Pil napicin, siam napicin!!

Pil napicin, siam napicin bang hangin hong mangngilh mawk na hiam!!!
Pil napicin, siam napicin bang hangin na minam Zomi leh na ngeina kan lo na hiam? Pil napicin, siam napicin bang hangin na minam leh na mipih Zomi te it masa lo na hiam? Pil napicin, siam napicin bang hangin na minam Zomi te kam leh lai zat kan lo na hiam? Pil napicin, siam napicin bang hangin namdangte pau leh ham, ngeina leh laite thupi sak zaw na hiam? Pil napicin, siam napicin bang hangin na laizom Zomi te gilkial dangtaak ding leh midangte eng den dingin nusia ngam mawk na hiam? Pil napicin, siam napicin bang hangin na minam Zomi te tawh nasem khawm thei lo mawk na hiam?

Lai ih gelh ciangin

Lai ih gelh ciangin mawk gelh kei ni. Lai mawk gelh lua ih hihman in ih lai in man a neilo khat hong suak ta hi. Phone pan ahizongin Viber pan ahizongin Facebook pan ahizongin lai na gelh ciangin a malgawm man lopi in ih mawk gelh ziauziau pen kizongsang baih mahmah ahihman in ih lai leh ih pau a manphatna kiamsak mahmah hi hang.Pau khat peuhpeuh na gelh ciangin a malgawm kician takin gelh hamtang in. Tua ahihkei leh mi pau ahi a ei Zomi te pau zat ahizongin a sia sak nang na hihi. Nang manlahna lel leh nang theihlohna lel tawh namdangte pau ahi a ei Zomi te pau zat ahizongin sia sak ngei ken.Thu khat peuhpeuh ih gelhma in a gelhdan leh a laimal luanzia limtak sin masa ni!

Kipawlna Laan (Flag) te nawlkhin phot dih ni!

Zomi min tawh nampi khat in a ding zo khinte hi hang. Tua ih kipumkhat theihna lungsim mah masuan in Zomi khempeuh in ih omna ciat ah ih zat theih ding Zomi Laan (Flag) khat ih ngaihsut kik ding a thupi masa pen khat ong hi leuleu hi. Zomi te pen mite nuaiah ki om nawn lo ahihman in khatveivei ih minam Zomi Laan (Flag) ih lahkhiat loh a phatmawh hun hong om thei zelzel ta hi. Tua hun ciangin Minam Laan (Flag) nei zo nai lo ih hihman in maizum huai in khasiat huai mahmah hi. Kipawlna Laan (Flag) ahi WZC/ZRA/ZRO/LZI/ZIA cihte ih zat hong kul mawk hi. Minam khat in Laan (Flag) tampi tawi khengkhang cihpen ih kipumkhat zawh lohna khat hong suak leuleu ahihman in angtanna sangin maizumna tam zaw hi. Makaipi te’n hong ngaihsun pha mahmah dih un!

Deihsakna tawh,

Francis Lamthang (Zomi Quavadis)