Pasian bek ii theih thusim

Pasian bek ii theih thusim

* Leitungah buaina tuam2, tuikhang, memcim, huihsia, guahsia, sihna, siatna tuam tuam a pian ciangin mipil te in (a mau theih na or upmawh) thu te uh gen thei himah ta leh a pian loh nangin zong kidal khol zo kim tuan lo in bang hang in hi bang thu piang tak tak hiam cih thu zong Pasian bek mah in thei sinsen mawk hi.

*A hang tak tak pen Pasian bek ii a theih thusim hi aa, ei leitung mite ii theih ding Pasian ii a deih, a thupi pen pen in bang hiam cih leh a piang nate tungtawn in Pasian deihna te ih zuih ding leh a mah tawh ih kinai zawh sem sem nang hanciam ding ci thu ahi hi.

Leitung ah mawhnei mi omlo hi kha leh Topa Jesu leitungah hong pai zen zen lo thei kha ding hi. Mawhna sungah ih om hangin zong Topa Jesu in a ma pumpi mah mah tawh hong tan khia hi kei leh a ma hong it na leh a hongit lam, tuni dongin ih thei zo nai kei ding hi. Topa Jesu in mawhna sungah ih om ding deih lo in a mah tawh a nuamsa khawm dingin hong deih a hih manin ei leitung mite aa ding, a nuntakna hong pia khia hi. Tua a hih manin ei leitung mite in zong a ma hongitna te muthei/ tel thei in a mah ih itna khang sem sem bek tham lo in a ma deih loh mawh nate tawh ih kipelh zawhnang hang ciam in, a mah tawh ih kizopna te nisim in ih khang sak aa, a mah tawh pum khat ih hih zawh nang ih hanciam den hi. Tua pen siatna pan in phat tuamna hamphatna ih ngah na lian pi ahi hi.

Tua mah bangin ei leitung mite zong hamsatna a tuak mi omlo hi leh huhna a pia zo ding mi zong om tuan lo thei kha ding hi. Hamsatna a tuak mi a om hangin zong huhna a pia mi om tuan kei leh khat leh khat kizopna leh ki-itna te kiam sem sem ding a Pasian tawh zong kigamla sem sem ding hi hang. Tu in ih Khamtung Gam leh Kawlpi sung tengah cihmawh haksatna, annek tuidawn ding a nei lo mitampi a hongom manin tua te tungah itna, veina, piakkhiatna a nei mitampitak hong piang khia hi. Ih Pawlpi ii a hoihna, Pawlpi mite ii a hoihna le a hanciamna, ih pawlpi mite in a piciang Christian lungsim ih neihna te hi mun panin hong ki lang sem sem hi.

Gal hang/ galsiam khat ii a hatna/ a siamna te gal a tun ciang bek in a ki muh theih mah bangin, eite ii hoihna/ phatna leh a picing Christian lungsim ih neihna te zong cimawh/ dongtuak mi a om ciang bekin hong ki lang thei pha deuh hi. Ngahna sangin piakna ah thupha om zaw ih cih mah bangin huhna a ngah mite zong lungdam mah mah ding leh a piakhia zo mite zong lungkim mah mah ding bek tham lo-in, huhna a ngah mite leh a pia khia mite kikal ah zong ki-it kilemna, kipumkhatna te hong khang sem sem ding hi.

Hi bangin na hoih sepna te pen Christu sungah pumkhat ih hihna te ii “Gah” a hih manin ih Biak Topa Pasian zong lungkim mah mah ding a ei a pia khia te tungah “ka gilkial laitakin an nong pia aa ka dang taak lai takin tui nong pia hi…”(Mt 25:35) hong ci ding hi. Tua a hih manin Christu sungah kongit U le Nau te, nahoih ihsepna te ah tawlnga lo-in ih hanciam zawh semsem nang tha kongpiak kawmkawm in ih Biak Topa Pasian in ei mimal khat kim ciat tungah thupha hongpia sem sem ta hen! Amen. Ci-in thu kong ngetsak hi.

Christu sungah,
Fr. Joseph Mungno
Leuven, Belgium