Pope Francis in bang hongpuak? ~ Cin Lian Khai

Pope Francis in bang hongpuak? ~ Cin Lian Khai

Mawhmaisakna (Forgiveness), Kilemkikna (Reconcialation), leh Kilemna, Daihna, Muanna (Peace) Thupha Hong Puak Pope Francis tung ah lungdamna huai mahmah hi. Khualzin ka theih lak ah Media minthangten billik pen sa ingh. Hongzinna hanga hong puak thuphate ih gam in ih ngah nang manlang tuam mahmah ding hi. Pope ii spokesman Burke in nungkal in CNC te kiang ah peace, forgiveness and reconciliation,” thu puak ding in Pope RUM hawh ding hi cih a genkhit mah bang in Pope in thu agenteh tuathute mah gen pah hi.

Mawhmaisakna (Forgiveness)

Pope in Italy pau in, Leitungbup mipi mai ah Myanmar sung a teng minamten muhtheih leh muhtheihloh liamma nei hi uh teh ci gen hi” -” kiphulakna, kithukkikna pen Jesu lampi hilo hi” ci-in mipite mawh ih kimaisak ding hanthawn hi. CNN

Kilemkikna (Reconcialation)

Khat leh khat duh hawpna leh RUM gam sung a teng minamte kikimlohna, kisimmawhna, Biakna Kideidanna, Human Rights Violation aomna hang a, ih ki lemloh lam a thei Pope in hihbang in gen hi. World News te gelhna ah,

“RUM mailam pen kilemkikna a om limlim kisam hi, tua kilemna pen khat leh khat ki zahtakna, minam ki deidanlohna tung ah kingah hamtang ding hi. Tua aom theih nang Democracy paizia zahtak tek leh Rule of Law akici zahtak kul ban ah thukhunpi (Constitution) zong mipi hoihnang gelh kisam hi ci hi”.

Kilemna, Daihna, Muana (Peace)

“RUM Gampen hoih mahmah leh Leisung sumpiang zong tam mahmah hi. Ahihhang ahoih penpente pen Mipite hi. Tua a hoih penpen mipite in bawlsiatna sawtpi thuak khin uh hi. RUM gam in kilemna, daihna Muanna nasepna vuah Politics sang mahmah leh Kha thu tawh sem ding hi uh teh.

Video: Pope Francis suprises with his gift to President of Myanmar

RUM kumpiten kilemnang, daihna muanna a omnang, na hamciamna uh thupi sa mahmah ingh” cin hanthawn hi. Kilemkikna leh Daina muanna aomnang, thuman cihtakna leh Human Rights zahtakna a om mateng, kingah lo ding hi”, ci-in Pope in gen hi ci-in Atlanta, USA a om CNN reporter Joshua Berlinger and Delia Gallagher in gelh hi.

Senior General Min Aung Hlaing in Biakna kideidanna, minam kideidanna omlo hi ci-in Monday 27/2017 in Pope kiang ah gen hi.

“Tatmadaw te zong peace aomnang ka hanciam mahmah laitak uh hi. Galkap khempeuh te zong Peace aomnang ahanciam ding uh ahihi ci-in Pope kiang ah gen hi. RUM gam ah minam ki deidanna zong omlo hi cihzong genbeh lai hi.

More: Yangon, Kyaikkasan tualpi ah Pope Francis thugenna leh Cardinal Charles Bo Thanksgiving speech

Papa Pope Francis hong paina hang in Biakna kideidanlohna, Minam Kideidanlohna, Mihinghihna Kizahtaksakna, mawh kimaisakna, Kilemkikna, kilemna, daihna, muanna omta hen.

Quotation mark ” ” sung a kikoihteng pen Cable News Network leh World News pan ka lak hi.

Lungdam
Cin Lian Khai (Zogamkhaino)