Pakistan gamsung ah Bomb tamveipi puakkham in mi 50 si

Pakistan gamsung ah Bomb tamveipi puakkham in mi 50 si

Pakistan gamsung ah Friday ni in Bomb puakkham ngekngek in akigawm in mi 50 bang siding cih Reuters pan kiza hi. Amasa in Quetta City sungah Suicide Car Bomb khat puakkham masa in mi 13 in sihlawhpah hi.

Tuakhit ciangin Parachinar Town sungah Bomb nihvei puakkham leuleu in akigawm in mi 27 bang in sihlawh leuleu uhhi.

Tuabek thamlo, Karachi Megacity sungahzong Friday nitaklam in thaukikapna piangin Police Officer mi 4 sihlawh cih Security Official te’n genkhia uhhi.

Quetta City sungah Suicide Car Bomb apuakkham in asi lakahzong Police Officer mi 7 kihel uh cihi. Police te’n mawtaw khat Checkpoint ah sitding in akhawlsakleh puakkham in mi akigawm in 13 takin asihlawh uh ahihi.

Baluchistan Province panin Director General khatin agenkhiatna ah Bomb apuakkhapna munpen mawtaw tampitak aomna munkhat hi a, tuahang in mi tampi in asihlawh cihi.

Asi mi 13 banah adangzong mi 19 bang liamgawp uh a, Quetta, Civil Hospital ah kipuak uh cihi.

Hih Bomb apuakkham tengpen avek in Jamaat ur Ahrar kici Pakistani Taliban te’n amau gamtatna hi ci’n pulakkhia uhhi. Pakistan gamsung ah Sharia System (Islamic Law) taktak aommateng in ngongtatna pen kakhawl keiding uhhi ci’n genkhia hi.

Parachina Town sungah Bomb puakkhapna hanginzong asi mi 27 bekthamlo, adangzong mi 120 bang liamgawp uhhi ci’n Government Official in Reuters te tungah genkhia hi.

More: Pakistan pasal 4 in Malaysian numei khat ii sum suhsawm

Jamaat ur Ahrar kici mi ngonggamtat te leh IS te’n abeisa hunsung inzong Pakistan gamsung ah tamveipi buaina piangsak in, mi tampi in sihlawhkhin uhhi. Sawltak #zomidaily