Pate Ni leh Nuteek, Pateek ~ Hang Khan Lian

Pate Ni leh Nuteek, Pateek ~ Hang Khan Lian

Nu leh Pa lo a piang leitung mihing omlo ahihman in Ipu Ipa te’n, “Singhawm suanghawm aa piang kuamah omlohi” naci uh aa, khat leh khat kithupi simding acihnopna ban ah, tua sang athuk zaw ahi, piansakna (creation), kimawkpianlo hi, ong piangsak Khat (Pasian) omhi cihna hipahhi. Theology Thuthukpi ahihi. Hih lungsim pua, hih lungsim anei, Zomite, ongpiangsak Pa’n minam khat aa ong bawlcil in, tuni tuhun a Laisingtho’ Piansakna ihsung ah ong guankhin ahihlam kilanghi.

Tuadungzui in, leitung mite’n Pate pahtawina ‘NI’ ihneihtheih pen alungdam huai mahmah ahihi. Ipianna Pate pahtawina anei hih leitung leh Vantung gambek hiding aa a angtan huai mahmah ahihi. Leitungdang te in neilo uhhi. Nute pahtawina ahihleh Vantung ah zong kibawllo in leitungbek ahihman in, amanpha mahmah cihna ahihi.

2010, tukum in leitung aa ong kipiansak zawh kum 55 kapha aa, leitungbup tawh igenngam kei zongin Zomite lak ah, kazi kata nangawn in angahloh Pasian tungpan hamphatna Thupha lian angah ci-in kakigen ngamhi. Banghanghiam cihleh kum 55 kaphakdong kaNu leh kaPa in ong nuntaakpih, mit ciim, bilpil, lungsim pil lai aa, tuabang Thupha mikim in kingahkim khollo hi. Kei sangin ka U pii kum 62 apha pen Thupha ngahzaw hilai ahihi. Topa minthanna hita hen.

Khatvei, Tedim ah khualam papi meltheih khat tawh kaki ho kha aa, “Nang zong nanaupangte, USA aa om khat om hilo ahia?” kacihleh, “Ommah hiven tuate khakuun huai lel, khakham veina hilel ee, genvet ding hikei” ong cihsan aa kakan kikkik leh, asawtnailo lai in India lam tawn in ongciah aa aPa kiang kihillo, baanglo in, azi leh atate’ omna Kawlpi delhsuk suak ci-in katheihi. Khakuun huai takpi kasahi.

Khatvei mah Singapore zatopi ah cina gimsimsim khat kaveh leh, kacina vehpa ong gim, ong kipan tawm biangbuangin, abei kuanciang, “KaNu leh kaPa tung nathum sak un, ong ci aa, “Tuni dong sumlepaai bangmah puak zolo hi’ng” ongcihi. Ka lungsim sung ah, gamdang aa sum thalawh aa tutanvei om, NulePa tung dangkasan peekkhat zong puaknailo cihbel thuum aa patvet ding zong hikei, Kawlte’n, “Leitung gik tuamsaklel, kimanna neilo” acihte nahihman in asi hakzaw hiteh kaci simsimhi.

1970 pawlmah in Zomi sumbawl masa khat khanglaipi in ong sivat aa, sigalte kiho sim kazak ciang ahiding mah hi kacihtha ongsuak hi. Amah pen a innkuan sung vuah, sum muthei pen ahihna tawh kizui in aNu, aPa leh asanggam a-u, anaute tung ah kiphasak mahmah, simmawh mahmah hihtuak aa, heh nading zongden in, ahehciang, Zongeina zong ahihetlo Kawlte hehciang aa kisimmawhna aa azat uh azummawh nangawn aNu, aPa mai ah leemngam hihtuakhi. Ipianna iNu, iPa mai aa zummawh lakngam mipa bel iplah huai hetlo mawk mahhi.

Hihbang aa thusia theihsunsun, tuahkhak sunsun ikaihkhopna in hici gamtat kha hetkei ni ikicih nopman ahihi.

Khatvei mah Singapore pan aa ciah tangvalno khat, Ygn atunteh, khualzinna tawh gim, ihmut cimlo ahihman in, tutphah zal tung kingam (lum) kawm, mitsi kawm leh akhe khaam hiding hiven akhe asanglam ngato kawm in, innlam aa om aPa phone tawh hopih aa, tua laitak naupang te’n, gamdang pan aa ma’ camera ken mah tawh maan (photo) nala kha uhhi. Innlam aNu leh aPa kiang tung, avanpuakteng leh a maan (photo) puakteng vel ngeingai a om laitak un, Ygn atun ni aa aPa tawh akiho laitak aa a omdan aPa’n amuhteh, “Suan Kim, hih Ygn nong tunni aa kei tawh ihkiho laitak aa na omdan maw?” ci-in dongpah aa maan sung ah ani, anai kigelh himawk ahihman in nialtheih omlo hihtuakhi.

