Pu Cin Sian Thang’ thugenna – Zomi Nam Ni Malaysia

Pu Cin Sian Thang’ thugenna – Zomi Nam Ni Malaysia 2013

First of all in this occasion, I would like to thank representative from the UNHCR, Ms. Joanne and Dr. Pu Hau Za Cin and his wife, I am largely indebted to you for coming this occasion on behalf of Zomi Congress for Democracy. Thank you very much. Tuni pawi a hong paite UNHCR taang a hong pai Ms. Joanne, Singapore pan a hong pai Pu Hau Za Cin leh a zite tungah Zomi Congress for Democracy, Zomi zumpi panin lungdam hong ko ing.

Mipi tungah kong gennop a masa penpen in-ah no khempeuh na vekpi un hong nohset ing. Tuni a note tawh hih laitak a lungdam tak a i kimuh theih pen hih lai a Zomi vaihawmte siamna hi ci-in tuate tungah lungdam thu hong ko ing. Tua ciangin Zomi numei pasal hih laitak a i gam leh i lei, i minam khanna ding ngaihsun a gimna tawlna, thu tuamtuam thuak a om, tuateng khempeuh ngaihsun kawm a hih laitak a mi kikhopna a hong pai numei pasal tungah zong ka lungdam. Tua mah bangin hih thu hong theihpih ei tawh a om khawmlote tungah zong nakpi tak in ka lungdam hi. Kei lungdamna pen tulai thu online/internet pan kimu tek ding ahih manin kei bek hilo i Zomite omna khempeuh, Zomi party a kiphuatna khempeuh in zong na mu ding ahih manin angtang mahmah ing cih thu a masa in hong zasak nuam ing.

A khatna ah doctor pa in a genna ah Zomite ngeina, Zomite tangthu kicing hi. Ken thu thum hong gen nuam lai ing. Khatna ah hih Zomi Nam Ni a pianna ki gen khin, ahi zongin bang hang in hih piang hiam, tua a masa in hong gen nuam ing. A nihna ah hih Zomi pawi, Zomi Nam Ni a pahtawitawi te’n i pu i pa’n Zomi Nam Ni na suang khin, na hih khin ahih manin ah hih tawh kizui in ken bang tavuan bang sep ding nei i hi hiam cih i ngaihsut ding a nihna ah hong gen nuam ing. A thumna ah a diakdiak in Zomite khantohna ding Zomi gam khantohna ding a a hanciam gamdang a pai mite khempeuh, a diakdiak in ah hih Malaysia a om ZAM te bang tavuan bang van puak, bang sep ding nei ihi hiam cih pen hong gen nuam ing.

Zomi Nam Ni a pianna pen 1948 kum hi a, 1947 kum in ah Panglong sachoh kibawl a tua a man ciangin tua Panglong sachoh siksan in hong uk gam Mangkangte in lotlatzi hong pia in lotzatzi pen tua 1948 kum January 4th in zingsang nai 4 a hong kipia hi. Tua laitak in ah a masa penpen upadi bulpi, Mangpau in constitution, tua pen a ki kipsak ni zong hipah in ah 1948 ni in a man khit ciangin kha nih zong cingtak nailo in ah president masa penpen Shan gam ah tua hong paito in ah vuanzichoh masa penpen U Nu hi-in aman hong zui theilo.

Ahih hangin Kawl sung panin tua laitak a i gam menzi ahi pa in hong zui in ah, tua khit ciangin eimi makai sungah Bo Mang Tung Nung tua tengin hong zui in ah, Zogam Falam khuapi ah February 18 pan 20 ni dong kikhoppi a ki bawl hi. A ni 20 ciangin i thukimna bang hiam ci-in a tawpna ding a a kamkum uh in Zomi Nam Ni tunni ciapteh ding thukim uh a tua ni in Zomi Nam Ni a kip hi, a piang khia hi.

Tua laitak a khamtung Zogam khempeuh makaipi pen a taktak in ci le’ng Captain Mang Tung Nung hi. Amau party pen, a tuamtuam zong tampi om. Ahih hangin ah Falam ah zong nainganzi party om, Khalkha ah zong om, tua ciangin Mindat, Kanpelet, Paletwa cihte ah zong om hi. Tua bang a Zomi Nam Ni bawlna dingin kua in a ngeina bangin propose, hiam cih leh Tuithang khua a teng Subedar Thang Za Kai in ah sungpiuh hi, a thauhkhan kua hiam cih leh Matupi gam a teng Pu. A kankuat pen om ahih manin me kikhia a, a kikhawm 5,217 tua zah kikhawm hi-in tua sung pan 17 in —.

