Politics laibu sim in! ~ Pau Khat Suan

Politics laibu sim in! ~ Pau Khat Suan

Zomite mi’ tung ah tuang a, namdangte sang i san’zawk nading in a kisam masa pen pilna ahi hi. Pasian’ kammal Lai Siangtho in zong pilna a thupina lim gen mahmah hi. Pilna khempeuh thupi a, mimal ading in pilna khat peuhpeuh deihhuai mahmah hi. Nasep nam kibang ciatciat pilna tawh nasemte leh thatang masuan nasepte nasepna phual ah kibang khin lo hi.

Pilna khempeuh lak ah POLITICS pilna thupi deuh kasa hi. Banghang hiam cih leh, pilna khempeuh Politics ii ukna leh thusaina nuai ah om khin hi. Minam a khantoh nading in Makaite mipil ahih ding kisam a, tua lak ah Politics pilna nei ahih ding deihhuai penpen lai hi.

Tua ahihman in, khagthak Zomite in Politics pilna sangpi sin ding, theihsawm ding ka hanthawn nuam mahmah hi. Banghang hiam cih leh mailam ah Minam leh Gam ong makaih ding tu a khangnote, khangthakte ahi hi. Makai sempah sese lo dingte in zong Politics thu theih huai mahmah hi. Mipi’ political knowlege sang leh minam sung vai thupi a om ciang kipumkhat baih mahmah ding a, gualzawhna ngahna ding haksa lua mahmah lo ding a, khantohna manlang mahmah ding hi.

Khat pan, Manglai gen loh Kawllai nangawn a sim melmel lo, politics siksan a hamphatna deih lelte tawh thu kikup pen haksa mahmah a, a hai deuhte bang in a zak-sawn leh ama’ ngaihsut tawm bek tawh sihpan thei lai sawnsawn ahihman in thu kigen thei vetlo zawzen hi. Politics siksan a hamphatna lam-en hi napi, a hitheilo thu nangawn theilo a a cihsa (or) a panna sa khatpeuh lu meel taw meel theilo a pang teltal bang om thei mahmah hi. Tua in a tawpna ah siatna, supna lianpi a tunpih ding lamtak theilo uh himawk hi.

Tuabang mi tawm semsem a, politics a a panna pen thu theih taktakna tawh khuak zang a lungsim tawng kizo mapanna ahih ding lunggulh huai hi. (Knowlege based personal conviction) Tuabang a hihna ding in lai tampi sim kul, sim huai hi.

Politics tawh kisai Zolai tawh lai ki-at leh a kiletkhia, a kiteikhia tawm mahmah hi. Tua ahihman in Politics taktak (or) political science theihna ding in namdang lai, Kawllai Manglai tawh a ki-atte sim kul hi. Kawllai tawh ki-at sang in Manglai tawh ki-at laibu hoih tam zaw thamtham hi.

A diakdiak in Political Theory, Political History, Political Philosophy, Political Ideology cihte Manglai zah in Kawllai tawh ki at laibute ah kicing lo zaw hi.

Tua ahihman in mi khatpeuh in Politics thu taktak a theihnop leh Manglai sim thei ahih ding kisam hi. Kawllai tawh ki at laite ah ei’ gam tangthu leh tua tangthu siksan a ki-at hoihkhop om ahihman in tuate zong sim huai mahmah hi.

Manglai siamte ading in hih a tung a i gen thute internet/google ah a haampi kizong thei, kimu thei a, tam mahmah hi. Thuthuk, Article hoih leh laibu hoih simnuamte ading in bel a laibu mah lei kul, sim kul veve hi. (Online ah zong download ziauziau ding a a kilei thei tampi om)

More: Makai lianpi na hih nading, laibu nakpi in asim khat nahih kul hi

Bangbang hileh khangthakte in pilna thupi ngaihsut a, Kawllai Manglai thei in, Politics tawh kisai lai tampi ong sim ding uh ka deihsak mahmah hi. Siawanpa in politics lai sim theilo ding cihna omlo a, lokhopa in tawm sim zaw ding cihna zong om tuanlo hi. I minambup a i political knowlege a san’ a niam tawh kizui in i Minam, i gam khangto ding hi. Mi khempeuh in political knowlege thupi i sak hun ciang i Zogam hong paallun ding hi. Pau Khat Suan