Pasian’ hang bek

Pasian’ hang bek

Abraham in, ta neih theih nading hun bei khin zah dongin omin, lamet bei-in om hi. Ahi zongin, amah in na khempeuh ahih thei Pasian nei ahih manin minam lian suak veve hi.
Joseph in, simmawh bawlsiatna leh ze-etna tuamtuamte zawh zawh nading a nei lua hi tuan lo hi. Ahi zongin, amah in a thuaksiam sak ding leh ze-etna a do zosak ding Pasian nei hi.
David in, Goliath a zawh zawh nading thahatna leh galhiam hoihte anei hilo hi. Ahi zongin, amah in a zosak ding Pasian nei hi.
Moses in, Israel mite makaih zawh nading leh haksatna tampi sung panin, suahtak pih zawh nading pilna, siamna leh hatna kicing neilo hi. Ahi zongin, amah in a makaihsak zo ding leh a suaktasak zo ding Pasian nei hi.
Joshua in, gal zawh nading galkap tampi leh galhiam hoih tampi nei tuan lo hi. Ahi zongin, amah in gal a zawhpih ding Pasian nei hi.
Job in, gen zawhloh zah dongin lungkham haksatna leh gentheihna tuamtuam thuak hi. Ahi zongin, amah in mihingte’ ading a sia a geel ngeilo Pasian nei ahih manin a upna mah lenkip veve hi.
Daniel in, Humpinelkaite tawh lawmta bangin nuam takin om khop theih nading kidalna leh ganhing zol siamna cihte neilo hi. Ahi zongin, amah in Humpinelkaite tawh lawmta bangin omkhawmsak thei-in, amah a liah/dal zo ding Pasian nei hi.
Shadark, Meshak leh Abenegote in, mei phualpi sung panin, suahtak theih nading vangliatna leh thahatna neilo uh hi. Ahi zongin, amaute in mei phualpi sung panin a honkhia zo ding a thahat vang-lian
Pasian nei uh hi.
Paul leh Sailas in, thong sung panin suahtak theih nading thu a ngah uh hi lo hi. Ahi zongin, amaute in thong sung panin suakta sakin a honkhia zo ding Pasian nei-in, thong sung pi mah-ah, a phattaak Pasian phatphat lel uh a, a lamdang suahtakna ngah uh hi.

Hih thute khempeuh i ngaihsut tak ciangin, gualzawhna, daupaina, suahtakna, damna, thuakzawhna, lungnop tawldam’na leh zawh zawhna cihte khempeuh pen, i pil man, i siam man, i thahat man, i hoih man, i hauh man leh i hih zawh man cihte hang hi masa loin, na khempeuh ahih thei, eite biak vanglian Pasian hang bekmah hi zaw hi. A telsiam dingin Topa’n thupha hong pia ta hen.
Khazih sungah,

David Tuang