Philippines gam a Kidapawan thonginn panin Muslim Rebels te mi 150 val taikhia

Philippines gam a Kidapawan thonginn panin Muslim Rebels te mi 150 val taikhia

Jan. 5, 2017: Philippines leitaw lam-a a om Kidapawan khuapi sunga om North Catabato District Jail kici Muslim rebels ten zan in va suam uh a, thongcingte khat that in, tua thonginn a thongkia Muslim rebelste dinga upmawh mi 158 va hun khia uh hi ci-in thonginn warden Peter Bongat in local radio stationte kiangah gen hi. Report kipia masa penin a genna ah tua thongkiate hunkhia dinga thonginn va suamte pen Moro Islamic Liberation Front (MILF) kicite tawh kizopna nei uh hi ci-in ulian ten ci uh hi.

Thong panin a tai khiate police leh army kipawl in delh uh a, thonginn suamte leh thongcingte kikaptuahna hangin thongkiate mi guk in sihna tuak a, a tai khiate giat kiman kik in gilbeem sungah kikhum kik hi ci-in Bureau of Jail Management and Penology spokesman Senior Inspector Xavier Solda in ci hi. North Cotabato District Jail warden Peter Bongat in thonginn suamte zingsang nai 1:30 am pawl in hong kuan uh hi ci hi. Hih thonginn sungah tua hun lai takin thongkia mi (inmates) 1,511 om hi ci-in gen beh hi.

Philippine National Police Spokesperson Dionardo Carlos in naikal nih sung kikaptuahna om hi ci hi ci-in Bureau of Jail Management and Penology in report a piakna gen hi. Kikaptuahna a nasiat mahmah lai takin thong sungah patauhna leh buaina (commotion) a om vengvung lai-in thongkia ten sing a kibawl kahlei la-in tonginn nung lam panin na tai khia uh hi ci-in Dionardo Carlos in press confence ah gen hi.

Hih thonginn buluhte kuate hiam cih a kipulak kuamah a om nai loh hangin Filipino ulian ten MILF commander Satar Mandalondong thupiakna hi a cih hangun MILF ten hih ngawhna nial hi. MILFte pen Philippine gam adingin Muslim rebel group thupi pen leh hat pen pawl hi a, Philippines leitaw lam-a om Mindanao pansan uh a, Moro mite adingin autonomy golzaw ngen uh hi. Philippines in Muslim kumpi lehdote (rebels) kum 40 bang Philippines leitaw lam-a tuikulh ah na do ta hi.

Nung kum August in Maute rebel group kici mi 50 thau tawi ten Philippines leitaw lam Mindanao tuikulh a om Marawi khuapi a thonginn va buluh uh a, mi 23 va hunkhia uh hi. Nung kalin thonginn panin a taikhiate mi 8 kiman kik hi. 2009 in zong thau tawi mi 100 in Basilan khua-a thonginn va buluh uh a, thongkiate mi 31 va hunkhia uh hi. Philippines kumpi in Muslim rebelte kum 40 val a dona ah mi 120,000 kiim in sih lawh khin zo hi.

More: Kawlgam ah ngongtatding in apaisawm IS tekhat Malaysia ah kiman

President Rodrigo Duterte in rebels group pawl lian pen Moro National Liberation Front (MNLF) leh MILF tawh ceasefire thukimna neihpih in, kilemna dingin peace talks neihpih ding a hanciam lai tak hi a, ceasefire thukimna leh peace process sungah rebels pawl dang a nei zawte – Maute group leh Abu Sayyaf group kicite kihel lo uh hi. Source: News agencies/ Thang Khan Lian