Pa Do Khan Vai tawh kisai thu tawm khat
Pa Do Khan Vai pen nuntaak haksatna hang tawh Malaysia lam hong pai hi. Malay Puaisa te khut sungah kaal nih a om khit ciangin a sanggampa Pa khawm Nang tapa te nih Suan Pau leh Kim Mang tawh kithuza thei pan hi. Bang hang cih leh Malaysia hong pai ding pen Malaysia a omte tawh kithuzaakna om masa lo ahihman ahihi. ,Suan Pau leh Kim Mang te unau in atheih phet un lung himawh uh aa sum lah kisam ding, sum om kei leh Malaysia puaisa te pen theih sa a hih ciang cihna ding thei lo ahihman in Sia Thaa Mung kiang huhna ngen uh a, puaisa te phone set pah in puaisa te sansiam theih ding leh muanngamna dingin kigensak hi.
Tua ciang KL.khuapi sung hong puak uh hi, Neihsa sum om lo pipi mah in Suan Pau leh Kim Mang te unau in ih Pa No tan ni ci-in puaisa te nget zah Rm 2400 tawh 08/02/2014 in tan a, omna ding lem pak lo ahihman in Sia Thaa Mung te omna inn ah koih phot uh a, Pa SuanTuang in Cheras lam ah Niangtui sai ah inn piak an piak kha sum 800 tawh nasep om hi a cih ciangin Sia Thaa Mung in
tua munah 12/02/2014 ni in va puak pah hi. Sai neite kiang hoih tak gen sak in 13 ni in nasep kipan thei hi. Nasep kha khat khit ciangin nasep ka laih nuam ci-in lawm leh gual teng hopih koikoi a, Sia Thaa Mung in nasep laih pah nai ken Malay pau na siam ciang laih pan in ci-in thapia hi. kha khat khit teh JOHOR BARU lam ah lawmte kiang nasem mi kideih a hih teh ka nasep laih ning ci leuleu a, tua ciangin a kuama peuh in kampau na siam dong sem in acih khit teh nang ma thu hi cita mai uh hi.Tua leh Sia Thaa Mung dong phot in kici a, amah dong leng sem lai in mah hong ci lel in teh ci-in a nasepna mun pan paikhia aa, a sep pihte in Sia Thaa Mung Phone set uh a Vaipi tuni a nasepna pan khawl ta hi ci-in gen hi. Kim Mang te’n zong a Pano kiang hanciam phot lai dingin hanthawn mah ta leh pai veve hi.
Sia Thaa Mung in hih thu atheih phet in Vaipi phone set pah a, lawm Vaipi aw nasep laih nai kei ve bang hang hiam cih leh nang UN lah nei nai lo, Malay pau thei nailo lai, mat leh hen nat leh sat haksatna khat peuh tuak kha zenzen lecin kong vanna ding haksa hi. Tua ahihman in a gamla na pai ken ci-in phone set a, ahizongin Vaipi in lawm aw tun kei JOHOR BARU lamah lawmte kiangah Bus tawh apaipai hi ta ing ci a, ahizong in haksatna khat peuh ka tuak zenzen leh nang mahmah in hong vaan in maw ci hi. 01/06/2014 ni mah in JOHOR BARU va tung hi.
03/06/2014 JB ah inn lamna ah Nangpi leh Bawk tawh nasem khawm uh hi. Hibang in a lem dandan in asem toto hi a, 17/08/2014 ni nitaak lam nai 2:50pm hun lian in a nasep laitak inndawl Sawmnihna pan in inndawl ngana tung ah kia suk hi, Anuai atun laitak in a husang lai a, Zato ah mawtaw tawh manlang tak puak pah uh hi. Ahihang in lamkaal pan in Vaipi in leitung ah a nuntaakna hong tawlngak san ta hi.
Hihbangin a sihna thu alawm Nangpi leh bawk in Zato vai a man ciangin zan nai 10:30pm pawl in Kim Mang kiang phone set uh a, athu teng theih khit teh Kim Mang zong lungsim haksa sa pipi mah in Sia Thaa Mung kiang nai 11:00pm lian in phone set pah in ka Pano in hong nusia hi cih agen khit ciangin Sia Thaa Mung in Vaipi nasep pihte phone set pah a, Vaipi tunga thupiang pen a takpi mah hiam ci-in hoih tak dong pah hi.
Hih thu teng kua mah kigen ngam pak lo hi. 18 ni ZAM-ZSM, makaite tawh kikum in hih thu a vaan dingin Sia Tuangpu leh Sia Thaa Mung ki aap hi. JB atun uh ciangin Vaipi ii Pano Pa Thang Khan Mung in hong zui a, JB a Vaipi nasepna munteng va en in, a nasepna Mihaupa tawh kihopih thei pah nai lo in, Zato ah aluang ki en thei nai lo ahihmanin tua ni18 zan Pa Thang Khan Mung a nasepna mun ah vaciah kik phot hi. Sia Tuangpu,Thaa Mung leh Kim Mang in a maban uh zom nuam ahihman un Hotel ah giak phot uh hi. Zingsang teh Zato ah paikik aa, a luang a va et khit uh ciangin Palik IO hopih masa in amah tawh kimu a, a thu teng kigen in, akisam Palik zumvai lem thei pah a, aluang ut hunhun a lak theih hi pah hi.
Palik vai leh Zato vai akisam teng a kimansiang khit tak ciangin hanmun vai kivaan leuleu pah a, han lam ah 21/08/2014 ni-in Zatopi pan a luang lakhia in, KL lam Sepang lam ah Hanmual tang sak dingin kigeel hi. Tua ni mah in Vaipi pen Zomi khat ahihna tawh kizuiin ZAM-Hall ah khuapih ulehnau leh Zomi pih teng zingsang 10:00am-12:00pm sung hun kibawl ding a, hunman teh Bus tawh Sepang lam hanmual kizuan ding hi. Zato pan zingsang nai 10 in a luang siaTuangpu in va lakhia dinga hanmual ah hong paipih suak ding hi.
Vuini ding hun theih huai thu tawm
Min :Do Khan Vai
Suahni:22/02/1974 Kum40
Beh :Zealhum
Khua :Limkhai Tenna:SingUnau
Pawlpi:Tuiphum
Sihni :17/08/2014 Amun JOHOBARU malaysia
Sihna :INN Tung pan kia
Han :Sepang
Zi :Nu Cing Khan Hau,Tenkum 01/03/1999
Tateng:Tg.Cin Khan Kim (malaysia)
:Lia.Dim Khan Uap (sgalpur )
:Lia.Cing Thin Neam (Tenna SingUau)
:Huai Thian Kim (Tenna SingUnau)
:Pau Khan Huai (Tenna SingUau)
Hih thu tawh kisai dotnop a om leh Kim Mang 018 244 2686, Sia Thaa Mung 016 646 5375
A thu akisam a om leh ong telsiam un.
Comment piaknop aomleh...