Pasian maw Pawlpi? Thukhun (bylaw) maw Gupkhiatna Thu?

Pasian maw Pawlpi? Thukhun (bylaw) maw Gupkhiatna Thu?

Pawlpi neilo ding, Pawlpi thupisak lo ding cihna bel hi kei. Tua i Pawlpi thukhun(bylaw)te peuh i gengen zahin, Pasian kammal leh Gupkhiatna thute tangko zel leeng hoih zaw lo ding hiam? Pawlkhatte’n Pasian munah, Pawlpi koih in, Gupkhiatna munah Pawlpi thukhun (bylaw) te peuh koih ihih manin dahhuai ka sa hi.

Pasian’ munah Pawlpi a koihte in, Pasian’ hoihna leh ama kammalte sangin, a Pawlpi thute khawng uh hong gengen nuam zaw ding uh hi.

Gupkhiatna munah Pawlpi thukhun(bylaw) a koihte in, Gupkhiatna Thu gen nading hun khempeuh, Pawlpi thukhun(bylaw)genna in hong beisak lel ding uh hi.

Pawlpi leh i pawlpi bylaw(thukhun)tuamtuamte sangin, Pasian bekmah liansak in, a lian mahmah gupkhiatna thu leh thuhoih thu manphate tam gen zaw le’ng, Pasian zong lungkim/lungdam zaw ding hi. Bang hang hiam cih leh, Topa Jesu mahmah in zong, mi khempeuh pawlpi mi na suaksak un ci lo a, “Mi khempeuh keima nungzui nasuaksak un,”(Mt 28:19) ci zaw hi. Tua banah mi khempeuh tungah thukhun(bylaw)na hilh un ci lo a, “Mi khempeuh tungah lungdamna thu na hilh un,”(Mk 16:15) ci zaw hi.

Bang Pawlpi-ah omin, bang thu thukhun(bylaw) zangh cihte sangin, Jesu nei maw, nei lo cih bek thupi hi. Hun nunung hi ta ahih manin, i pawl lungsim neih gelgalnate nusia-in, a lian mahmah Gupkhiatna Thu thupi sakin, Jesu nei maw neilo cih tawh ei mimal nuntakna ciat kisit phakik ni. Itna leh deihsakna lianpi tawh…

Khazih sungah,
David Tuang