Portland ZBCA Khawmpi 8 veina ~ Rev. Thang Van Lian

Portland ZBCA Khawmpi 8 veina ~ Rev. Thang Van Lian

Amun: Zomi Bethel Church, Portland, Oregon State
Ahun: July 30 – August 1, 2021 (Friday – Sunday)
Thubulphuh: Hong Khangtosak Pasian (I Kor 3:6)

Chin State sungah zong mipi tul khat kikaihkhop ding baih nawn het lo kawmkal ah Malaysia leh USA ah Zomi bekbek a tultul a hong kaikhawm thei kipawlna pen biakna lam panin ZBCA hi in biakna lo ah ZAM (Malaysia) leh ZIUSA (USA) te ahi hi. Inn lamah mipi tul khat kimuh ding a haksat laitakin gamdangah Zomi tul khat kimuh ding a haksa het lo suak ta ahih manin Zomite tangthu kikhel taktak hi, cih theih hong suak hi. En pak leng lungdam huai mahmah a, hun sau adingin hong koici diam, cih ding tampi a om phial zongin Topa’ khut muanhuai in hong len den ding hi, ci-in i kikhamuangsak hi.

Tutung ZBCA Khawmpi zintunna mun Portland pen US gamlim en leng leilu-nitumna lam a om ahi hi. Ko omna Atlanta khuapi pen nisuahna lam hi a, vanleng tawh nai 5 khawng ka pai uh hi. Yangon leh Myikyina zah 5 tan bang kigamla hi. Tai 2600 val bang ahih manin Atlanta te ihmut hun ciangin Portland te adingin nitum nai lo mawk hi. Nai 3 kikhai hi. Vanleng tawh loin mawtaw tawh sawt kipai lua ding ahih manin tutung a khawmpi sim mi za ah sawmkuate pen vanleng vive tawh kipai ahi hi.

Portland phak ding ka lawpna diakte pen innteek sem ding ZBC Pawlpite Pastor Sia Muana pen a mi ka muh ma pekin a min a ka theih mahmah khat hi a, tuma deuh in Assistant Pastor a ana zat uh Dr. Hau Za Cin leh a innkuanpih Sianu, Siamah Cing te nupa zong ka it, ka muan leh ka ngaih mahmahte ana hi uh hi. Hong nusiat lai-in Zomibup lungsim hong phawng mahmah Lasiam Sia Tuatuang lutang kiphumna khuapi zong ahi hi. Tua banah Portland khuapi min ka zak cilna pen Sia King Mang hang ahi hi.

Sia King Mang pen ZRO/A support ding, cih a gen ngam sensen Pastor ka theih masak pen zong ahi hi. Oregon State bup ah Zolai pen kumpi theihpih lai khat ahih theihna dingin ana hanciamin US a om Zomi mailam ding a hanciam mahmah bek tham loin inn lam Zogam hong khual hong van mahmahte mi thupite omna hi, ci-in ka lungsim in ka ciamteh hi. Khawmpi pai ding pen ko kiang Zomi Laizom Christian Church adingin a lawp huai diakna ah biakinn lamkhopna sumtang $ 81000.00 hong kipia ding, cih thu ahi hi.

Khawmpi sim mipi hotel a giak bekbek mi 650 kipha ci-in reception vaipuak neite in gen uh a, nipi ni sun Hotel ah khawmpi simte sung pan nausuak khat om ahih manin mi 651 kipha suak hi. Hotel a tung lo tanaute kiang a tung zong pawlkhat om ci uh hi. Innteekte in mipi khempeuh vanlengtual ah hong dawn, ciah lam ciang zong hong kha kik ngekngek uh hi. Hotel ah giakin hotel huang sung mah ah meeting leh biakpiakna kinei hi. Nek leh dawn a lim pen tawh hong pum vak pikpek uh a, kisapna khempeuh tanu hong sem uh hi mawk ahih manin ettehtaak mahmah uh hi.

