Pasian tawh kimuhna ~ Rev. Tuan Suan Thang

Pasian tawh kimuhna ~ Rev. Tuan Suan Thang

Pasian pen mun khempeuh ah om ahih manin a muh baih mahmah ding tawh kibang napi, lungsim takpi tawh a zongte bek in mu uh hi. Lungsim khempeuh tawh Pasian I zonna ah lungsim sianthona kisam hi. “Lungsim siangthoten thupha a ngah ding uh hi. Bang hang hiam cih leh, Pasian a mu ding uh hi,” ci hi.(Mattahi 5:8).

Pasian tawh a kimu taktakte amah leh amah kitelmuh hi. (Paikhiatna 2:11-12, 4:10): Mawsi (Moses) pen kum 40 sung Egypt kumpi inn sungah om a, Egypt pilna siamna tawh khangkhia hi. Pasian tawh kimu nailo ahih manin tua a pilna a siamna pen Egypt mi khat sihna hong suak hi. A mithahna hangin Mawsi tai in Midian gamah kum 40 sung bang tuucing in om hi. Topa’ Vantungmi sawlpaang kawm meikuang sung pan Mawsi tungah kilang hi.

Pasian in Mawsi kiangah, “Tu in en in, Israel mite’ kikona kei kiang hong tung khin a, Egypt miten a nenniamna ka mu khin hi. Hong pai in, nang in ka mi Israelte Egypt pan in na paikhiatpih theih nading in Faro kiangah nang kong sawl ding hi,” ci hi.

Mawsi pen Pasian tawh kimu ahih manin kum 40 sung Egypt pilna siamna a sinnate kisaktheihpih lo in ama’ ginatlohnate hong kitelmuh mahmah hi. Thugen siamlohna, kampau ol in, pau-awk a hihna hong kitelmuh san hi. Pasian tawh a kimu taktakten midangte’ ginatlohna teng ban kawk lo in ama’ ginatlohna teng kitel muh masa zaw uh hi.

Pasian tawh a kimu taktakte a nuntakzia kikhel hi (Luka 19:1-9): Zakai/Zakkhias/Zekhe(Zacchaeus) in Topa Jesu mu nuam mahmah hi. Ahi zongin a tun tom a, mipi in liah ahih manin mu zolo hi. Jesu pai nading lampi ah na pai in theithek kung tungah kahto hi. Jesu tua mun a tun ciangin ento a, “Zakai aw, a manlang in hong kum in. Tuni in na innah kong taam ding hi,” ci hi. Topa I lunggulh taktak nak leh I min tawh hong sam bek tham loin I haksatna khempeuh hong lakkhiatsak in I numtaknazia hong khel ding hi. Jesu sapna aw a zak ciangin Zakai lungdam mahmah a, theithek tung pan kum mengmeng in Jesu a inn ah tungsak hi. Zakai pen Jesu tawh hong kimuh ciangin a lungsim hong kikhel in a nuntakzia zong hong kikhel hi.

Zakai in Topa Jesu tungah, “Ka neihsa kimkhat mizawngte ka pia ding hi. Mi khatpeuh’ na ka lakkhak leh a zah li in ka loh kik ding hi,” ci in hong kiciam hi (Lk 19:8). Ka piangthak ci napi in a nuntakzia a kikhel tuan kei leh kietphat huai kha ding hi. Piangthak a, Pasian tawh a kimu taktakte a nuntakna uh kikhel hamtang hi. Rev. Tuan Suan Thang (Zangkong Awging)