A Pa lupna khansung lutpah liana, aNu aa kipan a unau teng un athuum takteh, “Nidangciang kei kahi aa, naNu ahizongin, nagei ah ka om uh aa ka om kei-uh zongin, ihkiho aa, ko tawh kisai kizopna khatpeuh nasep, nabawl uhteh hibang tutdan, khawldan za nuamlo hi’ng, ko, note’ hiciciang aa hopih ding hilo hi-ung, lungsim takpi tawh nong hopih nop kei uhleh ong hopih dah zaw un” kici pah uh hihtuakhi. Hi kasa mahmah hi. NulehPa muhna bek aa kihoihsak ding hizenzen lohi. Nu leh Pa lungkimna sum leh paai zong na hikhin pah khollo mawk mahhi. Avaang uh tanding ahihi.

Ka Upipa kum 62 aphaak ciang nasep tawlnga aa, “Kei pen ka tate kazon, kavaakna in katha kangal beitahi. Tua ahihman in ka tate ading Pa hoih kakici theihi. Ahihhang kaNu leh kaPa ii tapa hoih kahih nading in ta hoih kaneih kisam hi” ci aa, hi kasa mahmahhi. Pa hoih hihding athupit mahbangin tahoih hihding thupi zaw laihi.

Nute, Pate pahtawi icih pen amau pahtawi ihi kei aa ei leh ei kipahtawi ihi zaw hi. Khatguak nasep hilohi.

Khatvei, sang aa sang sia ka sep lai, sangnaupangte khat in ak gualno khat ong puak aa, nuamlua kahihman in kakhawi leh khanih, khathum khitteh ong tui hi. A tui masa nambat “1” ci-in kaciamtehhi. Azingteh khat ong tui leuleu in “2” ci-in kaciamtehhi. Athumna ong tuiteh, akhatna leh anihna la in, kaNu leh kaPa akhatna pia in, ka Panote nupa anihna kapia uhhi. Alungdam dan uh ka mangngilh thei keihi. Aktui tang 100 lei in kapia zongin tua zah in nuamlo ding uhhi. Ne le uh zong khamtaak ahilo aktui pum khat hang aa anuamna uhpen, a aktui hilo in “athu” ahihi.

Tua ahihman in, ZIS kikhopna ah tukum Nute’ Ni in, “INu, iPate pe’n anlim tuilim tawh nungta hizenzen lo-in, “huih” tawh anungta ahihi” kacihi. Ong kinuihsan hi. Ngaihsun kikkik hi lehang NulehPa lungdamna pen, sumlehpaai neih leh lam hikhin khollo in, athu hi aa huih ahihi. Khemna huih hilo in zahtaakna, pii bawlna, itna huih ahihi. Ahamsa hihetlo hi.

Kawlte paunaak ah, “Nupa kop khat in ta 1000 vaak zo aa, ta 1000 in Nu leh Pa kop khat vaak zolo uhhi” naci hi.

Zomi ulehnau kong hanthot nop in, “NaNuteek, naPateek neekding nazi nata tawh kisut liang mah in nakhen khiat kei leh bangmah napia zo ngeikei dinghi”. Hihbang kacih ciang ihzi ihta in pia nuamlo, gitloh sakna hilo in tuazah dong aa thupi ngaihsutding kacihnopna ahihi.

Zomi pasal pawlkhat in asung, apu (azi’ nu leh pa) pen Nu leh Pa in simlo in etding ngaihsunlo, zi lel akicihding patauh ngaihsutkha uhhi. Ngaihsut khialhna lian mahmah ahihi.

Nuteek, Pateek bangmah sem zo nawnlote, ei atu, ata te’n en kei lehang kua’n en aa ummawk ihihiam? Tuate neek ding dawnding, vaihawmsak kei lehang kua’n vaihawm sak aa um ihihiam?

Gamdang ah sum thalawh in ka om aa, kha sum kasan aa kipan kaNu, kaPa kakhakdenhi. Zong akisim theipian kahihi. Khatvei inn lam ciah in Nuteek, Pateek tawh tawmvei ka omleh, ihNu, ihPa te ateek uhteh agenhak zia uh kigen theilo hi. Ei zong teek in ihkum tamleh akituaci luading ahihi. Anneek ding nanagwn ne nuampaklo in zolzol akuul uh nahimawkhi. Tuatawh kizom in kangaihsutna ong kilamdangsak lianhi. Azenzen in kaNu kaPa in, “Zinkhia nawn ke’nla ko ong ompih in” ongci hileh bangtanvei kithuah in, kangeek bawl zotam ci-in kei leh kei kakidonghi.

