Phulum leng le Leikha ~ Dr. Nang Khan Lian

Phulum leng le Leikha ~ Dr. Nang Khan Lian

(1) Khanglui te in “phulum phul na ding leikha in petlet” na ci uhi.
Leitung ah gualzawh ding le minthan ding pen thupi mahmah hi. A gualzo, a minthang te pen mihingte lungsim, mualsuang tung ah ki ciamteh hi. Ahih hangin a sang aa a leng phulum a kimuh ciangin leinuai aa om leikha pen kimang ngilh kha thei hi.

(2) Alexander the Great pen galdo siam le galhang in minthang mahmah hi. Tua hun lai (BC 300pawl), leitung bup phial a uk ding in ki um mawh hi. A gam uk na zai lua ahih manin gam lianpi kumpi (Emperor) ki ci liang hi. Hih thu i et ciangin Alexander guak bek, mihing tultampite tha le ngal, na sepnate omlo in hih bang piang thei lo ding cihthu hi.

(3) Leitung galpi nihna sungin Jews mi awn 6 val a thah pen Adolf Hitler hi ci’n a kua maciat in i thei hi. Ahih hangin Hitler guak bek in mi hizah pen a that zawh loh ding lam i ngaihsun thei ding hi. Tua hi a, hih mun ah a kiphawk kha lo mite nasepna te pen i ngaihsun thei ding hi.

(4) Kawlgam suahtak na ngahna ding a sem pen Boyoke AungSan ahih lam kithei ciat hi. Ahih hangin suahtakna ngahna ding in mitultampi tak in anuntakna piakhia lo hi leh suahtakna pen ngah thei lo kha ding hi. Hih bang aa a kiphawkkha lo (akithei khalo) galhang te pen ‘a kisa kha lo galhangte’ (unsung heroes) kici hi.

(5) Mopawi ahizong pawikhat peuhah inntekpi te kinuampih mahmah aa ahi zong phaitam lam aa, sagil bawl aa a buai tanute pen ki phawk khalo thei hi.
A taktak in cileng leikha in petlet kei leh phulum phul thei lo ding himah leh, leikha pen kimang ngilh zel ahih manin a maupen ‘unsung heroes’ mah suak hi.

Mi pawlkhat te na a sep hangin sim om khinkhian thei ahih manin na a seplam kithei kha lo hi. Ahih hangin a maute a omloh ciang in nasepna ah kisapna tampi omin, amau te ki lunggulh hi. Amaute tawsawnna hangin a kikhin ahih lam kithei kha lo in, a maute hong nusiat khit ciang kiphawk mahmah thei hi. Hih dan mite pen makai lam pilna in ‘a dai makai’ (silent leader) na ci hi.

(6) Leikha in ken lei ka petlet hang kei lah a leng khia hi lo a, ci lo in a ma sep bangin sem hithiat hi. Ama nasepna tung ah a mah lungkim lel hi. Vansang ah len ding zong ngaih sun lo kha ding hi. Ahih hangin lei a petlet na hangin phulum phul khia cih pen thei hi.

(7) Tua hi aa, gualzawhna khat peuhpeuh ah a kisa khalo galhangte, a dai makai te om thei hi.

Athupi pen in na khat peuhpeuh i sepna in mite aa ding thupha ahih ding a masa hi zaw a, mite hong theih ding, min le mualsuang, pahtawina te pen anih na hipan ahi hi. Dr. Nang Khan Lian (Zingsol Editorial)