Malaysia ah Zomi te hongki thahna vaitawh kisai khuamakai, Pawlpi siate Meeting kinei

01 May 2017 ni in a nasep pih Kawlmi Mr. Soe Thu, U Hla Than I tapa in khutlum tawh hong nusia Mualzang khua Pa Cin Do Langh leh Nu Luan Lam Cing- Guite beh te tapa Tg. Thang Do Mang (Mangpi) kum 25, thu hangin Zomi U le Nau a kuamah peuh ki lungso mahmah tekin 05 May 2017 in ZAM makaihna tawh emergency meeting 3- 6:30pm dong ZAM hall ah kinei thei hi.

Tuasung ah a diakdiak in kawlte hong thah sak te sung pan citaktak a nasem in a boss te maipha zong a ngah a, kitotna om hetlopi in hazatna lel tawh kawlte hong thahsak a nuai mi 3 te phadiak pen, hi bangin a thuak nate uh a Zomi pih ten a thupian hun lian in thei, mu, leh a tangko sak pah ding omlo ahihmanin ahun val khit ciang kithei pan hi.

Tua hang mahin a that te khatbek ki man zoloin ih hihci sih pahpah nate hangin, Zomi u le nau a kua maciat a ding pilvan huai thu tampi ki sutkhawm thei in Zomite Malaysia ah pilvang tak a ih kalsuan zia ding lai tawh hong kihawm khia thei hi.

Kua man a hunlap in a ki phawk loin kawl te in hazatna tawh hong thah sak ih sanggam 3 te pen

• 1. Nu Thang Sian Dim -22, kaptel 16.02.2016
• 2. Pa Zui Lian -33, Ngente 11. 04. 2016
• 3. Tg. Thang Do Mang -25, Mualzang 01. 05. 2017

Tg. Thang Do Mang kawlte hong thahsak vai tawh kisai in Zomite minam neu hihna tawh Kawlgam leh Malaysia ah simmawh bawlsiat thuak mipih te tangthu tomno kaikhawm in Malaysia Zomi te hong van thei ding zum tuam tuam te ah laiphah kawikawi dingin hoih kisa a, ZAM mah vai pua dingin kiseh hi.

Video: Tg. Thang Do Mang leh Zomi te hong that denden Kawlte bang cih ding? thu kikupna

https://www.youtube.com/watch?v=ckXk_prLJRc

ZOMITE MALAYSIA AH PILVANG TAK A IH KALSUAN ZIA DING

Zomi te Malaysia leitang tungah bangci in pilvang tak om ding cih tawh kisai kiho limna ah a kigen thu pawl khat te

KAWLTE KHUTLUM A IH SIH NONLOH NADING

Kawlte tawh kikhawl lualo ding, Zu dawnkhawm selo ding, Hehsak selo ding, A mualak ah ih om leh ki niamkhiat lel ding, khasum san ni/ khasum sanzah zong theisak selo ding.

NUMEITE KIKEP ZIA DING

Apple, Kunza cihte hong piak hang ne selo ding. Phone, Nai leh Khedap tulsang,T- Shirt hong leisak hang sang pahpah lo ding. Hong ki awi phat kei leh Zomite hih zah a hong don omkei cise lo ding. Ki maingap sak selo ding. Na lungsim khempeuh gen pahpah kei zaw in.

Banghanghiam cih leh UN vai leh Gamdang vai ah lamet hong bat nonloh ciang ta khat leh nih nei khin napi hong taisan ngam veve te uh hi. Hih tungtawn in mi tampi a kipuah thei lai ding cihna tawh kong tangko uh hi. ZAM iNFO