Philippines thongkia te aguaktang Photo ki khahkhia ahih manin, kimawhsak

Philippines thongkia te aguaktang Photo ki khahkhia ahih manin, kimawhsak

Philippines gamsung aom thongkia honpikhat te vankham zongding ci’n aguaktang in ki omsak cih Photo tawh News suakkhiamawk ahih manin Philippines President Rodrigo Duterte leh aseppih kumpi thunei te kimawhsak mahmah cih AFP News pan kiza hi.

Tua Photo pen Philippines gamsung aom “Cebu Provincial Police Office” ah abeisa February 28 ni in akizaih hi a, zanni March 02 ni in hongki khahkhia ahihi. Thongkia bekbek honpikhat leilak sualtung ah ki tusak a, “Philippine Drug Enforcement Agency” leh “Cebu Police Provincial Office” te’n vankham akemkha aomhiam ci’n zonghuan uhhi.

Prison Officer Rafael Espina kicipa ii genna ah Tuesday ni zingsang khuavakphet in thongkia teng aomna pan ki pusuaksak in, thongsung Cell sung khempeuh Anti-drug Agents, Police leh Military te’n sitcianna nei ngeingai uh cihi.

Hih Photo zong “Philippine Drug Enforcement Agency” te ii khahkhiat ci a, thongkia teng Concrete sualtung ah guaktang in tusak, akhe uh pheksak, akhut uh alu ah koihsak in agei ah Police te’n thautawh ngimsa in encik gige uhhi.

Drug Enforcement Agency panin hihvai tawh kisai Statement akhahkhiatna ah hihbangin vankham zonkhiatna aneihna panin vankham Methamphetamines zatui honpikhat, kanza ihcih Marijuana Leaves honkhat, temta pawlkhat leh Mobile Phone pawlkhat mankhia uh cihi.

Kumpi thunei te’n vankham zongin hihbangin aguaktang in akoih uh ahih hangin Social Media tungah hih Photo aki zelhkhiat ciangin Human Rights Groups pawlkhat in Philippines kumpi thuneite mawhsak mahmah uhhi.

Amnesty International te’n hihbang in thongkia te tungah tatsiatna, mihing bangin koihlohna, nenniam bawlgawpna pen dik asaklohna uh genkhia hi.

Thongkia te bawlsiat lohding, akilawmlo in bawllohding cihpen United Nations’ Standards khat ahih banah Philippine Laws sungahzong thongkia akem thunei te zuihding thukhun sungah kihel hi ci’n Amnesty International in kawkkhia hi.

Human Rights Watch te’nzong thongkia khatpen maizumsak gawpding, akisamlopi in Prisoners’ Privacy pen pholak sakgawpding cihte International Standards in phalo hi ci’n genkhia hi.

Hihbangdan in vankhamzong cih minpuasak in, midangte muhtheihna ah guaktang in koihban ah Photo zaihkhuan piasawnsawn cihmahmah pen mihing gamtat hihetlo hi, thongkia te ii Privacy Rights pen palsak hi ci’n Human Rights Watch inzong Statement khahkhia uhhi.

More: Philippines President in Tax pialo te thatding cileuleu ei

Philippines President Rodrigo Duterte in agamsung ah guihtheih khamtheihzang mi tultampi thatziahziah in, gamdang Human Rights tuamtuam te ii mawhsakna te thudon hetlo lel hi. HIh guaktang Photo te ciangciang pen awlmawh hetlo khading hi. ZD Sawltak #zomidaily