Pakistan gam ah Bomb puak, mi 11 si

Pakistan gam ah Bomb puak, mi 11 si

Feb. 13, 2017: Zan in Lahore khuapi ah lungphona a kineih lai-in bomb hat mahmah puakkham a, mi 11 kiim a sih banah mi tampi (dozen kici ziau) in liamna tuak hi ci-in ulian ten pulak uh hi. A bomb puahna mun pen Lahore khuapi-a mi tamna mun Mall Road hi a, zatuizuak (pharmacists) ten drug sale law kici zatui man a laih manun provincial assembly building kong ah lungphona a nei lai takun bomb kipuaksak hi.

Pakistan gam pansan Taliban tawh kipawl Jamaat-ul-Ahrar ten hih bomb puak pen ko puahsak hi a, mi 30 kiim liam hi ci uh hi. A liamte lakah media semte khat zong kihel kha hi. Hih thupiang mit tawh a mu ten Al Jazeera newste kiangah a genna uh-ah motor cycle hawl sihpih bomb puaksak khatin policete mawtaw taihsak in Punjab assembly building kiangah a bomb puak hi ci uh hi.

Sihna tuakte lakah police nga kiim kihel hi ci-in Punjab province sunga inspector general Mushtaq Sukhera in ci a, lungphona neite leh police ulian ten kamkupkhawmna a neih lai takun sihpih bomb kipuaksak hi ci hi. Al Jazeera reporter Kamal Hyder in a bomb puahna kiim police ten khakcip uh a, a bomb puak pen hat lua ahih manin kilometres hun khop gamla panin kiza zo hi ci hi.

Lahore khuapi pen nung kim in Easter Sunday in public park ah bomb kipuaksak in mi 70 val a sihna khuapi ahi hi.

Tua loin nung kum August kha-in Quetta ah bomb kipuak a, mi 74 in sihna a tuahna ah Jamaat-ul-Ahrar ten ko gamtatna hi ci uh hi. Source: Al Jazeera and news agencies/ Thang Khan Lian