President Trump in “Travel Ban” athak letmat thuhna neikik leuleu

President Trump in “Travel Ban” athak letmat thuhna neikik leuleu

US President Donald Trump in Monday (Mar 06) ni in “Executive Order” athak khat letmat thuhna neikikkhin cih BBC News pan kiza hi. Tuasung ah Muslim gam 6 panin US lutkhuan pen ni 90 sung khakcipding cihi. Abeisa in US lutding akhamcip gamlak ah Iraq gam kihel himahleh hih Executive Order thaksung ah Iraq gam kihel nawnlo hi.

US lutding khakcipna “Travel Ban” atuak Muslim gam 6 tepen Iran, Libya, Syria, Somalia, Sudan, Yemen cihteng ahihi. Hih gam 6 tengpen ni 90 sung Travel Ban kipsuak dinghi. Iraq gam aki lakkhiatna pen akumpi in Visa Screening leh Data Sharing te abeisa sangin hoihtak leh limtak in semzawta uh ahih manini aki lakhia hi ci’n White House in genkhia hi.

Tuaban ah US gamsung alutding Refugee limlim pen ni 120 sung ki lutsakloding a, tuapen March 16 ni panin akipanding hita cihi. Ahi zongin State Department panin phalna apiaksa Refugee tepen US gamsung lutthei veveding cihi.

Hih Order thakpen Secretary of State Rex Tillerson, Attorney General Jeff Sessions leh Department of Homeland Security Secretary John Kelly te’n genkhiatna nei uhhi. US gamsung migilo te’n abawlsiatding patauhna leh gamsung bitnading National Security thupi ngaihsutna hangin Travel Ban akibawl, aki khakcip ahihi.

Tulian laitak inzong US gamsung alutsa Refugee 300 valbang ngongtat sawmna Potential Terror Offences om ahih manin, aki kancian laitak hi cihzong genkhia uhhi. Ahi zongin amin apuam athu akician in genbehna omlo hi.

Hih Executive Order thaksung ah tua biakna te masak zawding cih te kihelnawnlo cihi. (Gentehna: Christian te tuambawlding cih omtuanlo) Banghanghiam cihleh nungdiak in Trump Administration in Christian Refugees te deihsakzaw “Religious Discrimination” cih ki mawhsakna omkhin ahih manin, hih Executive Order thakah Christian vai hihel nawnlo hi. ZD Sawltak #zomidaily