Picin lam a manawh nuntak kalsuanzia ~ Job Cinpi

Picin lam a manawh nuntak kalsuanzia ~ Job Cinpi

Lang nih muhna – Thupiang khatpeuh a lang khat lam bek pan en a, tua ama etna lam pan a kimu thute bek thuman pen hi ci-in thu a gen thu a ngaihsun mi peuhmah in thuman mu ngei lo ding uh hi. A lang khat lam pan a kimuh theih lohna, a lang khat lam ah bang thu pianga, bang teng om cih a theihtel nadingin ama muhna lam ahi lo, midangte munna le thuakna lam pan a mu a en thei mite bek mah in midangte lungsim ngaihsutna muhsak ding uh ahih manin midangte tungah hehpihna le khualna lungtang nei thei pan bek ding uh hi. Tua hangin thu a mu thu a ngaihsun mipilte in thu a gen uh ciangin a theih loh a tel loh thute ah keima muh dan gen ding hi leng cih kammal tawh thu pan masa den uh hi.

Ei le ei kisittelna

Midangte hoih lohna mu thei a tua hoih lohna tungtawnin thumuhna neih ding pen pilna khat ahi hi. Ahi zongin pilna ngah nop man ahi lo a midangte siatna kawk nop man lel tawh midangte thu kantelna pen supna lianpi khat ahi hi. Mi pawlkhatte lamdang mahmah uh a, ama lungsim ngaihsutna sangin midangte lungsim ngaihsutna a telcian zaw tawh kibang uh hi. Midangte hoih lohna sittel thapai uh ahih manin ama lungsim ngaihsutna taktak bang hiam cih amah le amah zong kitel zo nawn lo thei hi. Tua bang mite pen midangte hoih lohna a muh ciangin kei sangin a sia zaw mi tampi om lai lel cih ngaihsutna tawh ama nuntakzia kisettel a kipuahphat ding sangin ka nuntakzia a siahuai hi nai sam kei cih tawh om lel thei uh hi.

Lungdam theih ding kisin ding

Midangte tungah thupha a bawl ziahziah zo mi khat na suah theih nadingin a lungdam thei mi khat na suah masak loh phamawh hi. Leitungah thupha a bawl nuam mi tampi kiom a, ahi zongin midangte’n ei tunga hong bawl thuphate hangin lungdam a ko den mi kitawm mahmah hi. Ngahna sangin piakna ah thupha om zaw a, ahi zongin a ngah thupha tungah lungdam a ko thei mi pen a piakhia mite zah mahin thupi hi. A lungdam thei lo mi in a piak khiat ding haksa sa hi.

Kiniamkhiat zawh ding kisin den in

Kiniamkhiat ding pen kisin a kul thu hi a, thu baih hi lo hi. Ahi zongin kiniamkhiatna le niamkiatna a khentel thei lo mi adingin kisin ding haksa zaw lai ding hi. A kiniamkhiat mi kizahtak a, a niamkiat mi ahih leh kituancil lai kha thei ding hi. Tua ahih manin mipilte in pilna tawh a kop lo kiniamkhiatna pen haitatna tawh kibang hi ci uh hi. Keima muh dan ahih leh pilna tawh a kop lo kiniamkhiatna pen mi a simawh theite paina lampi ah tuancil ding ngak a om tawh kibang kasa hi.

Kamciam pelh ngei kei in

Kamciam cih pen tangtut ding a kipia ahih mah bangin a tangtun lo, kamciam a pelh ziauziau thei mite pen midangte upna le muanna ngah zo nawn lo uh hi. Tua bang mite pen thutak tawh kizoppih theih om nawn lo hi. A diakin sum le pai bawlna ah kamciam a pelh mite peuhmah a um a muang om nawn lo ahih manin bang zahtakin khangto ngei hi mah leh kiamsuk hanhan lel kha ding hi.

Hih a tunga thute pen a zui zo khin mi pawlkhat om dinga zuih a sin laitak zong om dingin ka um hi. Tua mah bangin zui nuam kisin nuam napi kisin ding a kihta, haksa a sa pawlkhat zong om kha thei ding hi. Tua bang mite adingin ngaihsut piakna khat kong nei nuam hi. A vakin kisin khin pah ding cih ngeina hi lo hi. Khat khit khat damdam a kisin kipuahphat theih thu ahih manin duhhop bawl gawp a a tawp dong tun khit zawh loh sangin khat le nih zui khin zo masa phot leng tua ih zuih zaw sa thute a gah kimu khia thei ahih manin tua ih zuihsa thute mah in thu dangte zuih ding hong thalawpsak kik ding hi ci-in kong hanthawn nuam hi. Na mipihte sim theih dingin na share sawn in. Lungdam, Job Cinpi (Zomi Laisim nuamte)