President Barack Obama leh tuhun Kawlgam (Myanmar)

President Barack Obama leh tuhun Kawlgam (Myanmar)

Tuni zingsang vanlei dingin kapai leh lampi dung a kimawl naupang te in Obama ci-in awng zakzak uh a, khat leh khat ki ciam nuih uh hi. Anteh zuak nupi khat bang “Obama hong pai ding a hih ciang in, kong piakbeh ding” ci-in hong hamphat a, nuih mai keii pongmawk hi. Ngasa, anteh tuibuuk zuak dongin ki lawp mahmah uh hi. Hihzah a lawp bang thu om ahi tam ci-in Thukizaakna leh Journal pawlkhat lei in ka sim ciangin thukanlo ka hih lam kiphawk in hong ki suangsak mahmah hi.

Kawlgam pen tu laitak in leitung makai te-in a na mai et laitak na hi-in cikmah in Kawlgam a don ngeilo India Kumpi pa Pu Narindra Modi bangin, “ Kawlgam bel, lawm manpha gamkhat hi-in kinbawl mahmah ding gam hi. Ka vahawh ding a, gam nih ki zopna thu hoih tampi kava kum ding hi” ci-in November 8 ( Saturday) ni-in gen khia hi.

Sen(China) kumpi pa Pu Si Kyint Phian bangin a mau gam ah kibawl OPEC Khawmpi ah Pu Thein Sein ngaihsap in maipha pia mahmah sedet hi. Pu Thein Sein zong zinmaang khat a khualzin nuamsa gawp hi ding hi ding hi ven, “ Pu Phian aw, maikaal Kawlgam nong hawh ciangin ciahpah kei in la hong taam thuah in” ci-in tho a hih manin SUMMIT man khit ciang ni 2 taam beh ding ci hi. Ko veeng lamte in bel an khing, zukhing sa khing a duh man hi-in teh ci lel uh hi.

November 10(Mon) ni-in Japan gam a thunei mahmah leh Tokyo-Mitsubishi Bank UFG Ltd., Vice-Chairman Pu Taaksih Muukliip Muuklawk( Kawllai tawh ki gelh dan hi) zong hong hawh in sum leh paii thu leh Stock lam nasep ki pat ding gen phuahphuah hi. Tualo gamlian makai tampi hong pai in mawk taamtaam mai thong, laitak uh ahihi.

Banghang a hi tam? Kawlgam hong it, hong ngai takpi ahi tam ci-in ka ngaih sut ciangin ka lungsim ah 2013 Kum a, ka khua uh ah Zosiam Gospel te hong paikuan ding hun ka phawk mahmah hi. Thugen siam Sya Pau Khai leh cina damsak thei, thungen te a hilo, Syahuan(Doctor) te hong pai in zatui zaha a valthong in ki hawm ding cih a ki zaak phet in, khuasung teng ki pumlawp mahmah hi. Gamsung, gampua a omte sum ki dongin Zosiam Gospel te’ zin do ding ki lawp mahmah hi. Ka khuaveen uh pan zong hausa Upa leh thukan zaw deuh teng…vokzuak/akzuak/sakol zong peuh ki neih in hong luut phengphang uh hi. Sya Pau Khai tawh sangkah khawm ing a ci tawh, a mah thu genna pan a piangthak hing a ci tawh, Zosiam te lakah Syahuan khat ka tanau te a ci tawh,… thu tam mahmah a, nop zaw zen hi.

Makai pil pawlkhat bang pen ko khua-ah a taam sungin Zosiam makaii te tawh kiho in a mau khualam ah sam ding/ maikum ciangin a paina ding in gen khol ding cih a ngiim uh a hihi. Bangbang hi zongin ansai te in an khawng tuam uh a, zu zuak te bangin piakpah in khawng tuam mahmah uh hi. Zosiam Gospel Team te hong tung takpi a, sun in cina bawl, nitaak ciang crusade bawl in hamphatna leh kilamdanna tampi hong piangsak hi. Haa(tooth) tang 100 val hong bawh sak uh a, ka nii te khat bangin, “Na lo mah hi ven, hong na kha leh ci-in botsak vet ing” ci mawk hi. Khualam ka ciah ciangin ka nii te hatok sa in na om uh a, ha suan nuam in hong dawpdawp uh hi. A dann thei nupi pawl khat bel in BPI zatui hoih te na nget beh uh a, na tha a bei leh ki thun le ci’n hong ci vial uh hi.( Zosiam nasep a gen nuam hilo in, khuahun paizia hong lak nuam ka hih lam, hong tel siam ta un).

