Pentecost leh Babel Tausang Ki Keelki (3) ~ Rev. Fr. Damian Dal

Pentecost leh Babel Tausang Ki Keelki (3) ~ Rev. Fr. Damian Dal

Babel tausang in mihingte kipumkhat nading deihna lian leh ngimna lian tawh akisem, akibawl, akilam hina pi in, Pasian min leh Pasian vang lian saklo in, mihingte in amau min liatna ding, amau minthan nading in nasem uh ahih man in, Topa in mau te ngimna leh gelna, amau te nasepna leh hanciamna te beimangsak hi. Angaihsut huai mahmah thukhat, aphawk huai mahmah thukhat kisel in a omna thu i en lai dinghy. Babel tuasang alam te in, kuamin adingin, kua tawh kizopna dingin alam ahihiam cihthu ahihi. Babel tuasang alamte in agenthu in “vantung tawh kizop nading” (Piancil 11:5) cihthu ahihi. Pasian min paulap in, asangpen Pasian tawh kizopna dingin ahanciam ahihi. Hihthu in alamdang leh atelhuai mahmah thukhat ahihi.

Babel tausang alamte pen Pasian umlo te ahi hetkei hi. Pasian thei lo leh, amah vangliatna athei lo te, asangnuam lo te ahi kei hi. Pasian umin, Pasian vangliatna leh minthanna te athei, atel te vive ahi uhhi. Tuhun khangthak kammal in genni cileng, Babel tausang alammi te pen, Pasian thu umlo te hi lo in, apiangthak lo te ahi kei hi. Dawibia te zong ahi hetkei hi. Lawki mite, leh anungta Pasian athei lo milim leh, leitung ah om natuamtuam te abia mite zong ahihet kei hi. Laisiangtho siamin, Laisiangtho tawi in, Laisiangtho sim in, Pasian hoihna, Pasian liatna, Pasian minthangna athei te vive aihna thu Laisiangtho sungmahmah ah honghilh hi.

Hihthu hangin, Babel tausanglam te ii mawhna lianpen in, Pasian uplohna mawhna hilo zaw in, Pasian ki umsak in, Pasian minpau lap in, Pasian minsuangin, leitungah mihing min le vang, mihing gualtung tuannang hanciamna ahihi. Amaute min le vang ding, amaute phattuam nading nasepna khempeuh pen, Pasian mintawh sel in, Pasian mintawh zem in, Pasian mintawh etlawmsak in, tua Pasian minsiangtho zangin, mite tungah gualzawhna leh minthanna ngahna ding ahanciam na uh mawhna in, mawhna lian ahihi. Laisiangtho sungah Pasian in, “Na Topa Pasian minsiangtho na thaangzat ngeikei ding uhhi,” (Paikhiatna 20:7) ci in, hongvai khak kammal tawh ki keelki a gamtatna ahihi. Hihthu hangin, Babel alam mite mawhna in, Pasian minthangzatna mawhna ahihi.

Hihbanga gamtatna in, Pasian pen mihingte min le vang ngah nadingin, akizang “minzat” “mizat” khat suaksak a, Pasian deihna bangin gamtat dingpan in, Pasian pen mihingte deihna bangin agamta sak ahihi. Topa pen “Dahpa khuang” bangin ngaihsun in, eideihna bang hongsepsak ding Pasian, ei sawlbang hongmang ding Pasian, eilungkim bang a agamta ding Pasian, ei hong minlian sakding Pasian i suaksak hi.

Ahizongin Pasian in mihingte abawl in, ama deihna banga agamta ding, ama thu amangding, amah a umding, amahtawh anungta tawntung dingleh, ama sawlbang amangdingin hongbawl ahizaw hi. Hunkhatlai in, ei khamtung gamah la minthang mahmah khat na omngei hi: “Dahpa khuang, dahpha khuang, ken neizotang dahpa khuang, kei a dingin To Jesu, dahpa khuang hoihbel ahi,” cih la ahihi. Tuni tuhun ciangdong, khangthak Christian tampi sungah, Topa Jesu pen dahpa khuangbang a, angaihsun, dahpa khuang bangin asang tampi tak ki omlai hi.

Pasian tungah i upna, Jesu Topa hongpiak gupkhiatna thupha pen mihingte min le vang ding, mihing te gualtungtuan nading, mihing te hauhna manna ding in ngaihsun kha in, Topa min paulap in, Topa min suangin, Topa min bulphulh in, Topa kammal te zangin, mihing nuntakna i lamkhak leh, Babel tausang lamte mahtawh Pasian mai ah i mawhna akibang ahihi. Topa in Laisiangtho sungah hi bangin ci hi: “Note in nadaisak uh kaminsiangtho pen tu–in minamdangte’ lakah asianthona kakilangsak dinghi. Keimah in minam dangte’ lakah kasiangthona kalahna dingin note kongzang dinghi. Tua ciangin Topa ka hihna thu amaute in hongtheiding uhhi. Topa Pasian ahi keimah in hih thu kagenkhin hi.” (Ezekiel 36:23), ci hi.

Topa in ama minsiangtho aki daisakding phallo hi. Hihthu hangin, ama minsiangtho adaisak te leh, ama minsiangtho adaisakding nasepna khempeuh satpai in, susia a, ama minsiangtho pen mi khempeuh te in zahtak in, asianthosak nading un, Topa mahmah in, ataklamkhutzan in tuabang a agamta mite ”thehthang” (Piancil 11:8)in, leitungah pan amaute maimangsak hi.

(azom omlai)
Rev. Fr Damian Dal