Zomi Nam Ni etkikna ~ Rev. Gin Khan Nang
1. Lamka: Lamka khuapi sungah Zomi Youth Association makaihna tawh Zomi Nam Ni thupi takin zang uh hi. Kumpi Ulian Pu Phung Za Thang, leh Works Minister banah MLA pawl khat in zatpih hi. Chief Minister in huhna Rs.1,00,000 pia hi. Galkap lam Parade group 6 in nei a, minam lam tuamtuan lam hi. Bawllung kidemna nei uh a, khatna Zomi Football Club (Jiribam) in sum Rs.1,00,000 ngahin nihna United Football Club (Ukhrul) in Rs.50,000 ngah. Cikha leh Tedim panin zong bawllung sui pai uh a, minam lam zong lak uh hi. Lamka bawlung tualpi dimin mi kikhawm a, tukum Zomi Nam Ni zangte lakah mihing tampen dingin kiciam teh hi.
2. Mizogam leh Lamka kikal a Zomite khua khat ahi Mualnuam khua-ah zong Zomi Nam Ni thupi takin bawl uh a, Mizogam panin eimi ulian Pu Rohlun, Minister of Food and Civil Supply zinmang pai a, Khawdungsei khua panin YMA leh lasa siam zong va kihel uh hi. Champhai panin Vanlsawm IFS (DFO), Lalhmingliana DCSO (Supply), Ramdingliana PS leh Ngopa SDO sem lai Rolungmuan zong va kihel thei uh hi. Hih Mualnuam khua pen tangvalte phualpi khat ahi hi. Pu Rohlun, Pu Rolungmuan, Pu Vanlalsawmte zong eimi hi.
3. Mizogam Lawngtlai khua-ah Young Lai Association makaihna tawh YLA Hall ah thupi takin Zomi Nam Ni zang uh a, Lawngtlai District a makaipi Ngunlianchung,(CEM) in zinmang hihna tawh thugenna nei. Falam panin lam pawl pai-in minam lam tuamtuam lahna zong nei uh hi. Hih Lawngtlai khua-ah Zomi Nam Ni a kizat a khatveina hi lai hi.
4. Tulsa khua-ah Oklahoma Zomi Innkuan makaihna tawh thupi takin Zomi Nam Ni zang uh a, Rev. Dr. Ngul Khan Pau zinmang hi-in, minam khantohna ding thu manpha tampi gen hi. Thu leh la lamah tai mahmah uh a, lam leh fashion show akipan lasakna tuamtuam om hi.
5. Florida gam Fort Lauderdale vengah Florida Zomi Innkuan makaihna tawh thupi takin zang uh a, lim lahna (drama) leh la siam tuamtuam in a sak banah Zogam kial huhna ding sum donna zong nei pah uh hi. Zomi Nam Ni pen midang adinga thupha ngahna suaksak uh hi.
6. Portland khua (Oregon) ah Portland Zomi Innkuan makaihna tawh hun siangtho takin zang uh a, Zomite adinga thungetna leh Zomite UN ah min khum zawhna ding hanciamna nei uh hi. Zomi Nam Ni pen minam kip khat suah theihna dingin zang uh hi.
7. Norway gamah zong Zomi Nam Ni nuam takin zang uh a, Tg. J.K. Kam in lasakna tawh Zomite lamsang mahmah hi.
8. London Zomite in zong nuam takin Zomi Nam Ni zang uh a, thugenna, lasakna leh lamna tuamtuan nei thei uh hi.
9. Kawlpi-ah zong Zomi Nam Ni ZBCM huang sungah thupi takin zang uh a, minam tuamtuam in lamna leh lasakna nei uh hi.
Singapore, Malaysia, Delhi, Bangalore, Chenai, Los Angeles, Washington DC, Chicago leh khua tuamtuamte suaksak zo kei hang kithei siam tek ni.
Tukum Zom Nam Ni a thupina pen Zangkungah Zomi Nam Ni -in Tg. Lianpi in zi nei a, Zomi Nam Ni khit deuh Feb.23 ni-in Philippines-ah Tg. Hangpi leh Lia Cingkok kiteng uh hi. Zomi sunga Lia leh Tang i suan mahmah ten Zomi Nam Ni beelin mopawi bawl thei uh ahih manin lungdampih mahmah hang.
Rev. Gin Khan Nang
Comment piaknop aomleh...