A nihna ah, i pu i pa’n hih bangin mualsuang hong phuh sak a hih leh ei a nungzui a omlaite’n bang nei i hiam, bang sep ding tavuan nei ihi hiam cih thu hong gen nuam ing. Theikei nuteh cihna hilo-in, ahi zongin theihna pen val theilo ahih manin ah tua pen i theih ding deih ing. ZCD i ngaihsutna ah thu tuamtuam om ahih manin ah ZNC min kikhel a ZCD ahi bek hi. Tua hih manin ah ZCD i’ ngaihsutna pen Zomi khempeuh in i pu i pate’n Zomite mualsuang a hong phuh sak, minam lian khat a hong ki piang sak tua a zom ding hi.

I zop theihna dingin kampau mawkmawk omlo-in Falam meeting ah mawtaw zong limtak a pai nailo, Tedim pan, Tonzang pan, tonzang pan-in zong Haiciin khawng, Tuimui khawng pan tua bangin ki pai in khe tawh ki pai ngiatngiat a ni nih sung kamkupna pan a hong piang khia hi. Kua a khualna hiam ka cih leh hih lai a tu metmat teng, tua ban-ah a cian lai hong om zolo teng ahi zongin hih khua sung ah, US ah zong pawl khat om ding hi. A diakdiak in Kawlgam eimite omna tengteng ah zong na ki bawl ding hi. Tua teh India ah zong phone message dan a ka zak uh bang leh nasia tak in bawl ding. Sia Mungtawng in bel hih lai zong muleh ‘nasia lua’ a ci ding hi.

Tua bang a i bawl ciangin a thu a la i gen zong nam khat hi. Den a UNHCR kosale nu in gen mah bangin ei bang i hi hiam? Ei kuate minam i hi hiam? Ei leh ei i ki theih hangin i kim i pam minamte zong i lah na hi. Tuni a hih minam ni a muak nuamlo a lung hiang nei khempeuh minam neu sak zong hi mah, a mah leh a mah a ki neusak ahih lam a phawk ding na hilh kim ciat un. A zalote zong na ki hilh sawn un. A mah leh a mah bekbek ki neu bawl hilo in a piang sak Topa Pasian leh i pu i pate a neu bawl ahi hi. Ahi zongin eite in bang ki sam i hi hiam cih leh hih bang ni thupite ah kah den hamtang ding tavuan kong piak masakna tua a khat na hi.

Tua pen a nungta lai lung-am liang a cina i hih kei nak leh Zomi Nam Ni apian ni pahtawi nuamlote pen amah leh amah ki pahtawi nuamlo taktak hi-in ka tuat hi. A nihna ah hih bang a gam i lei nusia a hih khawng ah bang ni bang kha ding kitello a ngui liang a a ngakngakte in i ngaihsutna bang hiam? I Zogam i Zomi ahih kei leh Zomi Nam Ni pahtawi nuam a, no mau pau leh, gam thumna, ahih kei leh a pilzaw gam, ei gam ah bangmah om nawnlo ahih lam thei, gam nusia a pai, na u na nau uh na khualna uh, na gam na lei uh na khualna uh, hua lai tak ah sum leh pai pek khat pek nih ngah ding innkuanpih zong khak zo ding, nang zong noptuam zaw ding na minam te zong hih theih zah a pia ding, tua ngaihsutna na hihna ding uh hong deih ing.

Tua lungsim pen hong mangngilh kha kei un. No tua bang na cih theih ciang un na innkuanpih uh, na nu na pa uh, na zi na tate uh zong phawk nawnlo kha in hong om kei un. Tua ciangin a diakdiak in gam thumna, gam lina na tun ciang un bang khansuahna na hong nei ding na hi uh hiam cih leh Zomi nam, hua laitak ah minam kidotna na om ding hi. Nang koi pan a hong pai, kua minam na hia? Tua ahih ciangin hih lai khawng a na ipip uh a om leh zong im nawnlo-in a maan pen in kigen un.