Tuabang keek mah in Kawlgam ah November 12-14 sung 25th ASEAN SUMMIT leh US-ASEAN Meeting ki bawl ding a, tua lai ah leitung gam lian makai tampi leh US Kumpipa, Obama hong pai ding a, Sumbawl Mihau 1000 vaal bangin a nung zui ding bek thamlo in, a nung zui ding Thu leh la kan in thupuak ( Reporter) te bang pen zuih man dingin a tawm pen $ 60000 a piazo te bek ki zuisak ci zen hi. Obama khual zinna ah kumpi nasem leh a maa aituam nasem mi 800, Thautang in a butzawh loh mawtaw hoih mahmah The Beast leh a dang 45 bang tawh pai thei kici hi. Kumpipa tuanna Air Force One naikhat a leen sim in $ 228288 ( Kyats teng 2000 vaal) bang bei hi.

Hih Khawmpi ah kizang dingin Prestige Automobiles leh BMW Group Asia te in, a hoih mahmah, tuang le hang I duang hong zen keii ahi BMW Mawtaw 99 pia khia uh hi. Hi hun suangah thubuai a om loh na dingin Kawlgam Palik 30000 leh Asean Police, Leitungbup Kipawlna Interpol nulik leh palik(Piilice leh police hilo) ki gawm misiam 50000 kiging sa in om uh hi. Zan nitak in mi gilo nam ahi, paang mul, naak zum, lu tuam mi 2 Hotel khatah lut cih za uh a, va luh vial uh hi. A upmawh dan uh na hilo a, lawmte Mandalay pan mawtaw sia zuak dingin hong zin pak na hi mawk ahih manin, pute ki suang pian simsim uh hi. MDC leh 88 pawlin ko bel thubuai piangsak kei nung in, Khawmpi ah lah hong kisam lo a, cim phawng in Khawmpi hun sungteng American Siikzum( Embassy) mai tengah lamsiauh na kisin nung ci sese lai uh hi ven…

SUMMIT hun sungin Kawlgam sung leh Gamdang pan thukan/thupuak kipawlna 1300 vaal in thu va taw ding uh ci hi( Mite in thuduh ei). Obama pen gansi dan hi leh a patna I gen teng peen thopi vive hi a, ahong bawk ngeingaii uh a hihi. Pu Thein Sein leh Gen. Min Aung Hlaing bang peen na ki phasak khol mahmah uh a, a ngailo ki neih in Pu Phian kiang khawng leh Russia lam khawngah ki LUCK sak in a va zin kaanakan geuh uh, a hihi.

Obama a hih leh, “ Thein Sein aw, no kiangah a nuam a, a nuamlo ahi zong kei peen —Australia lam ah tuibuuk muankhat beek va siim suak ding hiing” ci se hi. November 12 ni-in Pu Thein Sein tawh kimu ve ning in, Nov. 13 ni-in Pi Su Kyi tawh kimu ding a cihsa pen, Pi ASSK in thupi kum ding om a cih ciangin Nov. 14 ni-in ki muh dingin khanto a hih manin Obama in Pi ASSK a ngaih ngaungau na ki langhsak hi. Tua lo, Yangon Main University(Hlaing) ah sangnaupang te tungah sermon pia ding a, Gen. Aung San te pawl ki suam lupna Huanzi Innpi(၀န္ၾကီးမ်ာရုံး) khawng en nuam ing ci a, ahun ding genkhol lo hi. Kawlgam ah misok tam a hih manin a gen ngamlo a hih ki lang a meidawi kasa uh hi.

Obama in Galkap kumpi tawh a kiho kawmkawm in NLD leh nupi nu a panpihna ki langhsak mahmah kasa hi. Main University in Kawlgam Democracy kipat khiatna hi a, Parliament Housea hawh manin a sisa Aung San a phong kik tawh ki bang hi. Aung San vaang tawh mipi in tudong mah a tanu ASSK a ki it ahihi.

Mailam ah bang ciang hong tung tam maw? Topa Zeisu cih bang keek in Obama in, “Oh! Burma, O Jerusalem, Jerusalem, you who continue to kill the prophets and to stone those who are sent to you! How often I have desired and yearned to gather your children together [around Me], as a hen [gathers] her young under her wings, but you would not! Luke 13:34” khawng hong cih loh ding thunget ding Tapidaw te tahuan ahihi.

Laisim Mimal Topa’ Thupha!!!

Suumpi

Kawllai tawh kihawm The Mirror leh Pyi Myanmar Journal pan kila hih manin lai malgawm(spelling) khial a om leh lai-at pa khialna ci-in na puahsak un.

Xi Jinping, President of China
Pranab Mukherjess, President of India
Narendra Modi, PM of India