Philippines ah meigong nupi khatin IS galkapding kaikhawm kawikawi

Philippines ah meigong nupi khatin IS galkapding kaikhawm kawikawi

Philippines gamsung ah meigong nupi khatin IS galkapding in mi kaikhawm ahih manin Philippine Law Enforcement Agents te’n mankhia uh cih Reuters pan kiza hi. Tua meigongnu pen Karen Aizha Hamidon kici a, ama pasal zong IS migilo galkap makaipi khatmah ahihi.

Southern Philippines gamsung ah IS migilo te thu tangko in, galkapding mi tampi kaikhawm kawikawi cih akitheih ciangin akiman hi ci’n Justice Minister te’n tuni Wednesday ni in genkhia uhhi.

Hih meigongnu pen Special Agents te’n ama omna Manila Suburb sungah abeisa kalsung in amatkhiat uh hi a, kumpi langdosawm cihtawh thu kibawl hi ci’n Vitaliano Aguirre in News Conference ah genkhia hi.

Philippines, Marawi City sungah IS migilo tetawh akithuah dingin Social Media leh Messaging Apps tungtawn in gamdangmi tampitak IS galkap dingin kaikhawm kawikawi cihi.

Philippines gam ii leitawlam aom Marawi City akicipen abeisa kum 5 hunpawl akipan thautawi migilo te tualbialna khuapikhat hi a, Philippines kumpi inzong abuaipih mahmahdet khuaminthang khat ahihi.

Philippines galkap makai te genkhiatna ah Marawi City pen kumtampisung Security aki buaipih mahmah khuakhat hi a, ahi zongin buaina pen avengding hita hi. Hih khuasungvai buaina hangin misi bekbek 1000 valbang phakhinta a, atamzawtham pen thautawi kumpilangpang migilo te ahihi ci’n genkhia uhhi.

Marawi City sungah IS galkap tengpen abeibeita himawk ahih manin, hih meigongnu in IS galkap alutding in gamdang muntuamtuam panin mi azol kawikawi ahihi.

Special Agents te genkhiatna ah hih meigongnu in Telegram leh WhatsApp Chatroom tungtawn in galkap kaihkhopna “Recruit” bawlkawikawi a, lai 296 veibang Post khiakhin cihi. Philippines, India leh Singapore gamsung aom Muslim tengaw, hongpai un. Marawi City sungah ISIS Province khat phutding hihang ci’n kaikhawm kawikawi hi.

Tuabang in IS galkap lutding akizoppih mi 250 bang ama Phonebook sungpanin kimukhia a, tuate avekin muanmawh sazian sungah kikoihpah hi.

Related: Singapore pan Syria ah IS galkap atumsawm numei khat kiman

Hih meigongnu Karen Aizha Hamidon pen ataktak in Muslim hilo hi. Apasal Mohammad Jaafar Maguid tawh akiteen ciangin Muslim alutpan ahihi. Apasal pen thautawi migilo makaikhat hi a, abeisa January khasung in Police tetawh thau kikapna panin asi ahihi. Sawltak #zomidaily