Tua laitak ka tun lai a a kumpite un ni sagih sung a deihna taktak bang hiam ci-in mi zakloh in hong hopih a, tua sungah Zomi president ka hih mah bangin Zomi ka hihna uh ka lungdamna uh kong genna a Mrs. Clinton Yangon a hong pai lai a ka genna vuah ko minam 30,000 val bang nuntakna haksa ahih manin hong paikhia a, 10,000 val no kiang ah hong laksak na hih manun ka lungdam hi. Tua nong laksakte uh bang minam in registration bawl na hi uh hiam? Amau hih khawng ah a lau leh ling sa a hong pai ahih teh a maan hong gen theilo kha ding hi.

Hih laitak ah Zomi National Congress president in tuate khempeuh ka genna ah amau bangbang ci taleh ko pen Zomi hi ung. Zomi a kici pen kumpite muhna ah legally a a ki-atloh zong tua pen amau tavuan hi. Kei nangawn political party leader khat, kamai ah pen kawl uliante vive, tua ah pen ko hih bang a hong hihlo a Chin a hong hih uh pen patauh huai na sa hiam? Hua hong paite’n amau min, amau puam, amau minam hong gen ciangin deihtak in na hih in la a tamzaw a theilo a om leh Zomi ci-in na ci unla, kua in hong sawl a cih leh Cin Sian Thang a kici khat in hong sawl hi, na ci un.

A thumna ah, no a tung nailo mite hih lai ah tampi om, tuate khempeuh na tun ciangun zong noptuamna a tuamtuam om kha ding. Na gam uh koici hiam ci a dotna zong a tuamtuam om kha ding. Tuate zong zuaulo in na gen un, ken hih laitak ah a thak in bangmah gentheih ding omlo hi. Ahih hang i gam sung pian zia, tuciang dong gamsung mite tektek te tawh kilemlo a ki kapkap a, no democracy suak khin, paipai bang kul hiam ciah kul hiam cikha ding hi uh teh, ahi zongin tua pen deihtak in ki hanciam a tuciang dong man zolo, vanleng nangawn tawh ko minam neute amau zah phalote hong ki kap na thei uh hiam?, ciah theih na’ng omlo.

Tua ahih manin hih lai tak ah ka minam ni uh kiptak in ah matpong hong ten sak un cih zong, ciah kik theih ding ko a dingin lampi omnailo hi, na ci lai un, cih hong vaikhak nuam ing. Bang hang hiam cih leh Zomi gamdang a a pai nuam a khawl tuni pen na vek un kimlo ding ci le’ng, hong pai sun teng bek ka muh ciangin zong hih laitak ah Zomi tam mahmah om a, no cihcih pen a koi a koi ah pai ding hi ci-in ah tha ka ngah hi.

Tua ahih manin ah no bang minam cih hong hi ding a, ko zong tua mah bangin 2014 ciangin ah kiteelna hong om ding hi. Tua lai ah zong ZCD policy ah tua khempeuh a masa a hong ciaptehna uh hi nawnlo-in ah Zomi hi kim ciat ding a thukimna om hi. Tua ding khawng ah zong no ma’ sum leh paaite mangngilhlo in hanciamna hong pia un cih pen zong hong vaikhak khol ing. Ko politiciante minam vai a a diangdiangte, den a hih laitak a i siapa in kei hong introduce na sungah a zi a ta zong donlo tak a, a cih mah bangin ko bel hih party vai a ki kalkhat suan le ung sum, hong gen kha pak ing, ngaihsun un cih thu a haksatna kamkhat kong behlap hi.