Kei pen kasanggam numei nih kaNu, kaPa keemding omthei aa, tuate thupitna, alungsim duaiziate uh kei sumkhak sang thupi zaw ahihna kaphawk phaphahi. Tuate hang aa kaNu, kaPa tutanvei anungta na hizaw aa kei sum khak hang nahihetlo zawhi. Kei pen sum thalawh kahihman aa sumkhak kahi aa, kasanggamte pen sum ngahtaleh ngahtakei leh Nu leh Pa keem ahi uhhi.

Zomi ulehnau, innlam aa ihNuteek, ihPateek ong kepsak, ihsanggam, ihzi, ihta te ei sumzong paaizong tesang thupi zaw kaanlai ahihlam mangngilhkha hetloding hihang. Adiakdiak ei pasalte kipasal sakna anuihzaak huaipi nahi mawkhi.

Khatvei, nasepna pan ciah, kasung nuamlo, ka awnghawh thasuakkawm in inn katunghi. Ka Nu’n ong dawn aa ka kiho kawmkawm un, ka omdan man saphalo hiding hiven, “Na dailen tha suak ahia?” ongci aa, “Hidihdih veh aw” kacihi. Ka tate’n lamdangsa mahmah uh aa, “Pi, nang bangci theih nahia?” ci-in dong ngeingai uhhi. Ka Nu’n atute kiang ah, “Leltak, nasuahtung vuakipan, mitkhahlo aa ih ong et gige hiven, na omdan uh en lehang akithei lel veleh” cihsan aa, atu te’n lamdangsa mahmah in, “Pi, nang na tate it taktak ciai” ci-in nui ngeingai uhhi.

IhNu iPa te’n hawmthawhna tawh mitkhahlo aa ong encik gige ahih man in, ong tel mahmah uh himawkhi. I hihbangbang ong naak tel lua mahmah ahihi. Sum zong paai zongin ih omciang, amau khutsung ah ih-ap lohhang ihngahzah athei lua mahmah uh nahi aa, hop noploh man, piak noploh man aa angahlo kineih khakding hilohi. Thei lua mahmah mawk uhhi.

NulehPa ahai mahmah zongin tate khem zawhding hilo aa, atheilo akineihbek uh ahihi. Tua pen akheemsawm tate ading gu suakhi. Khemtawh patkhak vetding nahihetlohi.

Zomi ulehnau in tuni aa kipan ihNuteek, ihPateek zahtaak, thupi bawl, it, khemsawm hetlo in lungkim sakding hanciam ding hihang. Khansauna Thupha ahihi. Adiakdiak gamdang ihtunteh, gamdangte tatzia in ta mawklo in, ih Zongeina limcite khahsuah loding hihang. Nu leh Pa ompih aa, vaaka a zawng omnailohi. Nasep manlah in Nu leh Pa ompih manlo, Piteek, Puteek kepna ah puakziau cihte zuaupi hi aa, puaksawm kei peuh lehang tua hangin puuksi hetlo ding hihang.

Tuni aa Nuteek, Pateek limbawllo khat in nateekteh ong kilim bawlding lam-en kha kei in. Ihvawh bangtek in atding hihang.

Zongeina ah, Nuteek, Pateek pen upen, innluahte etding vilding kisa kha aa hizenzen tuanlo hi. Nuteek, Pateek pen ta ihihnaakleh etding hi aa, uzaw, innluah cih gengenloh, numei, pasal kikhen ding thu hilohi. Ta ihihnaakleh etding ahihi. Tam ngahte’n tam etzo ding aa tawm ngahte’n tawm etzo dinghi. Thupha akibang ngahciatding ahihi. Etzawhzah athupi hilo aa etnopna lungsim athupi ahihi.

Nu leh Pa akhasia saklodingin Pasian in ong siamciat tahen.

(Hih kalaigelh tawh Nu leh Pa a en, avaak, azahtaak, a it khempeuh zahtaakna kapiak ban ah, pianna Nu leh Pa taang a cimawh genthei bangmah asem zo nawnlo ihBiakna Siamasate leh Siate nusiatsa a Zite huhna apia, nisim ankuang a umkhawm ZIS pawlmitetung lungdamna kako hi.)

Hih ihPi, ihPute agilvah, akhangno suah masiah, ih Zogam khangno suah in, alei hoih ngeilo dinghi. Hang Khan Lian