Pentecost leh Babel Tausang Ki Keelki (1) ~ Rev. Fr. Damian Dal

Pentecost leh Babel Tausang Ki Keelki (1) ~ Rev. Fr. Damian Dal

Pentecost pawi ni apiang thu te leh Babel tausang akilamna thu, akicipna thu leh, tua Babel tausang akicip nadinga apiangthu te bagnci kizopa, bangci kikeelki hiam cihthu in alunggulh huai leh, athupi mahmah Khasiangtho nasepna tawh kisai thuthuk khat ahihi. Babel tausang akilamna, akilamzia leh akicipna thu te Piancil 11 sungah na kigelh hi. Piancil 11:1 na sungah, “mikhempeuh te in pau namkhatbek pau hi,” (all the whole world had one language and one common speech), ci in na kigelhhi.

Tua mahbangin, Pentecost ni in, nungzuipi te thugen nate azami khempeuh te in amau pauciat in naza in, natel uhhi (Sawltak 2:6). Pentecost ni in, Khasaingtho vangliatna hangin, mi khempeuh te in “pau namkhatbek pau hi” cihna tawh akibang ahihi. Tua hi leh Babel tausang thu leh Pentecost ni a Khasiangtho nasepna thu kikal ah, bang kilamdanna om a, bangthupi piangin, ei tuhun Christian te adingin, bang thuthak leh, koici bang Khasiangtho nasepna zia te honghilhhiam cih ih ending hi.

Babel tuasang akilamna thu: “Hong pai un, leitung buppi-ah eite i kithehthang gawp lohna dingin ei-a’ dingin khuapi khat bawlin, a dawn in vantung a ban ding tausang khat lamin, eite’ minthan nadingkhat bawl ni, ci uhhi” (Piancil 11:4).

Hih Laisiangtho tawh kituak in, Babel tausangin akilamna athu in; (i) leitungah mihingte kithehthang manglo in, mihingte khempeuh kipumkhat nading deihna leh, gelna lianpi tawh ana kilam ahihi. (ii) mihingte in amau te minthan nading ngimna leh gelna lianpi tawh Babel tausang akilam ahihi. (iii) mihingte thatanghatna, mihingte pilna leh, mihingte hauhna in leitungpan vantung dong banding hi cih lametna leh lunggulhna aneih man un, ana kilam ahihi.

Hih Babel tausang kilamna thu, angim agel te uh banghangin Pasian in banghangin deihlo hiam cihthu in athupi mahmah khat ahihi. Banghangin deihlo ahihiam ihcih ciangin,

(i) mihingte in amau te kipumkhat nading pen, amaute septawmtheih, zontawmtheih, hanciam theih thu leh, amau te thatanghat thutawh aki ngah sa uhhi. David kumpi pa bangin, Solomon kumpi pa bangin, Pasian min leh, Pasian teen nading khua te sat in, innte lam sawmlo in, amau te abawl asiampa Pasian sungah kipumkhat ding ngaihsun loin, leitung lungsim, leitungthu leitungvai bek tawh pumkhat suahding hanciam uhhi. Pasian thu leh ama hongit na sunglo ah, mihingte kipumkhat na omngei lo hi cihthu Pasian in theisak hi.

(ii) mihing te in Pasian minthan nading, Pasian gamtangzai nading leh Pasian hoihna leh ama hong itna te leitungah akizelhding masak loin, “amaute min le vang” (Let us make a name for ourselves) ding bek ngaihsut natawh kipumkhat ding nahanciam uhhi. Babel tausang alamna thu in, mihing te min le vang deihna, gualtungtuan nopna leh mihingte kiphatsakna kilangsak hi. Ahi zongin, “leitung min le vang” leh gualtungtuan nopna lungsimte tawh kipumkhatding hanciamna in, muibun zolo in, tuptungzo ngeilo dinga, Pasian min le ama vangliatna sungbek ah kipumkhatna omhi cihthu, Topa in theisak hi.

(iii) leitungah mihingte pilna, siamna, hauhna te in vantungdong banphial dingin kingaihsun in, Pasian omna, Pasian teenna leh Pasian tawh kizop nading thute ah, Pasian tungah um in, ama tungah kinga in, ama hehpihna te ngetding leh amah muanding sangin, leitung mihing te in amau te pilna te suangtaak in, amau te hauhna te tawh kisa thei in, amau te siamna te hangin, Pasian nasepna nangawn um zolo in, Pasian amuan dingsangun, amau le amau kimaungzaw uhhi.

Amau te tawh a omkhawm Emmanuel Pasian pen kitheihmawhbawl in, vantung Pasian omna mun ah, amau te thatanghatthu suangin, Pasian tawh kizopsawm uhhi. Tua in, mihingte kiphatsakna lungsim, Eden huan ah, Eva lungsim, gulpi piak kipilsaknopna lungsim, Pasian tawh kizakim nopna lungsim ahihi. Leitung pilna, siamna, hauhna te in mihingte pumkhat asuaksak hilo in, anungta Pasian sungah upna leh nuntakna bek in, mihingte pumkhat suaksak ahihna thu Pasian in theisak hi. Babel tausang in leitungvai tawh kipumkhat ding hanciamna ii lim honglak hi. (azom omlai) Rev. Fr Damian Dal