih huai kasa mahmah hi. Hih sunga thute I telkei leh Zogam galkap bang ki sakhuai, ki pathuai kasa kei liang hi. Bang hang hiam cih leh amaute pen Zogam leitang ngahkik na dinga ZOGAM galkap masa hi uha, amau nasep dan, a thuakdan uh thu le la tampi ki gelh hi. Laimal akhial aom leh hehpihna tawh na puahsak pah lecin akhial om nawnlo ding hi. A simkha mimal kim tungah I Topa Pasian in Lai Siangtho sunga,Moses, Joshuah leh David te mah bangin gam le nam itna lungsim hong guatciatta peuh hen.

Deihsakna lianpitawh,

Khaibawi