Pasian Zia Theih Haksa ~ Hau Za Cin

Pasian Zia Theih Haksa ~ Hau Za Cin

Pasian thuthuk sinte in a theikhin kilkel tam ka cih hun om. A theih pawl uh om dinga, a theihloh uh zong a om thei tam ka ci hi. A diakdiak in Pasian Zia. Pasian in leitung leh vantung leh a sunga om khempeuh a bawl hi cih i theihsa hi. A vekpi in a bawl ahih leh banghangin Adam Eden huan ah a omloh lam a theih ciang a kibukna theilo ahi tam? Pasian in Adam pen Eden huan a tun ciang bek in a omloh lam thei ahi tam?

A omloh lam a theih ciang a kibu hi ding cih a thei tam? Kibu hi ci hileh ama bawl hi a, leitung vantung leh a sunga om te khempeuh ban ah na khempeuh a theihloh omlo kici a, banghang in Adam omna theilo hi ding hiam? A theilo takpi hi ding hiam, a theilo kineih hi ding hiam, ahih kei leh theilohna hang nei hiding hiam, ahih kei leh deihna nei a a mulo, a theilo hizaw ding hiam? Pa Pasian zia lamdang kasa hi. “Adam aw, koi ah om na hiam?” a cih ciangin Pasian in Adam pen mulo takpi mah ahi diam?

Moses a sap laitak in zong meikuang omna lam sawlpang lam ah sam sese hi. Bang hang ahi tam? Pasian in Moses hopih nuam hi kici hi. Sam sese lo in zong Pasian in Moses hopih ziau theilo ahi tam? Bang hang in a omna ah va gen ziaulo, banghanga samkhia sese ahi tam? Moses omna linglak sa lua ahi diam, a dinna siangtho salo a a siangtho na mun ah samkhia ahi diam. Siangtho lo a sak leh Amah Pasian hiven ‘siangtho in’ ci leh a siangtho ziau ding hiven, bang hanga sam sese ahi tam? Pasian zia lamdang kasa hi.

Pasian in lawm deih mahmah, khattang kisa mahmah ahi tam, a lawm ding in Abraham a sap sese. A bawlsa mihing lawm dingin a neih pen amah vanglianpenpa hi a, siangthopenpa hi a, na khempeuh a piangsakpa hi a bang hang in a bawltawm mihing a lawm dingin deih ahi tam? Leivui pan kibawl leivui ah ciahkik lel ding Abraham Pasian lawm dingin cingzo takpi ahi diam? Pasian in lawm ding dang mu zo hetlo ahi diam? Na khempeuh bawlthei ahih leh a lawm ding zong amah sanga niamzaw deuh bek in bawl lel leh hitheilo ding hiam?

A niam mahmah mihing pen lawm ding in hong zonga, tuni tanin zong ei mawhneite hong zong lai a, “ut ing ei” ci leng lungdam mahmah bek thamlo, vantungah lungdamna kicing hi ci lai tazen cileng. I Pasian zia pen a bangci hi peuhmah ding hiam, lamdang ka sa hi. Ei leltak lawm dinga hong deih cih mawkpen. I mi i sa beklo, i khua i tui, i lawm i gual te in zong lawm cih thadah phawk ding, it ding, kikholhpih dinga zong hong deihloh laitak a van leh lei leh a sunga om khempeuh a bawlpa Pasian in ei bang leltak hong deih cih mawk!! Lamdang sakna bei ngeilo ding hi. Pasian zia lamdang… lamdang, lamdang!

Hong it bek hilo lai, hong ompih hi ci hi. Hong veh zeuhzeuh hi cilo hi, hong ompih den ci hi, omnipresent. Hong nusialo cihna hi. Lah mulo hanga bangci hong ompih hiam? Hong kikholhpih a lah i mu ngei kei hi. Hong cing hong kem a lah hong liah hong dalna i mu kei hi. Ahi zongin hong kem hong veng den hi. Hong ompih in hong kholhpih a, hong nusia ngeilo hi. Guaktanga i om zong hong mu a, puansilh leng zong hong mu pailet cihna hi.

