Pakistan ah Sunday kikhop laitak Suicide Bomb ki sukham in mi 9 si, 57 liam

Pakistan ah Sunday kikhop laitak Suicide Bomb ki sukham in mi 9 si, 57 liam

Pakistan gamsung aom Christian biakinn khatah migilo Suicide Bomber te lut uh a, Bomb puakkhamsak ahih manin mi 9 in sihlawh cih Fox News pan kiza hi. Suicide Bomber pen pasal 2 hi a, mi zatampi kikhawm in aomna biakinn sungah apuakkhamsak uh ahih manin, aliamzong mi tammahmah hi.

Quetta khuasung aom Bethel Memorial Methodist Church kicihna biakinn sungah zanni Sunday ni in thupiang ahihi. Suicide Bomber te lakah khatpapen biakinn apualam ah ki kaplumthei hi.

Adang khatzawpa pen biakinn amailam Entrance Hall dongah lutphei in, kikhawm Pasian thungei in aom kimlai mipi te thautawh kapphei masa hi. Tuakhit ciangin amahleh amah ki puakkhamsak cihi.

Kamphatna tawh hih Suicide Bomber papen biakinnsung Main Building asungtawn dongah luttheilo bilbel ahih manin, asi aliam atawmzaw ahihi.

Provincial police chief Moazzam Jah in Reuters te tungah agenna ah biakinn asunglam ah mipi 400 dektakbang kikhawm in aom uh hi a, ahi zongin tua Suicide Bomber papen asungdong ah luttheilo bilbel cihi.

Akhatpa pen aki kaplup khitciangin hihpa zong palik te’n akapliam uh hi a, ahi zongin amah leh amah ki puakkhamsak vive cihi.

Hih migilo 2 te ii gamtatna pen IS te’n ko ii khutzat hi ci’n pulakkhia uhhi.

Sunday biakinnsung Suicide Bomb kitam hangin asi pen mi 9 hi a, tualak ah numei 2 kihel hi. Aliam bekbek pen mi 57 hi a, tualak ah numei 5 leh naupang 2 zong kihel uhhi.

Aliam te lakah mi 7 tepen gimngawh phadiak, Critical Condition tawh kikem cihi.

Christmas atunkuan ciangin Christian biakpiakna munte pen migilo te’n mitsuan in neiden uh ahih manin, hih biakinn zong akigingsa High Alert in akikoih ahihi. Tuabang in akigingsa in aomman mahin biakinn apualam ah angak in aom ahi Security Forces te’n Suicide Bomber khatpa pen akaplumthei uh ahihi. Tuahikei zenzenleh biakinn sungah akikhawmteng lakpan in asi aliampen honkhat kibehlap zawlai khading cihi.

More: Pawlpi Sang Nipi (Church School Sunday) ~ Lang Khan Khai

2013 September khasung inzong migilo te’n eshawar Church sungah Suicide Bomb sukham uh a, mi 85 takin sihlawh hi. 2015 March khasung inzong Lahore khuasung ah Suicide Bomber mi 2 in biakinn mun 2 ah Suicide Bomb sukham uh ahih manin, mi 15 in sihlawh uhhi. Sawltak #zomidaily