Tutung khawmpi ah ZBCA member thak Pawlpi 4 kisang a, MC thak 16 kikipsakin, Pastor 12 te ordination kipia hi. Khawmpi hun sung vaihawm kamkupnate ah maitai siusiau sa in thu kivaihawm khawm a, agenda debate pian om leh zong mai gum gega leh san liang a kinial kul loin thu kivaihawm thei hi. Biakpiakna ah Kha Siangtho nasepna tampi kilang a, mi tampi in Pasian lawnkhakna tangin, damna ngah, pianthakna a ngah thak tampi om hi.

Galkap gilote khut sung panin leh natsia panin Zogam leh leitung adam nading khitui luangin thu kingen a, kha galdona lianpi kinei hi. ZBCA sum zatna pen inn lam Zogam leh Zomi adingin 80% bang kizeek hi, ci-in makaite in gen uh hi. Tu ciangciang Zogam leh Zomi vai-in pankhopnate ah $ teng khat teng nih kingah zo ziahziah a, mailamah a sawt loin dollar a million a sim tawh Zogam Zomi adingin a pang zo dingin ka lamen hi.

Tutung khawmpi pan ciapteh huai ka phawk diak pawlkhat:

Kum 2022 ciangin music city ci a minthang Nashville khuapi ah ZAC te innteekna tawh ZBCA Kumcin khawmpi leh Tin Jubilee pawipi thupi takin kibawl ding, a khat veina ZCTS Sangtuah pawi zong kibawl hi.

• Gambup ah localte Kipawlna sum pen 7% hi nawn loin 5% tawh hi ta ding.
• Tedim ICU Meiset lei nading ZIUSA tungah $ 10050.00 kipia.
• Zomi Oxygen Project sum $ 272269.00 kingah ta.
• Biakinn lamkhopna sum $ 81000.00 ZLCC, Atlanta te kipia.
• ZBCA sungah luangphamna pen $ 15000.00 mah kikipsak.
• ZCLS tawh kopin Zomi makai a tawm pen tul khat kimuhkhopna ding maban pen hun lem masa pen ah zom ding.
• ZCLS ah ZBCA gambup huamin member lut ding, sumpi 1% puak ding.
• Zogam a Pastor ordination ngah masa pen Rev. Vial Nang ordination ngah zawh kumza cin phawkna building adingin $ 10000.00 pia ding.
• Zomi Pastor meigong (zi/pasal) khempeuh tungah $ 100.00 ta itna leh phawkna letsong pia ding.
• Rev. Dr. Go Van Mung in ZBCA Lai Siangtho sang ZCTS maban khempeuh hong len to suak lai ding.

ZBCA Gambup makai thak anuai abangin kiteel:

1) Rev. Tun Cin Kap, President
2) Rev. Pau Khan Khai, Vice President
3) Rev. Pau Khan Lian, General Secretary
4) Rev. Ngo Suan Thang, Associate General Secretary
5) Rev. Lian Za Huam, Treasurer 1
6) Rev. Tual Khaw Mang, Treasurer 2
7) Rev. Muana Khuptong, Accountant
8) Rev. Dong Suan Pau, member
9) Rev. Zam Suan Mung, member
10) Rev. Kang Cin Pau, President, Youth Department.
11)Rev. Thang Khan Sang, Secretary, Youth Department.
12) Pastor Niang Go Man, President, Women Department.
13) Pastor Man Deih Cing, Secretary, Women Department.

ZBCA Gambup huamah High School Valedictorian hong ngah mi 2 – Lia Cing Tul Vung, d/o Rev. Pau Khan Khai & Pastor Niang Go Man, BZCC, Louisville, KY leh Lia Sophia Ciin Zuun Cing, d/o Pa Cin Ngaih Suan & Nu Zam Sian Lun, ZBC, Portland te tungah pahtawina laipi leh sumtang $ 500.00 kipia.

Rev. Dr. Kam Khaw Thang suan leh khakte sung pan Pa Thang Suan Khup & Nu Ning Ngaih Lam te innkuan in khual leh tual mipi khempeuh nitak khat an hong vak uh hi.

Nipi Ni zingsang lamin Education Forum kinei hi. High School zo leh degree ngah kigawm mi 100 valte pahtawina kipia hi. Rev. Thang Van Lian