Pasian’ ompihna sungah nuntakna

Pasian’ ompihna sungah nuntakna

Tu sung teng i thuzakte lunghimawh nading leh patauh nading vive hong hi pian mawk hi. Bangbang ahi zongin Pasian’ ompihna bekmah a thupi sak tek dingin hong hanthawn nuam ing. Ei thu-um mite’ adingin Pasian sim loh i belh, i muan ding leh i bukna ding a dang khat zong om tuan lo hi. Amah in eite’ adingin i munkip muanhuai, i kidalna lum leh i kihotkhiatna hi-a, a muanhuai pen leh a belh taak pen Topa ahi hi. Tua ahih manin lungsim takpi leh lunggulhna lianpi tawh Topa’ ompihna i ngen ding hi.

(1) Daniel pen humpi khumna kua sungah a kikhiat loh nadingin Pasian in dal thei lua, kipelhsak thei lua hinapi-in tua bang lauhuainate tawh kipelhsak lo zaw-a, tua lauhuaina sungah ama hoihna kilangsak zaw hi. A gilo mahmah humpite nangawn tawh omkhawm thei hialhial cih pen Pasian’ ompihna hang himawk lo ahi hiam? Daniel in hi bangin Pasian’ ompihna a ngah theih nadingin, amah in siangtho nuntakna tawh nungta bek tham loin, nisim in Pasian maipha zong a, Pasian tawh maan takin kizom den hi. Eite zong Daniel mah bangin i om nak leh Pasian in lauhuaina leh haksatnate tawh hong kipelhsak lo zaw dinga, lauhuaina leh haksatnate sungah ama hoihna hong musak, hong kilangsak zaw ding hi. Amen.

(2) Shadark, Meshak leh Abenago-te lawmta teng thum zong Pasian in asa mahmah meiphualpi tawh kipelhsak thei lua hinapi-in, kipelhsak lo zaw-a, tua meiphualpi sungah amah(Pasian)tektek in ompih hi. Asa mahmah meiphualpi sungah kikhul hinapi-in nuam takin om hilhial thei-a cimul them zong ton beek lo cih pen, Pasian ompihna hang bekmah himawk lo ahi hiam? Hi bangin Pasian’ ompihna a ngah theih nadingun amaute in, Pasian it in zahtak ngiat uh hi. Milim biak ding sangin a nungta Pasian biak ding mah teel zaw uh hi. Kumpi thuneite thupiakna sangin Pasian thupiakna mang zaw uh hi. Meiphualpi sangin Pasian’ hehna a thuak ding uh lauhuaisa zaw uh hi. Eite zong hih lawmta teng thum mah bangin i nuntak nak leh, Pasian in lauhuaina leh haksatnate tawh hong kipelhsak lo zaw dinga, lauhuaina leh haksatnate sungah ama hoihna hong musak, hong kilangsak zaw ding hi. Amen.

Tua ahih manin, “Topa in tuu banga kei hong cingpa hi,” i cih leh tuu huang sungah i om kul hi. Tuu huang sungah a om mite in, Pasian’ kepbitna leh ama ompihna taktak ngah ding uh hi. Pasian pen amah a beel mite limtakin a kempa ahihna i phawk gige ding a, ahi zongin amah beel kei in, amah muang kei leeng limtakin hong kem lo theipa ahihna zong i phawk gige ding kisam mahmah hi. I nuntakna sungah, Pasian’ bek mah beel in, ama ompihna bekmah i deih pen leh i lunggulhpen hi sak ding hi hang.

Pasian’ ompihna sungah bangmah in hong suksiat zawh loh banah lungnopna, lungmuan’na leh suahtakna cihte kicing takin om ahi hi. Bangzah takin lauhuaina om mah ta leh Pasian’ bek mah muangin beel ni. “PASIAN’ OMPIHNA SUNGAH NUNTAKNA,” a nei kim thei dingin mimal kim tungah, Kha Siangtho in a lamdang takin na hong sem ta hen. Amen.

Khazih sungah,
David Tuang