Ei hong ompih bangin Adam na ompihlo ahi tam? Ei hong ompih napi a tapa Jesu Christ banghangin taisan a, gim thuaksak ahi tam? A tapa sangin ei hong itzaw a, a tapa sangin ei hong khualzaw ahi tam? Pasian zia lamdang kasa hi. A khutsuak masa pen Adam sang zong a piang nunungzaw nang leh kei hong itzaw hilai tazen hi. Bangzah taktak itna nei Pasian hiding hiam, thupi kasa hi, lamdang kasa hi.

Leitung mi khempeuh a lawm hi khin dingin zawn a, lawm haulua ta ing ei nang ka lawm ding hithei nawnkei ciai cih neilo hi. Tamlua ta in hua lama te huaizo nawn kei ning cih neilo hi. Mi khempeuh ama lawm dingin zawn a, ompih pah in nusia ngeilo hi. A lawm ahih lam a kitheilo tampi zong lawm in a nei ding pa na himawk hi. Hi zahta itna a nei, khualna a nei Pasian nei eite hampha si hang e ka ci hi. Bangzahta in cih thamlo in ginalo hitamah lehang, Pasian mit ah a etlawm mahmah pak bangin ki vul den cihna hi. Ei leh ei mihingte zong ki itzo hetlo napi hangin Pasian hong itna kiam ngei hetlo hi. Amah bang dingin Pasian in hong deih hilai a, tua zong a kisinsinte i hi bilbel hi. Amah i batna ding bangtan a kisam lai tam cih bel thutuam hi. Ama hong lah limpha (example) bel thupi hi.

Amah phat ding vantungmi tampi nei napi a gina hetlo mihingte phat a deih sese zong alamdangpi hi. Banghangin a thupi khin khat, a lian khin khat, a siangtho khin khat pen thupi hiteh, lian hiteh, siangtho hiteh cia phatphat ut sese ahi tam. A kingeksak ahi tam, ahih kei leh hong sinsak ut om ahi tam, ahih kei leh deihna nei ahi tam? Mihingte hau hiteh, lian hiteh cih pen a ki ut mahmah hang khatvei nihvei val kici leng kicimtak, kikham, kizadah pah hi, bang hangin millions tampi kam pan a za den Pasian in za cimlo sese ahi tam.

Zacim cih thadah nang leh kei cih a zak kei leh lungdamlo hi ci lai hi. Phat ding a ut mahmahpa ahih sese lamdang kasa hi. Ama nungzui ding hau khin mahmah napi, hunta ci hetlo in behlap nuam den a, amah lo midang nungzui om leh bang “haza” mahmah leuleu sese hi. La haza mahmah, lah it mahmah, lah siangtho mahmah, lah thuakzo mahmah, lah lungtom mahmah, etc….. hibang zia a nei Pasian lamdang hi.

Lamdang Pasian ahihna a tapa tung pan hong lak ma pek in zong mite in lamdang nasa khin uh a, Israel minamte bangin na ci khin zo pekpek uh hi. Israel te kiangah mei leh meikai tawh a kihil zawh pek ciang zong nang leh kei tungah Pasian ahihna hong laklak lai a ahih khat peuh a cimtaaklo — itna kiam ngeilo a nei, a Lamdang, a piangsa leh a pianglai ding a genkhia Thulakpa, a ut peuh a lamsanga a ut peuh a kaikhia thei Vanglianpa, tuma pekpek pan tunung pekpek tan a om ding leh nang leh kei zawh ciang zong a bei ngeilo ding Tawntungpa ahi hi. Amah Pasian in a nei khempeuh adingin Nopsakna leh Kilemna KUMPI hiding hi. Tua bang mizia a nei Pasian a neikha ka hih khak lamdang kasa hi, hampha ka kisa hi. Lungdam ing Topa. Hau Za Cin