Tua ciangin a tawpna a kong gennop in ah, a diakdiak in America, Australia ngim a hih laitak a omte koi gam koi gam tung ding na hi uh hiam cih pen ken hong theilo hi’ng. Topa Pasian leh UNHCR te bek in thei hi. Tua ahih ciangin ah leitung thu vantung thu, Topa Pasian theihloh a piang khat beek omlo ahihna thu mangngilh kei ung. Tua ahih manin ah tua bang a Topa’ kiang a huhna ngen a mi theihloh na lup kuan ahi zongin, na thawh tung uh ahi zongin Topa’ kiang a ki-ap a thu na nget ciangun, hih bang khilkhial a i om pen Topa’ hong sehna mah hi a, hihte sang a a sangzaw, nangma’ sawlna mah tawh ko hih ciang tung a, ahi zongin a ni a kha ding kitheilo Topa aw, ngaihsut pihna nong piakna mun ka tun teitei na ding un a kisam khempeuh ah hong panpih inla, tua bang mun ka tun khit ciangun zong ko ka nutsiat uh, ka kipat ciil uh a ka innkuanpihte uh tawh, ka zi ka tate uh tawh ka thukimna uh a tangtut theihna dingin sum maat khat bek ahi zongin ka pawlte uh huhna hong puak masak un cih thu na thungetna uh ah na kihel sak hamtang un.

Bang hang hiam cih leh haksatna tampi nusia a hua laitak a thugen lasak lah omtheilo a, i kam i muk zong hong kihumcip suak in, na khat nuntakna na’ng zong siau ni ci leng zong ki siau theilo a, nidang bang a tu leh hei hi nawnlo a, kumpi nasep sung a ki siau a, ahih hang a eite pen hong ki thauhkhan lo. Eite bek hilo kumpi’n a sum a piak ngekngekte nangawn captain ciang tung siah ki pai sak lo, galkap sung bek ah zong galkap thu gen le hang.

Tua ahih manin tua teng nusia a hong pai note in ah tua thu ngaihsun in hong mangngilh kei unla, ahi zongin, Topa Pasian in kei bel a aam Pasian ka hi hi, ci se aive. Na khat peuhpeuh minphatna zong a dangte tampi i piak sa’ng amah tampi piak ding a deih zaw hi. Tua ahih manin ah bangbang ahi zongin kote paina hangin ka gam ka lei uh zong nopsakna a pian na ding, nangma ut bang, nang deih bang a a pian ding na deihna ahih mah bangin tuate sem zo dingin Topa aw hong bawl in ci-in khitui luang liangin ki-ap a, hih lai ahi a na tun khit ciangin ahi zongin Topa’ kiang a na koh ding uh hong vaikhak nuam ka hi hi.

Tua ahih manin ah i haksatna khempeuh ama’ kiang ah aplo pi-in i pai hang, i tung zongin ah i ngaihsutna a tangtunglo ding a lau ka hi hi. Thu-um David in na vaai khempeuh Topa’ kiangah ap in, ama’n hong sem ding hi, a cih ngelhngelh pen ama’ lungtang sunga a suak thu hilo-in ah ama’n a ngahsa thute siksan a Topa Pasian om dan eite hong zaksak, Topa’ lungsim ei khempeuh in i theih na ding a, a nungta Topa Pasian kiang i lungsim i piak khit na dingin thungen hi. Tua ahih mah bangin tuate zong hong ngaihsun unla, tua ciangin i gam sung vaihawmna khempeuh ah Topa’n a haksatna khempeuh thuak ding a hong bawl a ahih hang hih ciang hong tun teitei na khawng zong Topa’ lungkimna hi. Topa Pasian’ minthang tawntung ta hen.

• Lia leh tang tembang ki tawi un Zomi Nam Ni lambang pak le’ng e;
• Zomi Nam Ni lambang pak le’ng, Zomi buppi angtanna hi a, lawm aw e.

[Hihpen Pu Cin Sian Thang (ZNC/ZCD – President) in Malaysia, Kuala Lumpur khuapi akibawl Zomi Nam Ni 2013 a thugenna pan aki teikhiasawn ahihi. Adiakdiak in khamtunggam leh Internet, YouTube cihte a omlohna khuaneu khuata aom ih mipih Zomi te’n asimtheih dinguh lunggulhna lianpi tawh kong teikhiat uh ahihi. Hihbang in laimal tawh simtheihding in ong teikhiatsak pen Cin Khan Piang (Transcriptionist) hi a, amatung ahzong lungdam ihko hi. Transcriptionist cihpen Kampau panin Laimal ah gelhkhiat nasepkhat hi a, mailam ah Zokam, Mangkam tawh thugenna, Sermon, Interview, Speech cihte Text in adeih ihomleh [email protected] ah ki Contact thei hi. ZomiDaily]